സിംഗപ്പൂരിലെ ഹോട്ടലില് കയറി ഭക്ഷണം കഴിച്ച ജപ്പാന്കാരിക്ക് വെറുമൊരു ഞണ്ടുവിഭവത്തിന് ഹോട്ടല് ബില്ലിട്ടത് 56,000 രൂപ. വില കണ്ട് ഞെട്ടിത്തരിച്ച വിനോദസഞ്ചാരി പോലീസിനെ വിളിച്ചു. സിംഗപ്പൂരിലെ സീഫുഡ് പാരഡൈസ് റെസ്റ്റോറന്റില് നടന്ന സംഭവത്തില് ജാപ്പനീസ് വിനോദസഞ്ചാരിയും മൂന്ന് കൂട്ടുകാരും കഴിച്ച ഭക്ഷണത്തിന്െ വിലയില് തര്ക്കം പരിഹരിക്കാന് ഇവര് പോലീസിന്റെ സഹായം തേടി.
അലാസ്ക്കന് കിംഗ് സൈസ് ചില്ലി ക്രാബായിരുന്നു ഇവര് ഓര്ഡര് ചെയ്തത്. ഭക്ഷണമൊക്കെ കഴിഞ്ഞ് വെയ്റ്റര് ബില്ല്് കൊണ്ടു കൊടുത്തപ്പോഴാണ് കണ്ണുതള്ളിയത്. താന് കഴിച്ച ഭക്ഷണത്തിന് ഹോട്ടല് വിലയിട്ടിരിക്കുന്നത് 680 ഡോളറായിരുന്നു. ഏകദേശം 56,503 ഇന്ത്യന് രൂപയോളം വരും. കഴിക്കും മുമ്പ് ഭക്ഷണത്തിന്റെ വില ശരിയായ രീതിയില് തന്നെ അറിയിച്ചില്ല എന്ന് പറഞ്ഞാണ് ഇവര് പോലീസിന്റെ സഹായം തേടിയത്.
ജപ്പാന്കാരിയായ ഷിന്ബ എന്ന യുവതിക്ക് ആഗസ്റ്റ് 19 ന് നായിരുന്നു ഈ അനുഭവം. റസ്റ്റോറന്റിലെ വെയ്റ്റര് പറഞ്ഞത് അനുസരിച്ചാണ് ഇവര് ഞണ്ടുവിഭവം ഓര്ഡര് ചെയ്തത്. 20 ഡോളറാണ് വിലയെന്ന് വെയ്റ്റര് പറയുകയൂം ചെയ്തിരുന്നു. എന്നാല് 100 ഗ്രാം ഞണ്ടിനാണ് ഇവര് ഈ വില ഈടാക്കിയിരുന്നതെന്നും എന്നാല് ഈ രീതിയില് വെയ്റ്റര് തന്നോട് ഇക്കാര്യം പറഞ്ഞില്ലെന്നും യുവതി പറയുന്നു.
ഷിന്ബ ഉള്പ്പെടുന്ന നാലംഗ സംഘം 3,500 ഗ്രാം ഞണ്ട് കഴിക്കുകയും ചെയ്തു. ഇതോടെയാണ് ബില്ല് 680 ഡോളറായി മാറിയത്. ഇവര് ഉടന് തന്നെ ഹോട്ടലില് നിന്നും പോലീസിന് ഫോണ് ചെയ്യുകയും അവര് എത്തിയപ്പോള് തങ്ങള് അധികം പണം ഈടാക്കിയിട്ടില്ലെന്ന് റസ്റ്റോറന്റ് അധികൃതര് പറയുകയും ചെയ്തു. സമാനഭക്ഷണം ഓര്ഡര് ചെയ്ത മറ്റൊരാള്ക്ക് നല്കിയ ബില് ഹോട്ടല് പോലീസിനെ കാണിക്കുകയും ചെയ്തു.
പിന്നീട് പോലീസ് ഹോട്ടലുകാരുമായി നടത്തിയ ചര്ച്ചയ്ക്കൊടുവില് ബില് 78 ഡോളറാക്കി (ഏകദേശം 6479 രൂപ) ജപ്പാന്കാരിക്ക് കുറച്ചു കൊടുക്കുകയും ചെയ്തു. പാരഡൈസ് ഗ്രൂപ്പ് പറയുന്നത് തങ്ങളുടെ സ്റ്റാഫ് ഒരു തെറ്റും ചെയ്തില്ലെന്നും അലാസ്ക്ക കിംഗ് ക്രബിന്റെ തൂക്കവും വിലയും ഉപഭോക്താവിനെ കൃത്യമായി തന്നെ അറിയിച്ചിരുന്നെന്നുമാണ്. അതേസമയം ജപ്പാന്കാരി സിംഗപ്പൂര് ടൂറിസം ബോര്ഡിനെ സമീപിച്ചിരിക്കുകയാണ്. ഇവരുടെ കേസ് സിംഗപ്പൂരിലെ കണ്സ്യൂമര് അസോസിയേഷന് കൈമാറിയിരിക്കുകയാണ്.
