തിരുവനന്തപുരം: ചലചിത്ര സംവിധായകന് കെ.ജി.ജോര്ജിന്റെ വിയോഗത്തെക്കുറിച്ചുള്ള മാധ്യമപ്രവര്ത്തകരുടെ ചോദ്യത്തിനോട് ആളുമാറി അനുശോചനം നടത്തിയ കെപിസിസി പ്രസിഡന്റ് കെ.സുധാകരന് പ്രതികരണത്തില് വിശദീകരണവുമായി കോണ്ഗ്രസ് പ്രവര്ത്തകര്. കെ ജി ജോര്ജ് നല്ലൊരു പൊതുപ്രവര്ത്തകനും രാഷ്ട്രീയ പ്രവര്ത്തകനുമായിരുന്നു എന്നാണ് സുധാകരന് പ്രതികരിച്ചത്. അദ്ദേഹത്തിന്റെ വിയോഗത്തില് ദുഃഖമുണ്ടെന്നും സുധാകരന് പ്രതികരിച്ചിരുന്നു. എന്നാല് സംഭവം സോഷ്യല് മീഡിയയില് ചര്ച്ചയായതോടെയാണ് കോണ്ഗ്രസ് പ്രവര്ത്തകര് വിശദീകരണവുമായി രംഗത്തെത്തിയത്.
കോണ്ഗ്രസ് പ്രവര്ത്തകനായ ജോര്ജ് എന്നയാള് ഇന്നു മരിച്ചിരുന്നെന്നും കെ.സുധാകരനുമായി അടുത്ത ആത്മബന്ധമുണ്ടായിരുന്ന ആ ജോര്ജിന്റെ മരണത്തെക്കുറിച്ചാണ് മാധ്യമപ്രവര്ത്തകര് ചോദിക്കുന്നതെന്നു കരുതിയാണ് കെപിസിസി പ്രസിഡന്റ് അങ്ങനെ പ്രതികരിച്ചതെന്നുമാണു വിശദീകരണം. അതേസമയം, കെ.ജി.ജോര്ജിന്റെ വിയോഗത്തില് അനുശോചിച്ച് സുധാകരന് പിന്നീട് വാര്ത്താക്കുറിപ്പ് ഇറക്കി. മലയാള സിനിമാ സങ്കല്പ്പങ്ങളെ പൊളിച്ചെഴുതിയ സംവിധായകനായിരുന്നു കെ.ജി.ജോര്ജ് എന്നും പ്രമേയങ്ങളുടെ വൈവിധ്യം കൊണ്ട് അദ്ദേഹം മലയാളികളെ അമ്പരപ്പിച്ചെന്നും കെപിസിസി പ്രസിഡന്റ് അനുശോചന കുറിപ്പില് പറഞ്ഞു.
''വാണിജ്യ സാധ്യതകള്ക്കൊപ്പം കലാമൂല്യമുള്ള ഒരുപിടി മികച്ച ചിത്രങ്ങള് പ്രേക്ഷകര്ക്ക് സമ്മാനിച്ചുകൊണ്ട് മലയാള സിനിമയുടെ പൂമുഖത്ത് സ്വന്തം ഇരിപ്പിടം ഉറപ്പിച്ച അതുല്യനായ കലാകാരനാണ് കെ.ജി.ജോര്ജ്. ശക്തരായ സ്ത്രീ കഥാപാത്രങ്ങളെ സൃഷ്ടിച്ചു കൊണ്ട് ചിരപരിചിതമായ വഴികളില്നിന്ന് അദ്ദേഹത്തിന്റെ സിനിമകള് വേറിട്ടുനിന്നു. കെ.ജി.ജോര്ജിന്റെ വിയോഗം മലയാള സിനിമ മേഖലയ്ക്ക് കനത്ത നഷ്ടമാണ്. അദ്ദേഹത്തിന്റെ ആത്മാവിന് നിത്യശാന്തി ലഭിക്കട്ടെയെന്ന് പ്രാര്ത്ഥിക്കുന്നു''- സുധാകരന് പറഞ്ഞു.
