സ്ത്രീപക്ഷത്തു നിന്ന് സിനിമയെടുത്തവരില് പ്രധാനിയായിരുന്നു ജോര്ജ്. രതിയും സൈക്കോയും ആയിരുന്നു ജോര്ജിന്റെ ഇഷ്ടവിഷയങ്ങള്. അദ്ദേഹത്തിന്റെ സിനിമകളില് കഥാപാത്രങ്ങള് 'പച്ച' യായിരുന്നു.
സിനിമയില് രതി ചര്ച്ചചെയ്യുമ്പോഴും സ്ത്രീപക്ഷത്ത് നില്ക്കാന് ജോര്ജ് ശ്രദ്ധിച്ചിരുന്നു. വളരെ സൂക്ഷ്മതയോടെയാണ് ജോര്ജിന്റെ സിനിമകളില് ലൈംഗികത കടന്നുവരുന്നത്. കാമം എന്നത് പുരുഷന് മാത്രം അവകാശപ്പെട്ടത് എന്ന ഒരു ആണ്കോയ്മ നിലനിന്നിരുന്ന കാലത്ത് സ്ത്രീക്കും ലൈംഗികാവശ്യങ്ങളുണ്ടെന്ന് ജോര്ജ് തന്റെ സ്ത്രീകഥാപാത്രങ്ങളിലൂടെ പറയാതെ പറഞ്ഞു.
കോലങ്ങളില് 'എഴുന്നേറ്റ് പണിക്ക് പോകാന് നോക്ക് മനുഷ്യാ' എന്നു പറഞ്ഞ് ഭര്ത്താവിനെ തട്ടിയുണര്ത്തുന്ന മറിയയെ നമുക്ക് കാണാം. ആ ഒരൊറ്റ സീന് കൊണ്ടുതന്നെ പ്രേക്ഷകന് മനസിലാകും മറിയയാണ് ആ വീടിനെ നിയന്ത്രിക്കുന്നതെന്ന്. കോലം കെട്ടിയാടിയ മലയാള സിനിമയയുടെ മുഖത്ത് കാര്ക്കിച്ച് തുപ്പുന്നതായിരുന്നു 'കോലങ്ങള്' എന്ന സിനിമ.അമ്മിണി.. ആലീസ്.. വാസന്തി.. എന്നീ മൂന്ന് സ്ത്രീകളുടെ കഥ പറയുന്ന 'ആദാമിന്റെ വാരിയെല്ല്' എന്നത്തെയും സമൂഹത്തിന്റെ ഒരു പരിഛേദമായിരുന്നു. ഗ്രാമത്തിന്റെ വിശുദ്ധി എന്ന സങ്കല്പം പൊള്ളയാണെന്ന് എഴുതിച്ചേര്ക്കുന്ന സിനിമയാണ് കോലങ്ങള്.
സൈക്കോളജിക്കല് ത്രില്ലറായ 'ഇരകള്' എന്ന തിരക്കഥയെ മലയാള സിനിമയിലെ എക്കാലത്തെയും മികച്ച ഒറിജിനല് തിരക്കഥയായാണ് സിനിമാ നിരൂപകര് വാഴ്ത്തുന്നത്. ഇലവങ്കോട് ദേശം എന്ന ചിത്രം മാറ്റിനിര്ത്തിയാല് കെ.ജി. ജോര്ജ് ചെയ്ത മറ്റ് സിനിമകള് എല്ലാംതന്നെ മലയാളത്തിലെ ക്ലാസിക് വിഭാഗത്തിലേക്ക് ചേര്ത്ത് വയ്ക്കാവുന്നവയാണ്. മലയാള സിനിമയില് മാറ്റത്തിന്റെ ഒരു യവനിക ഉയരുന്നത് കെ.ജി. ജോര്ജ് എന്ന സംവിധായകന്റെ കടന്നുവരവോടെയാണ്.
