ടൊറന്റോ: ഖലിസ്ഥാന് ഭീകരന് ഹര്ദീപ് സിങ് നിജ്ജാര് കൊല്ലപ്പെടുന്നതിന്റെ വീഡിയോദൃശ്യങ്ങള് പുറത്തുവന്നു. ഇതു കൊലപാതകത്തിന്റെ ആസൂത്രിത സ്വഭാവം വ്യക്തമാക്കുന്നതാണെന്നു വാഷിങ്ടണ് പോസ്റ്റ്. കുറഞ്ഞത് ആറു വ്യക്തികളും രണ്ടു വാഹനങ്ങളും ദൗത്യത്തില് ഉള്പ്പെട്ടിരുന്നതായും ഇതില് സൂചനയുണ്ട്. ഇന്ത്യയും കാനഡയും തമ്മിലുള്ള നയതന്ത്ര തര്ക്കം രൂക്ഷമാകുന്നതിനിടെയാണ് വീഡിയോദൃശ്യങ്ങളുടെയും സാക്ഷിവിവരങ്ങളുടെയും പുതിയ വിശകലനം പുറത്തുവരുന്നത്.
കാനഡയിലെ ഗുരുനാനാക്ക് സിഖ് ഗുരുദ്വാരയ്ക്കു പുറത്തുവച്ച് ജൂണ് 18 നാണ് നിജ്ജാര് കൊല്ലപ്പെട്ടത്. ഇതിന്റെ അന്വേഷണവുമായി ബന്ധപ്പെട്ട വിവരങ്ങള് അധികാരികളില്നിന്നു ലഭിക്കുന്നില്ലെന്നു സമുദായംഗങ്ങള്ക്കു പരാതിയുള്ളതായി റിപ്പോര്ട്ടിലുണ്ട്. മന്ദഗതിയിലുള്ള പ്രതികരണവും അന്വേഷണ ഏജന്സികള് തമ്മിലുള്ള അഭിപ്രായവ്യത്യാസങ്ങളും അവരുടെ ആശങ്ക വര്ധിപ്പിക്കുന്നതായും അതിലുണ്ട്.
ഇതിനിടെയാണു കനേഡിയന് പ്രധാനമന്ത്രി ജസ്റ്റിന് ട്രൂഡോ ഇന്ത്യയ്ക്കെതിരേ ഗുരുതരമായ ആരോപണങ്ങളുമായി രംഗത്തു വന്നത്. നിജ്ജാറിന്റെ കൊലപാതകത്തില് ഇന്ത്യന് സര്ക്കാരിന്റെ ഏജന്റുമാര്ക്കു പങ്കാളിത്തമൂണ്ടെന്നായിരുന്നു ഹൗസ് ഓഫ് കോമണ്സിലെ ട്രൂഡോയുടെ ആരോപണം. 45 വയസുള്ള ഹര്ദീപ് സിങ് നിജ്ജാര് സിഖ് ഗുരുദ്വാരയുടെ പ്രസിഡന്റും ഖാലിസ്ഥാന് പ്രസ്ഥാനത്തിലെ പ്രമുഖനുമായിരുന്നു.
ഇന്ത്യയിലെ പഞ്ചാബ് മേഖലയില് സ്വതന്ത്ര സിഖ് രാഷ്ര്ടത്തിനായി വാദിച്ച ഇയാള്ക്ക് നേരത്തെ വധഭീഷണിയുണ്ടായിരുന്നതായാണ് വീട്ടുകാരെ ഉദ്ധരിച്ചുള്ള റിപ്പോര്ട്ടിലെ വിവരണം. ഖാലിസ്ഥാന് പ്രസ്ഥാനം ഇന്ത്യയില് നിയമവിരുദ്ധമാണെന്നും പഞ്ചാബിലെ ഒരു ഹിന്ദു പുരോഹിതനെ കൊലപ്പെടുത്താന് നിജ്ജാര് ഗൂഢാലോചന നടത്തിയതായി കഴിഞ്ഞവര്ഷം ഇന്ത്യയുടെ ദേശീയ അന്വേഷണ ഏജന്സി ആരോപിച്ചെന്നുമാണ് അതിന്റെ തുടര്ച്ച. പിടികിട്ടാത്ത തീവ്രവാദിയെന്ന് ഇന്ത്യ നിജ്ജാറിനെ മുദ്രകുത്തിയിട്ടുണ്ടെങ്കിലും പ്രധാനമന്ത്രി നരേന്ദ്രമോദി നയിക്കുന്ന ഇന്ത്യന് സര്ക്കാര് കൊലപാതകത്തിലെ പങ്ക് നിഷേധിച്ചതായും വീഡിയോദൃശ്യങ്ങള് വിശകലനം ചെയ്യുന്ന വാര്ത്തയിലുണ്ട്. ഇന്ത്യ തീവ്രവാദികളായി കണക്കാക്കുന്നവര്ക്ക് കാനഡ അഭയം നല്കുന്നതില്നിന്ന് ശ്രദ്ധ തിരിക്കാനുള്ള ശ്രമമാണിതെന്നാണ് റിപ്പോര്ട്ടിലെ ആരോപണം.
ഗുരുദ്വാരയിലെ സുരക്ഷാ ക്യാമറയില് പതിഞ്ഞ കൊലപാതകത്തിന്റെ ദൃശ്യങ്ങള് അന്വേഷണത്തില് നിര്ണായക തെളിവുകള് നല്കുമെന്ന് റിപ്പോര്ട്ട് അവകാശപ്പെടുന്നു. അക്രമികളുടെ വാഹനം നിജ്ജാറിന്റെ ചാരനിറത്തിലുള്ള പിക്കപ്പ് ട്രക്കിനെ പിന്തുടരുന്നതും ഒടുവില് ഒരു വെള്ള സെഡാന് തടയുന്നതുമുള്പ്പെടെ സംഭവങ്ങളുടെ ഒരു ശ്രേണിതന്നെ വീഡിയോയിലുണ്ടെന്നാണു സൂചന.
