പത്തനംതിട്ട: ദേവസ്വംമന്ത്രി കെ രാധാകൃഷ്ണന്റെ വാഹനം റോഡില് തടഞ്ഞു നിര്ത്തി ആവശ്യങ്ങള് നിരത്തി പ്രദേശവാസികള്. ശബരിമല അവലോകനയോഗം കഴിഞ്ഞ് മടങ്ങുമ്പോള് ശബരിമല വനമേഖലയിലെ അട്ടത്തോട് ട്രൈബല് കോളനി നിവാസികളാണ് മന്ത്രിയെ വഴിയില് തടഞ്ഞത്. തങ്ങളുടെ ആവശ്യങ്ങള് ഊരു മൂപ്പന് നാരായണന് മന്ത്രിയോട് പറയുകയും പരിഗണിക്കാമെന്ന് മന്ത്രി ഉറപ്പും കൊടുത്തു.
ശബരിമല തീര്ത്ഥാടന കാലത്ത് നിലയ്ക്കല് മുതല് പമ്പ വരെ കോളനി നിവാസികളുടെ ഓട്ടോറിക്ഷ ഉള്പ്പെടെ വാഹനങ്ങള് ഓടിക്കാന് അനുവദിക്കണം, ക്ലീനിംഗ് ജോലികളില് കോളനിയിലെ ആള്ക്കാര്ക്കും അനുവദിക്കുക, ചെറുകിട കച്ചവടങ്ങള് വഴിയോരത്ത് നടത്താന് അനുവദിക്കുക എന്നീ ആവശ്യങ്ങളാണ് കോളനി നിവാസികള് മന്ത്രിയോട് ഉന്നയിച്ചത്. ആവശ്യങ്ങള് പരിഗണിക്കാമെന്ന് മന്ത്രിയും പറഞ്ഞു.
മണ്ഡല മകരവിളക്ക് തീര്ത്ഥാടന കാലത്ത് ശബരിമലയില് സാധ്യമായ എല്ലാ കാര്യങ്ങളും ചെയ്യുമെന്ന് മന്ത്രി പറഞ്ഞു. ഇത്തവണ കൂടുതല് തീര്ത്ഥാടകരെയാണ് സംസ്ഥാനം പ്രതീക്ഷിക്കുന്നതെന്നും കെഎസ്ആര്ടിസി 200 ചെയിന് സര്വീസുകളും 150 ദീര്ഘദൂര സര്വീസുകളും നടത്തും. തീര്ത്ഥാടന പാതയിലെ ആശുപത്രികളില് ആവശ്യത്തിന് മരുന്നുകളും, ആംബുലന്സും, ഉദ്യോഗസ്ഥരെയും സജ്ജമാക്കും. 50 ലക്ഷം തീര്ത്ഥാടകരാണ് കഴിഞ്ഞതവണ എത്തിയതെന്നും മന്ത്രി പറഞ്ഞു.
