കട്ടപ്പന: ദോശയ്ക്ക് ചമ്മന്തി നല്കാതിരുന്നതിനെ ചൊല്ലിയുണ്ടായ തര്ക്കത്തിനൊടുവില് യുവാവ് തട്ടുകട ജീവനക്കാരന്റെ മൂക്ക് കടിച്ചു പറിച്ചു. പുളിയന്മലയില് കഴിഞ്ഞ ദിവസം രാത്രിയിലായിരുന്നു സംഭവം.
പരുക്കേറ്റ പുളിയന്മല ചിത്ര ഭവനില് ശിവചന്ദ്രനെ പ്ലാസ്റ്റിക്ക് സര്ജറിക്ക് വിധേയനാക്കി. പുളിയന്മലയില് തമിഴ്നാട് സ്വദേശി കവിയരശന്റെ തട്ടുകയിലെ ജീവനക്കാരനായ ശിവചന്ദ്രനെ പ്രദേശവാസിയായ സുജീഷ് എന്ന യുവാവാണ് ആക്രമിച്ചത്. തട്ടുകടയിലെ സാധനങ്ങള് തീര്ന്നതിനൊപ്പം മഴയുമുണ്ടായിരുന്നതിനാല് കട അടക്കാന് തുടങ്ങുന്നതിനിടെയാണ് അക്രമം ഉണ്ടായത്.
പുളിയന്മല അമ്പലമേട്ടില് താമസിക്കുന്ന സുജീഷ് കടയിലെത്തി ഭക്ഷണം ആവശ്യപ്പെട്ടു. എതിര് വശത്ത് ബേക്കറി നടത്തുന്നയാളുടെ മകനാണ് സുജീഷ്. പരിചയത്തിന്റെ പേരില് ജീവനക്കാര്ക്കായി വച്ചിരുന്ന ദോശയിലൊന്ന് ഇയാള്ക്ക് നല്കി. എന്നാല്, ദോശക്കൊപ്പം കറി ഇല്ലാതിരുന്നതിനെ ചൊല്ലി തര്ക്കമായി. ഇതിനിടെ സുജീഷ് കടയിലെ സാധനങ്ങള് നശിപ്പിക്കുകയും ശിവയെ മര്ദിക്കുകയുമായിരുന്നു.
ആക്രമണത്തിനിടെ സുജീഷിന്റെ കടിയേറ്റ് ശിവചന്ദ്രന്റെ മൂക്കിന് മുറിവേല്ക്കുകായയിരുന്നു. മര്ദനം തടയാനെത്തിയ മറ്റു രണ്ടു ജീവനക്കാരെയും ഇയാള് ആക്രമിച്ചതായി പരാതിയുണ്ട്. പരുക്കേറ്റ ശിവയെ വിദഗ്ധ ചികിത്സക്കായി കോട്ടയത്തെ സ്വകാര്യ ആശുപത്രിയില് പ്രവേശിപ്പിച്ചു.
സംഘര്ഷത്തിനിടെ പരുക്കേറ്റ സുജീഷും കട്ടപ്പനയിലെ ആശുപത്രിയില് ചികിത്സ തേടി. ഇരുകൂട്ടരും തമ്മില് കുടിവെള്ള കണക്്ഷനെ ചൊല്ലി തര്ക്കം നിലനിന്നിരുന്നതാണ്. ശിവചന്ദ്രന്റെ പരാതിയില് വണ്ടന്മേട് പോലീസ് കേസെടുത്ത് അന്വേഷണം ആരംഭിച്ചു.
