റ്റാവ: മാതാപിതാക്കളും സഹോദരന്മാരും വയലില് ജോലിക്ക് പോയ സമയത്ത് കാമുകനെ വീട്ടില് വിളിച്ചുകയറ്റുകയും സംഭവം പുറത്തറിയാതിരിക്കാന് ദുക്സാക്ഷികളായ ഇളയ സഹോദരിമാരെ കഴുത്തറുത്ത് കൊലപ്പെടുത്തുകയും ചെയ്ത കൗമാരക്കാരി അറസ്റ്റില്. ഉത്തര്പ്രദേശിലെ ഇറ്റാവയില് ഞായറാഴ്ച രാത്രിയാണ് സംഭവം. അഞ്ജലി പാല് എന്ന 18കാരിയാണ് ആറും നാലും വയസ്സുള്ള ഇളയ സഹോദരിമാരെ കൊലപ്പെടുത്തിയത്.
ബല്റായ് പോലീസ് സ്റ്റേഷന് പരിധിയിലുള്ള ബഹാദുര്പുര് ഗ്രാമത്തിലാണ് സംഭവം. പിതാവ് ജയ്വീര് സിംഗും മാതാവ് സുശീലയും ഇവരുടെ ആണ്മക്കളായ നന്ദ കിഷോറും (12) കനയ്യയും (8) വയലില് ആയിരുന്നു. അഞ്ജലി ഇളയ കുട്ടികളെയും നോക്കി വീട്ടില് ആയിരുന്നു. ഈ സമയമാണ് കാമുകനെ വിളിച്ചുവരുത്തുകയും ഇവര് ശാരീരിക ബന്ധത്തില് ഏര്പ്പെടുകയും ചെയ്തത്.
മാതാപിതാക്കള് തിരിച്ചെത്തുമ്പോള് ഇക്കാര്യം പറയാതിരിക്കാന് ഇളയ കുട്ടികളെ വീട്ടിലുണ്ടായിരുന്ന മണ്വെട്ടി കൊണ്ട് കഴുത്തിനു വെട്ടിക്കൊലപ്പെടുത്തുകയായിരുന്നു. തുടര്ന്ന് വയലിലേക്ക് പോയ അഞ്ജലി മാതാപിതാക്കള്ക്കൊപ്പം തിരിച്ചെത്തി. വീട്ടിലെത്തുമ്പോള് കുട്ടികള് മരിച്ചുകിടക്കുന്നത് കണ്ട ഒന്നുമറിയാത്തപോലെ പെരുമാറി.
കാണ്പൂര് റേഞ്ച് ഐജിയുടെ നേതൃത്വത്തിലുള്ള സംഘം നടത്തിയ അന്വേഷണത്തിലാണ് അഞ്ജലിയെ പിടികൂടിയത്. ചോദ്യം ചെയ്യലില് കുറ്റം സമ്മതിച്ചു. കൊലപാതകം, തെളിവുനശിപ്പിക്കല്, അന്വേഷണം വഴിതെറ്റിക്കല് തുടങ്ങിയ കുറ്റങ്ങള് ചുമത്തി കേസെടുത്തു. പെണ്കുട്ടിയുമായി ബന്ധമുള്ള മൂന്ന് യുവാക്കളെയും പോലീസ് ചോദ്യം ചെയ്തു.
രാവിലെ ഉപയോഗിച്ച മണ്വെട്ടി കഴുകി വൃത്തിയാക്കി വച്ചിരിക്കുന്നതും വസ്ത്രങ്ങള് കഴുകിയിട്ടിരിക്കുന്നതും പോലീസിന്റെ ശ്രദ്ധയില്പെട്ടിരുന്നു. ഫോറന്സിക് വിഭാഗം നടത്തിയ പരിശോധനയില് ഇവയില് രക്തക്കറ കണ്ടെത്തി. വസ്ത്രങ്ങള് അഞ്ജലി ഞായറാഴ്ച ധരിച്ചിരുന്നതാണെന്ന് സ്ഥിരീകരിക്കുകയും ചെയ്തു.
താന് പുറത്തുപോയി വന്നപ്പോള് കുട്ടികള് കൊല്ലപ്പെട്ട നിലയിലാണെന്നും ശരീരം ഒരു മുറിയിലും തലകള് മറ്റൊരു മുറിയിലുമാണ് കണ്ടെത്തിയതെന്നും അവര് പോലീസിനോട് പറഞ്ഞിരുന്നു. എന്നാല് ചോദ്യം ചെയ്യലില് മൊഴികളില് വൈരുദ്ധ്യം കണ്ടതോടെ കസ്റ്റഡിയില് എടുക്കുകയായിരുന്നു. ഇതോടെ അഞ്ജലി കുറ്റം സമ്മതിച്ചു.
