പൊന്കുന്നം: അമോണിയ ചേര്ത്ത റബര്മിശ്രിതം കയറ്റിവന്ന ടാങ്കര് ലോറി എലിക്കുളത്ത് മറിഞ്ഞതിനെ തുടര്ന്നു മലിനമായ തോട്ടിലെ വെള്ളം തെളിഞ്ഞ നിലയിലായി. എലിക്കുളം മുതല് 15 കിലോമീറ്ററിലേറെ മീനച്ചിലാര് വരെ തോട് മലിനപ്പെട്ട നിലയിലായിരുന്നു കഴിഞ്ഞ ദിവസം. മഴ ലഭിച്ചതിനാല് ഇന്നലെ പകല് തോട് പൂര്ണമായും തെളിഞ്ഞ നിലയിലായി. മാലിന്യത്തിന്റെ അവശിഷ്ടമൊന്നും പ്രത്യക്ഷത്തില് കാണ്മാനില്ല.
എന്നാല് അമോണിയ സാന്നിധ്യം പൂര്ണമായി മാറിയെന്നു പ്രദേശവാസികള് കരുതുന്നില്ല. ശക്തമായ മഴ പെയ്ത് ഇരുകരകളും നിറഞ്ഞു വെള്ളമൊഴുകിപ്പോയാല് മാത്രമേ മാലിന്യം പൂര്ണമായും ഒഴിയൂ എന്നാണു നാട്ടുകാരുടെ പക്ഷം. കഴിഞ്ഞ ദിവസം പാല്നിറത്തിലായിരുന്ന തോട്ടില് വെള്ളിയാഴ്ചത്തെ മഴയോടെ തെളിഞ്ഞ വെള്ളമായിട്ടുണ്ട്. പലയിടത്തും മീനുകള് ചത്തുപൊങ്ങിയിരുന്നു.
തോടിന്റെ ഏഴരമീറ്റര് ചേര്ന്നുള്ള കിണറുകളില് മാലിന്യം കലരാന് സാധ്യതയുണ്ടെന്ന് ആരോഗ്യവകുപ്പ് അറിയിച്ചിരുന്നു. തടയണകളുള്ള പ്രദേശത്ത് 10 മീറ്റര് ഭാഗത്തേക്ക് മണ്ണിലൂടെ മാലിന്യമെത്താനിടയുണ്ടെന്നും വിശദീകരിച്ചിരുന്നു. ഇതിനെ തുടര്ന്ന് എലിക്കുളം, മീനച്ചില്, മുത്തോലി, കൊഴുവനാല് പഞ്ചായത്തുകളിലായി 20 കുടിവെള്ള പദ്ധതികളുടെ പ്രവര്ത്തനം നിര്ത്തിവെച്ചിരിക്കുകയാണ്. അവയുടെയെല്ലാം കിണറുകളോ കുളങ്ങളോ മാലിന്യവാഹിനിയായി മാറിയ തോടിന്റെ കരയിലാണ്. പദ്ധതികിണറുകളിലെ ജലം പരിശോധനയ്ക്ക് എടുത്തിട്ടുണ്ട്. ഇവയുടെ ഫലം വന്നതിന് ശേഷമേ ശുചീകരണം, തുടര്നടപടികള് എന്നിവയാവൂ.
അതേസമയം എലിക്കുളം പഞ്ചായത്തിലെ കരിമലക്കുന്നു കുടിവെള്ള പദ്ധതിയുടെ കിണര് മലിനപ്പെട്ടതായി പരിശോധന റിപ്പോര്ട്ട് വന്നു. വാട്ടര് അതോറിറ്റിയുടെ കോട്ടയത്തെ ലാബിലാണ് പരിശോധന നടത്തിയത്. ഈ ഫലത്തെ തുടര്ന്നു പമ്പിങ് പുനരാരംഭിക്കേണ്ടതില്ലെന്ന് ആരോഗ്യവകുപ്പ് അധികൃതര് നിര്ദേശിച്ചതായി പഞ്ചായത്ത് പ്രസിഡന്റ് എസ്.ഷാജി പറഞ്ഞു.
വെള്ളം പൂര്ണമായി വറ്റിച്ചതിനു ശേഷം തുടര്ന്നു വരുന്ന വെള്ളം ക്ലോറിനേഷന് നടത്തി ശുചീകരിക്കും. വീണ്ടും പരിശോധന നടത്തി അമോണിയ സാന്നിധ്യമില്ലെന്ന് ഉറപ്പുവരുത്തിയതിനു ശേഷമേ കുടിവെള്ള വിതരണം പുനരാരംഭിക്കൂ. ഉരുളികുന്നം കുടിവെള്ള പദ്ധതിയുടെ പ്രവര്ത്തനവും നിര്ത്തിവെച്ചിരിക്കുകയാണ്. ഇതിന്റെ പരിശോധനാ ഫലം ലഭിച്ചിട്ടില്ലെന്ന് അധികൃതര് പറഞ്ഞു.
