മുംബൈ: നോട്ട് നിരോധനത്തിന് തൊട്ടുപിന്നാലെ രാജ്യത്തെ പ്രമുഖ ബാങ്കുകള്‍ പലിശ നിരക്ക് കുറയ്ക്കല്‍ പ്രഖ്യാപിച്ചു. ബാങ്ക് ഓഫ് ബറോഡ, ക്യാനറാ ബാങ്ക് എന്നിവയും പലിശനിരക്ക് കുറച്ചു. സ്വകാര്യ ബാങ്കുകളായ ഐസിഐസിഐ, എച്ച്ഡിഎഫ്‌സി, യെസ് എന്നീ ബാങ്കുകളൂം പലിശനിരക്ക് കുറച്ചു. ഇതോടെ ഭവന, വാഹന വായ്പയില്‍ രാജ്യത്ത് പലിശനിരക്കില്‍ വലിയ കുറവ് വരും.
പുതിയതായി നിരക്ക് കുറച്ചിരിക്കുന്നത് 0.38 ശതമാനം മുതല്‍ 0.90 ശതമാനം വരെയാണ്. നേരത്തേ എസ്ബിഐ ആറു വര്‍ഷത്തിനിടയില്‍ വീട് വെയ്ക്കുന്നതിനുള്ള വായ്പയില്‍ ഏറ്റവും കുറഞ്ഞ പലിശനിരക്കാണ് പ്രഖ്യാപിച്ചത്. രാജ്യത്തെ ഏറ്റവും വലിയ വായ്പാദാതാക്കളില്‍ പെടുന്ന ഇവര്‍ നേരത്തേ 9.10 ശതമാനത്തില്‍ നിന്നും 8.6 ശതമാനമായി പലിശനിരക്ക് കുറച്ചിരുന്നു. ഇതോടെ എസ്ബിഐ യുടെ പലിശനിരക്ക് 8.65 ശതമാനത്തില്‍ നിന്നും 7.75 ശതമാനമായി കുറഞ്ഞു. നേരത്തേ 75 ലക്ഷത്തിന് മുകളിലുള്ള വീട് വായ്പകള്‍ക്ക് 9.1 ശതമാനമായിരുന്ന പലിശ നിരക്ക് 8.6 ശതമാനമായിട്ടാണ് കുറയുക. 9.1 ശതമാനം പലിശ വാങ്ങിയിരുന്ന മറ്റു വായ്പകള്‍ക്ക് 8.6 ശതമാനം പലിശയാകും.
എസ്ബിഐ യ്ക്ക് പുറമേ യൂണിയന്‍ ബാങ്ക് ഓഫ് ഇന്ത്യ, പഞ്ചാബ് നാഷണല്‍ ബാങ്ക് എന്നിവയും റേറ്റ് കുറച്ചു. യൂണിയന്‍ ബാങ്ക് ഓഫ് ഇന്ത്യ 9.3 ശതമാനത്തില്‍ നിന്നും 8.65 ശതമാനമായിട്ടാണ് പലിശ കുറച്ചത്. പഞ്ചാബ് നാഷണല്‍ ബാങ്കിന്റേത് 9.15 ശതമാനത്തില്‍ നിന്നും 8.45 ശതമാനത്തിലേക്കാണ് കുറഞ്ഞത്. ഇതിന് പിന്നാലെ സ്വകാര്യ ബാങ്കുകളും ഈ പാതയില്‍ എത്തുമെന്ന് നേരത്തേ തന്നെ ഉറപ്പായിരുന്നു.
Comments