അലീഗഡ്: പലിശക്കാരനില് നിന്നും പണം കടമെടുത്ത് ഭൂമി വാങ്ങി കടം കയറിയയാള് തന്റെ പ്രായപൂര്ത്തിയാകാത്ത മകനെ വില്പ്പനയ്ക്ക് വെച്ചു. ഉത്തര്പ്രദേശിലെ അലിഗഡില് നടന്ന സംഭവത്തില് രാജ്കുമാറെന്ന ഓട്ടോ ഡ്രൈവറാണ് 5-6 ലക്ഷം രൂപയുടെ കടം വീടാന് മാര്ഗ്ഗമില്ലാതെ പകരം മകനെ നല്കുന്നത്. പണം തിരികെ ചോദിച്ച എത്തിയ പലിശക്കാരന് ഇയാളെ വിടാതെ ഭാര്യയ്ക്കും മകനും മകള്ക്കുമൊപ്പം ബസ് സ്റ്റാന്റിന് സമീപമുള്ള തെരുവില് ഇരുത്തി അപമാനിക്കുകയും ചെയ്തു.
''എന്റെ മകനെ വില്പ്പനയ്ക്ക്. മകനെ ഞാന് വില്ക്കാന് ആഗ്രഹിക്കുന്നു'' എന്നെഴുതിയ പ്ലക്കാര്ഡും കഴുത്തില് തൂക്കിയായിരുന്നു ഇയാള് വഴിയില് നിന്നിരുന്നത്. മാധ്യമങ്ങള് പുറത്തുവിടുന്ന റിപ്പോര്ട്ട് പ്രകാരം ഭൂമി വാങ്ങാന് പലിശക്കാരനില് നിന്നും 50,000 രൂപയാണ് രാജ്കുമാര് വാങ്ങിയത്. എന്നാല് പലിശക്കാരന് സൂത്രത്തില് ഈ പണം ഇയാളില് നിന്നും തട്ടിയെടുക്കുകയും ചെയ്തതോടെ രാജ്കുമാറിന് പണവും നഷ്ടമായി വസ്തുവും കിട്ടിയില്ല. കടം കയറുകയും ചെയ്തു. വീടിന്റെ ഏക വരുമാനം ഇയാള് ഓടിക്കുന്ന ഇലക്ട്രിക് ഓട്ടോയാണ്. അതും പലിശക്കാരന് എടുത്തുകൊണ്ടുപോവുകയും പല തവണ ഇവര് താമസിക്കുന്ന വീട്ടില് നിന്നും ഇറക്കി വിടുകയും ചെയ്തു. തന്നെ പല തവണ കുട്ടികളുടെ മുന്നില് വെച്ച് ഇയാള് അപമാനിച്ചെന്ന് രാജ്കുമാര് പറയുന്നു.
''കുട്ടികളുടെ മുന്നില് വെച്ച് നിരന്തരം അപമാനിക്കുന്നു. തന്നേയും കുടുംബത്തെയും വീട്ടില് നിന്നും വെളിയിലാക്കി. ജീവിതമാര്ഗ്ഗമായ ഓട്ടോറിക്ഷ എടുത്തുകൊണ്ടുപോയി. പോലീസ് സ്റ്റേഷനില് ചെന്ന് പരാതി നല്കിയെങ്കിലും കേസെടുക്കാന് പോലീസ് തയ്യാറായില്ല. '' രാജ്കുമാര് പറഞ്ഞു. ഇതിനകം 6000 രൂപ അടച്ചുകഴിഞ്ഞു. ബക്കി തുക അടച്ചു തീര്ക്കാനുള്ള കഠിന ശ്രമത്തിലാണെന്നും രാജ്കുമാര് പറഞ്ഞു. കുടുംബം പ്രതിഷേധിക്കുന്ന വീഡിയോ വ്യാപകമായി പ്രചരിച്ചതിനെ തുടര്ന്ന് സംഭവം പോലീസിനെ നടപടിയെടുക്കാന് നിര്ബ്ബന്ധിതമാക്കിയിരിക്കുകയാണ്.
ശനിയാഴ്ച പ്രതിയെ അറസ്റ്റുചെയ്ത് ജയിലിലേക്ക് അയച്ചു. സംഭവം യുപിയിലെ പ്രതിപക്ഷ പാര്ട്ടിയായ സമാജ്വാദി പാര്ട്ടിയും ഏറ്റെടുത്തിരിക്കുകയാണ്. സര്ക്കാര് നടപടിയെടുക്കണമെങ്കില് ആരെങ്കിലും അവരെ വിളിച്ചെഴുന്നേല്പ്പിക്കണം എന്നായിരുന്നു എസ്പിയുടെ അഖിലേഷ് യാദവിന്റെ പരിഹാസം. ഒരു പിതാവ് മകനെ വില്ക്കാന് നിര്ബന്ധിതനാകുമ്പോള് ഇതാണ് ബിജെപിയുടെ അമൃത് കാള്. ഈ ചിത്രം ലോകമെമ്പാടും വ്യാപിക്കുകയും ലോകമെമ്പാടും സംസ്ഥാനത്തിന്റെയും രാജ്യത്തിന്റെയും പ്രതിച്ഛായ നശിപ്പിക്കുന്നതിന് മുമ്പ് ആരെങ്കിലും സര്ക്കാരിനെ ഉണര്ത്തണം,'' യാദവ് ഹിന്ദിയില് എക്സില് പോസ്റ്റ് ചെയ്തു.
