ന്യൂഡല്ഹി: ഇന്ത്യയുടെ ചരിത്രത്തിലെ ഏറ്റവും വലിയ ഡാറ്റാ ലംഘനത്തെ അടയാളപ്പെടുത്തി 81.5 കോടി ഇന്ത്യക്കാരുടെ സെന്സിറ്റീവ് വിവരങ്ങള് ഡാര്ക്ക് വെബില് എത്തിയതായി റിപ്പോര്ട്ട്. ഇന്ത്യന് കൗണ്സില് ഓഫ് മെഡിക്കല് റിസര്ച്ചി (ഐസിഎംആര്) ന്റെ ഡേറ്റാബേസില് നിന്നുമാണ് വിവരം ചോര്ന്നതെന്നാണ് സൂചന. ചോര്ച്ചയുടെ പ്രധാന ഉറവിടം കണ്ടെത്തുന്നതിനായി ഇക്കാര്യത്തില് സിബിഐ അന്വേഷണം തുടങ്ങിയതായും ഇന്ത്യാ ടുഡേ പുറത്തുവിട്ട റിപ്പോര്ട്ടില് വ്യക്തമാക്കുന്നു.
'പിഡബ്ള്യൂഎന്0001' എന്ന പേരിലുള്ള ഒരു ഹാക്കര് ഡാര്ക്ക് വെബ്ബില് മോഷണ വിവരം പരസ്യപ്പെടുത്തിയതോടെയാണ് വിഷയം ശ്രദ്ധയില് പെട്ടത്. ഹാക്കര് പങ്കിട്ട വിവരം അനുസരിച്ച് മോഷ്ടിച്ച വിവരങ്ങളില് ആധാര്, പാസ്പോര്ട്ട് വിശദാംശങ്ങളുമുണ്ട്. ദശലക്ഷക്കണക്കിന് ഇന്ത്യക്കാരുടെ പേരുകള്, ഫോണ് നമ്പറുകള്, താല്ക്കാലികവും സ്ഥിരവുമായ വിലാസങ്ങള് എന്നിവയും മോഷ്ടിച്ച വിവരങ്ങളില് ഉള്പ്പെടുന്നു. കോവിഡ്-19 പരിശോധനയ്ക്കിടെ ഐസിഎംആര് ശേഖരിച്ച വിവരങ്ങളില് നിന്നാണ് ഈ ഡാറ്റ വരുന്നതെന്നും ഹാക്കര് അവകാശപ്പെടുന്നു.
സൈബര് സെക്യൂരിറ്റിയിലും രഹസ്യാന്വേഷണത്തിലും സ്പെഷ്യലൈസ് ചെയ്യുന്ന അമേരിക്കന് ഏജന്സിയായ റീ സെക്യൂരിറ്റി എന്ന സ്ഥാപനമാണ് ഡാറ്റാ മോഷണത്തിന്റെ വിവരം ആദ്യം കണ്ടെത്തിയത്. മോഷണത്തിന് ഇരയായ ഫോറങ്ങളില് നിന്നും ശേഖരിച്ച ഇന്ത്യന് പൗരന്മാരുടെ ആധാര്, പാസ്പോര്ട്ട് രേഖകള് അടക്കം 815 ദശലക്ഷം റെക്കോഡ്സ് കിട്ടാന് സാഹചര്യമുണ്ടെന്ന് 'പിഡബ്ള്യൂഎന്0001' ഒക്ടോബര് 9 ന് പരസ്യം നല്കിയിരുന്നു. ഇന്ത്യയിലെ മൊത്തം ജനസംഖ്യ 1.486 ബില്യണാണ്.
ഇന്ത്യന് പൗരന്മാരുടെ വ്യക്തിവിവരങ്ങള് വരുന്ന ഒരു ലക്ഷം ഫയലുകള് ചോര്ന്ന ഡാറ്റകളിലുണ്ടെന്ന് ഗവേഷകര് കണ്ടെത്തി. ആധാര് വിവരങ്ങള് ആധികാരികമാക്കുന്ന ഒരു സര്ക്കാര് പോര്ട്ടലിന്റെ 'വേരിഫൈ ആധാര്' ഫീച്ചര് ഉപയോഗിച്ച് ഈ രേഖകളില് ചിലത് സ്ഥിരീകരിക്കുകയും ചെയ്തിട്ടുണ്ട്. കംപ്യൂട്ടര് എമര്ജന്സി റെസ്പോണ്സ് ടീം ഓഫ് ഇന്ത്യ ഈ ചോര്ച്ചയെക്കുറിച്ച് ഐസിഎംആറിന് വിവരം നല്കിയിട്ടുണ്ട്. നാഷണല് ഇന്ഫൊര്മാറ്റിക്സ് സെന്റര്, ഐസിഎംആര്, ആരോഗ്യമന്ത്രാലയം തുടങ്ങി വിവിധ സര്ക്കാര് ബോഡികളിലേക്ക് കോവിഡ് 19 വിവരങ്ങള് വ്യാപിച്ചു കിട്ക്കുന്നതിനാല് എവിടെ നിന്നുമാണ് വിവരം ചോര്ന്നതെന്ന് കണ്ടുപിടിക്കുക ഏറെ വെല്ലുവിളി നിറഞ്ഞ കാര്യമാണ്.
അതേസമയം ഇന്ത്യയിലെ ഏറ്റവും വലിയ മെഡിക്കല് ഇന്സ്റ്റിറ്റ്യൂട്ടില് നിന്നുള്ള ഈ ചോര്ച്ച ആദ്യമല്ല. ഈ വര്ഷം ആദ്യം എയിംസിന്റെ സെര്വര് സൈബര് ക്രിമിനലുകള് ഹാക്ക് ചെയ്തിരുന്നു. ഏതാനും മാസങ്ങള്ക്ക് മുമ്പ് 2022 ല് ഡല്ഹി എയിംസിന്റെ ഡേറ്റകള് ചൈനയിലെ ഒരു സ്ഥാപനം ഹാക്കു ചെയ്യുകയും 200 കോടിയുടെ ക്രിപ്റ്റോ കറന്സി ആവശ്യപ്പെടുകയും ചെയ്തു.
