ചെന്നൈ: എടിഎം വഴി പിന്വലിക്കാവുന്ന തുക വര്ദ്ധിപ്പിച്ചെങ്കിലും നോട്ട് നിരോധനത്തിന്റെ പ്രതിഫലനത്തില് നിന്നും മോചിതരാകാതെ ജനങ്ങള്. നോട്ട് നിരോധനത്തിന്റെ കാലാവധി കഴിഞ്ഞതോടെ എടിഎമ്മില് നിന്നും പണം പല തവണ പിന് വലിക്കേണ്ട വരുമ്പോള് ബാങ്കുകള് ഡെബിറ്റ് കാര്ഡുകള്ക്ക് ഈടാക്കുന്ന ട്രാന്സാക്ഷന് ഫീസും വീണ്ടും വരുന്നത് ഇടപാടുകാര്ക്ക് നാമ്പത്തിക നഷ്ടം ഉണ്ടാക്കുന്നു എന്നതാണ് ഇനി വരുന്ന പ്രധാന പ്രതിസന്ധി.
നോട്ട് അസാധുവാക്കലിന് പിന്നാലെ എടിഎം വഴി പണം പിന്വലിക്കാന് ട്രാന്സാക്ഷന് ഫീസ് ഈടാക്കരുതെന്ന സര്ക്കാര് നിര്ദേശം ഡിസംബര് 31 ന് അവസാനിച്ചിരുന്നു. ഇനി എടിഎം വഴി പണം പിന്വലിക്കുമ്പോള് ട്രാന്സാക്ഷന് ഫീ പഴയത് പോലെ ബാങ്കുകള് ഈടാക്കാന് തുടങ്ങുന്നത് ഇടപാടുകാര്ക്ക് നഷ്ടമായി മാറും. ഒരു ദിനം പരമാവധി പിന് വലിക്കാവുന്ന തുക 4000 രുപയാണ്. ആഴ്ചയിലെ പരിധി 24,000 രൂപയും. എടിഎം വഴി പണം ട്രാന്സാക്ഷന് നിരക്ക് കൂടാതെ പിന്വലിക്കാന് കഴിയുന്നതിന് മിക്ക ബാങ്കുകളും കൂടുതല് അവസരം നല്കുന്നില്ല.
നിശ്ചിത തവണ മാത്രം അവസരം നല്കിയ ശേഷം ബാക്കി കാര്ഡ് ഉപയോഗത്തിന് ഒരു ചെറിയ നിരക്ക് ഈടാക്കുന്നുണ്ട്. വീണ്ടും വീണ്ടും കാര്ഡ് ഉപയോഗിക്കേണ്ടി വരുമ്പോള് ഇടപാടുകാരന് പണനഷ്ടമുണ്ടാകും. സ്റ്റേറ്റ് ബാങ്ക് ഓഫ് ഇന്ത്യ പോശലയുള്ള ബാങ്കുകള് അഞ്ചു തവണയോളം ഈ അവസരം അനുവദിക്കുമ്പോള് മറ്റു ബാങ്കുകളുടെ കാര്യത്തില് കാര്ഡ് ഉപയോഗം അനുവദിക്കുക വെറും മൂന്നോ നാലോ തവണ മാത്രമാണ് താനും. രാജ്യം മുഴുവന് വ്യാപക നെറ്റ് വര്ക്കുള്ള സ്റ്റേറ്റ് ബാങ്ക് ഓഫ് ഇന്ത്യ, പഞ്ചാബ് നാഷണല് ബാങ്ക്, ഐസിഐസിഐ എന്നീ ബാങ്കുകള് നോട്ട് അസാധുവാക്കലിന് മുമ്പ് 15 രൂപയായിരുന്നു ട്രാന്സാക്ഷന് ഫീസ് ഈടാക്കിയിരുന്നത്. മറ്റ് മിക്ക ബാങ്കുകളും 20 രുപയും ഈടാക്കിയിരുന്നു.
