തൃശൂര്: നെഗറ്റീവ് എനര്ജി പുറന്തള്ളാന് തൃശൂര് ജില്ലാ ശിശു സംരക്ഷണ ഓഫീസില് പ്രാര്ഥന നടത്തിയെന്നു പരാതി. ജില്ലാ ശിശു സംരക്ഷണ ഓഫീസര്ക്കെതിരേയാണ് പരാതി ഉയര്ന്നത്. സംഭവത്തെക്കുറിച്ച് അന്വേഷിക്കാന് ജില്ലാ കലക്ടര് ഉത്തരവിട്ടു. സംഭവം അന്വേഷിക്കാന് സബ് കലക്ടറെയാണ് ചുമതലപ്പെടുത്തിയത്. തൃശൂരിലെ ജില്ലാ ശിശു സംരക്ഷണ ഓഫീസിലാണ് പ്രാര്ഥന നടന്നത്.
ജില്ലാ ശിശു സംരക്ഷണ ഓഫീസറാണ് ഇതിന് നേതൃത്വം നല്കിയത്. ആഴ്ചകള്ക്കുമുമ്പാണ് നെഗറ്റീവ് എനര്ജി പുറന്തള്ളാന് പ്രാര്ഥന നടത്തിയത്. ഓഫീസ് സമയം കഴിയുംമുമ്പ് വൈകിട്ട് നാലരയോടെയാണു സംഭവം. പെട്ടെന്നു വന്ന അറിയിപ്പ് ആയതിനാല് ഓഫീസര് പറയുന്നത് അനുസരിക്കാനേ ജീവനക്കാര്ക്കു കഴിഞ്ഞുള്ളൂ എന്നാണു വിവരം. ഓഫീസര് ഒഴികെയുള്ള ജീവനക്കാരെല്ലാവരും കരാര് വ്യവസ്ഥയില് ജോലി ചെയ്യുന്നവരായതിനാല് നിര്ദേശം ധിക്കരിക്കാനും പലര്ക്കും ധൈര്യം വന്നില്ല.
ഇതേ ഓഫീസിലുള്ള ചൈല്ഡ്ലൈന് പ്രവര്ത്തകര്ക്കും ഇതില് പങ്കെടുക്കേണ്ടി വന്നു. ചെല്ഡ്ലൈന് പ്രവര്ത്തകരില് ഒരാള് ളോഹയും ബൈബിളുമായെത്തി പ്രാര്ഥനയ്ക്കു നേതൃത്വം നല്കിയെന്നാണ് പരാതിയില് പറയുന്നത്. ഓഫീസിലുണ്ടായിരുന്ന വൈദിക വിദ്യാര്ഥിയുടെ നേതൃത്വത്തിലാണ് പ്രാര്ഥന നടന്നതെന്ന് ശിശു സംരക്ഷണ ഓഫീസര് ബിന്ദു പറയുന്നു.
ഓഫീസര് ചുമതലയേറ്റതുമുതല് ഓഫീസില് നെഗറ്റീവ് എനര്ജി ആണെന്ന് ആവര്ത്തിച്ചു പറഞ്ഞുകൊണ്ടിരുന്നു എന്നാണ് ആക്ഷേപം. ഓഫീസില് നിരന്തരം പ്രശ്നങ്ങളും പ്രതിസന്ധികളും ഉണ്ടാകുന്നത്് ഓഫീസിലെ നെഗറ്റീവ് എനര്ജി മൂലമാണെന്ന് ഓഫീസര് പറഞ്ഞു. തുടര്ന്നാണ് ചൈല്ഡ് ലൈന് പ്രവര്ത്തകരില് ഒരാളെ ളോഹ ധരിപ്പിച്ച് പ്രാര്ഥന നടത്തിയത്. ഓഫീസര്മാരുമായി ജീവനക്കാരില് പലര്ക്കും പ്രശ്നങ്ങളുണ്ടായിരുന്നു. ഓഫീസര് മാനസികമായി ബുദ്ധിമുട്ടുണ്ടാക്കിയെന്ന് ആരോപിച്ച് മൂന്നു ജീവനക്കാര് അടുത്തിടെ ജോലി രാജിവച്ചു.
പ്രാര്ഥനയെക്കുറിച്ച് മുഖ്യമന്ത്രി ഉള്പ്പെടെയുള്ളവര്ക്ക് പരാതി പോയിട്ടുണ്ടെങ്കിലും ഇതുവരെ വകുപ്പുതല അന്വേഷണം ഉണ്ടായിട്ടില്ല. വിഷയത്തില് കലക്ടര്ക്കും പരാതി നല്കിയിരുന്നു. തുടര്ന്നാണ് ഇപ്പോള് അന്വേഷണത്തിന് ഉത്തരവിട്ടിരിക്കുന്നത്. ആരോപണം അന്വേഷിച്ച് റിപ്പോര്ട്ട് നല്കാന് മന്ത്രി വീണാ ജോര്ജ് വനിത-ശിശു വികസന വകുപ്പ് ഡയറക്ടര്ക്ക് നിര്ദേശം നല്കിയിട്ടുണ്ടെന്നാണു വിവരം.
