ബംഗളൂരു: പീഡനത്തിന് ഇരയായ പെണ്കുട്ടി, പ്രതിയെ വിവാഹം കഴിക്കാന് ആഗ്രഹം അറിയിച്ചതിനെ തുടര്ന്ന് പ്രതിക്കെതിരെയുള്ള പീഡന കേസും പോക്സോ നിയമപ്രകാരമുള്ള കുറ്റങ്ങളും റദ്ദാക്കി കര്ണാടക ഹൈക്കോടതി. ഒരു മാസത്തിനകം വിവാഹം നടത്തണമെന്നും കോടതി ഉത്തരവിട്ടു. പീഡനത്തിനിരയായ പെണ്കുട്ടിക്ക് ഇപ്പോഴാണ് പ്രായപൂര്ത്തിയായത്.
ജസ്റ്റിസ് ഹേമന്ത് ചന്ദന് ഗൗഡര് ആണ് കേസ് പരിഗണിച്ചത്. ഇരയായ പെണ്കുട്ടിയും പിതാവും കോടതിയില് ഹാജരായി പ്രതിക്കെതിരായ നടപടിക്രമങ്ങള് റദ്ദാക്കുന്നതില് എതിര്പ്പില്ലെന്നു വ്യക്തമാക്കി സത്യവാങ്മൂലം സമര്പ്പിച്ചു.
തനിക്കിപ്പോള് പ്രായപൂര്ത്തിയായെന്നും പ്രതിയുമായി പ്രണയത്തിലാണെന്നും അയാളെ വിവാഹം കഴിച്ചു സന്തോഷകരമായ ദാമ്പത്യ ജീവിതം നയിക്കാന് ആഗ്രഹിക്കുന്നുവെന്നും അതിനു പ്രതി സമ്മിച്ചതായും പെണ്കുട്ടി സത്യവാങ്മൂലത്തില് പറയുന്നു. സത്യവാങ്മൂലത്തിലൂടെ, പ്രതിയെ വിവാഹം കഴിക്കാനുള്ള ആഗ്രഹം പ്രകടിപ്പിക്കുന്നതായും നിലവിലെ നടപടികള് റദ്ദാക്കുന്നതില് എതിര്പ്പില്ലെന്നും പെണ്കുട്ടി വ്യക്തമാക്കി.
പ്രതിയെയും കോടതിയില് ഹാജരാക്കിയിരുന്നു. പെണ്കുട്ടിയുമായി വിവാഹം കഴിക്കാന് തയാറാണെന്നു പ്രതിയും വ്യക്തമാക്കിയിട്ടുണ്ടെന്നും ഇരുവരും തമ്മിലുള്ള ലൈംഗികബന്ധം പരസ്പര സമ്മതത്തോടെയാണെന്നും കോടതി വിധിയില് ചൂണ്ടിക്കാട്ടി.
കേസില് വിചാരണ തുടരുന്നത് നിയമത്തിന്റെ ദുരുപയോഗമാകുമെന്ന് കോടതി പറഞ്ഞു. ഇരയായ പെണ്കുട്ടി പ്രതിയുമായി വിവാഹം കഴിക്കാന് ഉദ്ദേശിക്കുന്നു. ക്രിമിനല് നടപടികള് തുടരാന് അനുവദിച്ചാല്, അത് പ്രതിയെ തടവിലാക്കുന്നതിന് കാരണമാകുമെന്നും കോടതി വ്യക്തമാക്കി.
