കോട്ടയം: നവകേരള സദസിന്റെ യാത്രയ്ക്കിടെ മുഖ്യമന്ത്രിയെ കരിങ്കൊടി കാട്ടാനുളള യൂത്ത് കോണ്ഗ്രസിന്റെ തീരുമാനത്തെ ചെറുക്കാന് യൂത്ത് കോണ്ഗ്രസ് തെരഞ്ഞെടുപ്പുമായി ബന്ധപ്പെട്ട വ്യാജരേഖ കേസ് സജീവമാക്കാന് ആഭ്യന്തരവകുപ്പിന്റെ തീരുമാനം. യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില് അടക്കമുളള നേതാക്കളെ അന്വേഷണത്തിന്റെ ഭാഗമായി വിളിച്ചുവരുത്തും. രാഹുല് മാങ്കൂട്ടത്തിലിനോട് 25 നു ഹാജരാകണമെന്നാവശ്യപ്പെട്ട് മ്യൂസിയം പോലീസ് നോട്ടീസ് അയച്ചിട്ടുണ്ട്.
വ്യാജ രേഖ തിരിച്ചറിയല് കാര്ഡ് വിഷയത്തില് ഇതിനോടകം നാലു യൂത്ത് കോണ്ഗ്രസ് നേതാക്കളെ പോലീസ് കസ്റ്റഡിയിലെടുത്തിട്ടുണ്ട്. ഇതിന് പുറമേയാണ് കൂടുതല് നേതാക്കളെ പ്രതി ചേര്ക്കുന്നതിനുളള നീക്കം ആഭ്യന്തരവകുപ്പ് ആരംഭിച്ചത്. മുഖ്യമന്ത്രിയുടെ നവകേരള സദസ് തീരുന്നതുവരെ വ്യാജരേഖ കേസ് സജീവമായി നിലനിര്ത്താനാണ് തീരുമാനം. കഴിഞ്ഞ ദിവസം സി.പി.എമ്മിന്റെ ശക്തികേന്ദ്രമായ കല്ല്യാശേരിയില് മുഖ്യമന്ത്രിയെ യൂത്ത് കോണ്ഗ്രസ് പ്രവര്ത്തകര് കരിങ്കൊടി കാട്ടിയത് സി.പി.എം. നേതൃത്വത്തെ വല്ലാതെ പ്രകോപിപ്പിച്ചിട്ടുണ്ട്.
ഇതേത്തുടര്ന്നാണ് കരിങ്കൊടി കാട്ടിയ യൂത്ത് കോണ്ഗ്രസ് പ്രവര്ത്തകരെ ഡി.െവെ.എഫ്.ഐ. പ്രവര്ത്തകര് ക്രൂരമായി മര്ദിച്ചിട്ടും മുഖ്യമന്ത്രി അടക്കമുള്ളവര് തള്ളിപ്പറയാന് കൂട്ടാക്കാതിരുന്നത്. പാര്ട്ടിക്ക് ഏറ്റവും ശക്തമായ സ്വാധീനമുള്ള കല്ല്യശേരിയില് മുഖ്യമന്ത്രിയെ കരിങ്കൊടി കാട്ടിയ സാഹചര്യത്തില് മറ്റ് സ്ഥലങ്ങളിലും കരിങ്കൊടി പ്രകടനം പോലീസ് പ്രതീഷിക്കുന്നുണ്ട്.
സംസ്ഥാന സ്പെഷല് ബ്രാഞ്ചും ഇതു സംബന്ധിച്ച് മുന്നറിയിപ്പു നല്കിയിട്ടുണ്ട്. ഈ സാഹചര്യത്തില് യൂത്ത് കോണ്ഗ്രസിനെതിരേ കിട്ടിയ വ്യജരേഖ ചമയ്ക്കല് കേസ് ഫലപ്രദമായി ഉപയോഗിക്കാനാണ് അന്വേഷണസംഘത്തിനു ലഭിച്ചിരിക്കുന്ന നിര്ദേശം. കൂടുതല് നേതാക്കളെ പ്രതിചേര്ക്കാന് കഴിഞ്ഞാല് മുഖ്യമന്ത്രിക്കെതിരേ കരിങ്കൊടി കാട്ടാന് സാധ്യതയുളളവരുടെ എണ്ണം കുറയുമെന്ന് പോലീസും കണക്കുകൂട്ടുന്നു.
വ്യാജരേഖ ചമയ്ക്കലുമായി ബന്ധപ്പെട്ട് മിക്ക ജില്ലകളില് നിന്നും പരാതി ഉയര്ന്നിട്ടുണ്ട്. യൂത്ത് കോണ്ഗ്രസ് പ്രവര്ത്തകരേക്കാള് ഡി.െവെ.എഫ്.ഐ, ബി.ജെ.പി. പ്രവര്ത്തകരാണ് പരാതിക്കാരില് ഏറെയെന്നതാണ് വിചിത്രം. ഇന്നലെ കസ്റ്റഡിയിലെടുത്തവരില് നിന്നു വ്യാജ തിരിച്ചറിയല് രേഖകള് കണ്ടെടുത്തിട്ടുണ്ടെന്നാണ് ലഭിക്കുന്ന വിവരം ഇവരുടെ മൊെബെല് ഫോണുകള് അടക്കം പിടിച്ചെടുത്തിട്ടുണ്ട്. ഇവരെല്ലാം തന്നെ പ്രമുഖ യൂത്ത് കോണ്ഗ്രസ് നേതാക്കളുമായി സ്ഥിരമായി ആശയവിനിമയം നടത്തിവരുന്നവരാണ്.
ഈ കാരണം ചൂണ്ടിക്കാട്ടിത്തന്നെ യൂത്ത് കോണ്ഗ്രസിന്റെ പ്രമുഖ നേതാക്കളെയെല്ലാം ചോദ്യം ചെയ്യാന് വിളിപ്പിക്കാന് കഴിയും. തിരുവനന്തപുരം ഡി.സി.പി: നിഥിന് രാജിന്റെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്. അന്വേഷണം വിപുലമാക്കുന്നതിന്റെ ഭാഗമായി കേസ് ക്രൈംബ്രാഞ്ചിന് െകെമാറാനുള്ള സാധ്യതയും വളരെയേറെയാണ്.
