അടിമാലി: നീതിക്കായുളള ഉറച്ച പോരാട്ടങ്ങള്ക്കൊടുവില് 77 വയസുള്ള മറിയക്കുട്ടി എന്ന 'മജിസ്ട്രേറ്റ്' മറിയക്കുട്ടിയെ തേടി പുരസ്കാരവും എത്തി. അനീതിക്കെതിരെ ഗാന്ധിയന് മാര്ഗത്തില് പോരാടുന്ന അടിമാലിയിലെ സീനിയര് സിറ്റിസണ് മന്നാംകണ്ടം പൊന്നെടുത്തുപാറ മറിയക്കുട്ടി ചാക്കോയെ മഹാത്മാഗാന്ധി നാഷണല് ഫൗണ്ടേഷനാണ് പുരസ്കാരത്തിന് തെരഞ്ഞെടുത്തത്.
ഫൗണ്ടേഷന് ഏര്പ്പെടുത്തിയ ശ്രേഷ്ഠകര്മ്മ പുരസ്ക്കാരം ഫൗണ്ടേഷന് ചെയര്മാന് എബി ജെ. ജോസ് സമ്മാനിച്ചു. ഇന്നലെ ഇവരുടെ വീട്ടിലെത്തിയാണ് പുരസ്കാരം സമ്മാനിച്ചത്. മാതൃകാപരമായ സമരമാര്ഗത്തിലൂടെ അധികാരികള്ക്കു മുന്നിലെത്തിക്കാന് മറിയക്കുട്ടി ചാക്കോയ്ക്കു സാധിച്ചെന്ന് അദ്ദേഹം പറഞ്ഞു. അക്രമസമരങ്ങളുടെ കാലഘട്ടത്തില് ഗാന്ധിയന് സമരപാതയുടെ പ്രസക്തി ബോധ്യപ്പെടുത്തുന്ന മാതൃകാപരമായ പോരാട്ടമാണ് നയിക്കുന്നതെന്നും എബി ജെ. ജോസ് ചൂണ്ടിക്കാട്ടി. ഫൗണ്ടേഷന് ജനറല് സെക്രട്ടറി സാംജി പഴേപറമ്പില് അധ്യക്ഷത വഹിച്ചു.
ചലച്ചിത്രതാരം ബിന്ദു എല്സ തോമസ്, ബിനു പെരുമന, അനില് മാത്യു എന്നിവര് പങ്കെടുത്തു. ശില്പവും പൊന്നാടയും അടങ്ങുന്നതാണ് ശ്രേഷ്ഠകര്മ്മ അവാര്ഡ്. ചടങ്ങില് പങ്കെടുക്കാന് കഴിയാതിരുന്ന അന്നമ്മ ഔസേപ്പിനുള്ള പുരസ്കാരം മറിയക്കുട്ടി ചാക്കോ ഏറ്റുവാങ്ങി. പതിറ്റാണ്ടുകളായി കണ്മുമ്പിലുണ്ടാകുന്ന അനീതികള്ക്കെതിരെ തനിച്ച് പോരാടുന്ന രീതിയായിരുന്നു മറിയക്കുട്ടിക്ക്.
മുഖം നോക്കാതെ സാക്ഷി പറയാനും മറിയക്കുട്ടി ജാഗ്രത പുലര്ത്തിയിരുന്നു. ഒടുവില് നാട്ടുകാര് സമ്മാനിച്ച പേരാണ് മജിസ്ട്രേറ്റ് മറിയക്കുട്ടി എന്നത്. ഇത് അഭിമാനത്താേടെ മറിയക്കുട്ടി സ്വീകരിക്കുകയും ചെയ്തു. അഞ്ചുമാസമായി പെന്ഷന് ലഭിക്കാതായതോടെ മറിയക്കുട്ടിയും പൊളിഞ്ഞപാലം സ്വദേശിനി അന്നമ്മയും ചേര്ന്ന് പിച്ചച്ചട്ടിയെടുത്ത് പൊതുസമൂഹത്തില് ഭിക്ഷയെടുത്തു പ്രതിഷേധിച്ചിരുന്നു. ഇത് വ്യാപകമായി ചര്ച്ചാ വിഷയമായിരുന്നു.
