കോഴിക്കോട് : നവകേരള സദസ്സില് ആവര്ത്തിച്ച് കേള്ക്കുന്ന ഈ പൗരപ്രമുഖര് എന്ന പദം വലിയ വിമര്ശനത്തിന് കാരണമായിരിക്കെ വിശദീകാരണവുമായി സിപിഎം നേതാവ് എ.കെ. ബാലന്. നവകേരളാ സദസ്സില് മുഖ്യമന്ത്രി കാണുന്നത് പൗര പ്രമുഖരെയല്ലെന്നും പ്രത്യേക ക്ഷണിതാക്കളെയാണെന്നും സിപിഎം കേന്ദ്രക്കമ്മറ്റിയംഗം പറഞ്ഞു. ഒരു ചാനലിന് നല്കിയ അഭിമുഖ പരിപാടിയിലായിരുന്നു പ്രതികരണം.
തങ്ങളെക്കൂടി വിളിക്കാന് ആവശ്യപ്പെട്ട് എംഎല്എ യ്ക്കോ കളക്ടര്ക്കോ കത്തുനല്കിയാല് മതിയെന്നും ഈ അപേക്ഷ നല്കി ആര്ക്കും പ്രത്യേകക്ഷണിതാവായി മാറാമെന്നും പറഞ്ഞു. മുഖ്യമന്ത്രിയെ കരിങ്കാടി കാണിച്ചവരെ ഡിവൈഎഫ്ഐ പ്രവര്ത്തകര് മര്ദ്ദിച്ചതിനെ ന്യായീകരിച്ച മുഖ്യമന്ത്രിയുടെ നടപടിയെയും എ.കെ. ബാലന് പിന്തുണച്ചു. റോഡിലേക്ക് ചാവേറുകളായി ഇറങ്ങുന്നവര്ക്കുള്ള ശക്തമായ താക്കീതാണ് അതെന്നും മുഖ്യമന്ത്രി സ്വീകരിച്ചത് ശരിയായ നടപടിയാണെന്നുമായിരുന്നു എകെ ബാലന്റെ അഭിപ്രായം.
നേരത്തേ യൂത്ത് കോണ്ഗ്രസുകാര്ക്ക് നേരെയുണ്ടായ ആക്രമണത്തെ ഡിവൈഎഫ്ഐ യുടെ മാതൃകാ രക്ഷാപ്രവര്ത്തനം എന്നായിരുന്നു മുഖ്യമന്ത്രി നടത്തിയ പ്രതികരണം. അതേസമയം ഈ പ്രതികരണത്തെയും ഡിവൈഎഫ്ഐ നടപടിയെ മുഖ്യമന്ത്രി ന്യായീകരിച്ചതിനും എതിരേ രൂക്ഷ പ്രതികരണമാണ് പ്രതിപക്ഷവും നടത്തുന്നത്. ഈ കേസില് മുഖ്യമന്ത്രിക്കെതിരേ നിയമനടപടിക്കൊരുങ്ങുകയാണ് കോണ്ഗ്രസ്.
മര്ദനസംഭവത്തില് മുഖ്യമന്ത്രിയുടെ ന്യായീകരണം കലാപാഹ്വാനമാണെന്നും ഒരു നിമിഷം കസേരയിലിരിക്കാന് മുഖ്യമന്ത്രി യോഗ്യനല്ലെന്നുമാണ് പ്രതിപക്ഷ നേതാവ് കഴിഞ്ഞ ദിവസം വാര്ത്താസമ്മേളനത്തില് പറഞ്ഞത്.
മന്ത്രിമാര് 44 ദിവസം ഓഫീസില് ഇല്ല. ഇക്കാലത്ത് ഇങ്ങനെ പത്ത് ദിവസം ഓഫീസില്നിന്ന് മാറി നില്ക്കാന് പറ്റുമോ? രാവിലത്തെ പ്രഭാതഭക്ഷണത്തിന് വിളിച്ചാല് പോകണം, കുറച്ച് പേര്ക്ക് സ്റ്റേജില് ഇരിക്കാം. ബാക്കിയുള്ള മന്ത്രിമാര്ക്ക് എന്താണു ജോലി. മ്യൂസിയത്തില് വയ്ക്കാന് പോകുന്ന ബസില് മുഖ്യമന്ത്രിക്കൊപ്പം യാത്ര ചെയ്യുക. ഒരു പുതിയ നടപടിയും സര്ക്കാര് സ്വീകരിക്കുന്നില്ല.- വി.ഡി. സതീശന് പറഞ്ഞു.
