കൊച്ചി: കരുവന്നൂര് സഹകരണ ബാങ്ക് തട്ടിപ്പില് സി.പി.എം. നേതാക്കള്ക്കെതിരായ പി.ആര്. അരവിന്ദാക്ഷന്റെ മൊഴിയുടെ പകര്പ്പ് പുറത്ത്. മുന്മന്ത്രി എ.സി. മൊയ്തീന്, മുന് എം.പി. പി.കെ. ബിജു എന്നിവര്ക്കു കരുവന്നൂര് കേസിലെ മുഖ്യപ്രതിയായ സതീഷ് കുമാര് പണം നല്കിയിരുന്നെന്നാണു മൊഴിയിലുള്ളത്. കേസില് അറസ്റ്റിലാകുന്നതിനു മുമ്പുതന്നെ അരവിന്ദാക്ഷന് നേതാക്കള്ക്കെതിരേ സ്വന്തം കൈപ്പടയില് എഴുതി നല്കിയ മൊഴി പകര്പ്പിലാണ് ഇക്കാര്യം പറയുന്നത്.
2016, 2021 നിയമസഭാ തെരഞ്ഞെടുപ്പില് എ.സി. മൊയ്തീനു സതീഷ് കുമാര് പണം നല്കിയിരുന്നെന്നാണു മൊഴിയിലുള്ളത്. 2016 ല് മാത്രം രണ്ടുലക്ഷം രൂപ മൊയ്തീനു സതീഷ് കുമാര് നല്കി. പിന്നീട് തൃശൂരില് കര്ഷക സംഘടനയുമായി ബന്ധപ്പെട്ട അഖിലേന്ത്യാ സമ്മേളനം നടന്ന സമയത്തും മൊയ്തീനു സതീഷ് പണം നല്കി. പി.കെ. ബിജുവിനു 2020 ല് താന് ഇടപെട്ടാണ് അഞ്ചുലക്ഷം രൂപ വാങ്ങി നല്കിയതെന്നും ഈ പണം കൈമാറിയതു മുഖ്യപ്രതി സതീഷ്കുമാറിന്റെ സഹോദരന്റെ അക്കൗണ്ടില്നിന്നാണെന്നും മൊഴിയിലുണ്ട്.
ഇതിനുപുറമേ എല്.ഡി.എഫ്. കണ്വീനര് ഇ.പി. ജയരാജന് തൃശൂരിലെത്തുമ്പോള് സതീഷ് കുമാറിനെ കാണാറുണ്ടെന്നും മൊഴിയിലുണ്ട്. ഇ.പിയെ കാണാന് പോകുന്ന ഘട്ടങ്ങളില് തന്നെ മുറിക്കു പുറത്തു നിര്ത്തിയാണു കൂടിക്കാഴ്ചകള്. അതിനാല് അവര് തമ്മില് സംസാരിച്ച കാര്യങ്ങളൊന്നും അറിയില്ലെന്നും മൊഴിയിലുണ്ട്. കരുവന്നൂര് കേസുമായി ബന്ധപ്പെട്ടു വിജിലന്സ് അന്വേഷണം നടന്ന ഘട്ടത്തില് ഉന്നത പോലീസ് ഉദ്യോഗസ്ഥരുമായി സതീഷ് കുമാര് ബന്ധമുണ്ടാക്കിയെന്നും അന്നു ഡിവൈ.എസ്.പിയായിരുന്ന ആന്റണിയെ താനും സതീഷ് കുമാറും നേരിട്ടുപോയി കണ്ടിരുന്നെന്നും അരവിന്ദാക്ഷന് വെളിപ്പെടുത്തി. തൃശൂരിലെ സി.പി.എമ്മിന്റെ സംസ്ഥാന സമിതി അഗം കൂടിയായ എം.കെ. കണ്ണനുമായും അടുത്ത ബന്ധം സതീഷ് കുമാറിനുണ്ടെന്നും അരവിന്ദാക്ഷന്റെ മൊഴിലുണ്ട്.
സി.പി.എം. നേതാക്കളുടെ പേരുകള് അരവിന്ദാക്ഷന് വെളിപ്പെടുത്തിയെന്ന കാര്യം ഇ.ഡി. നേരത്തെ പ്രത്യേക കോടതിയില് പറഞ്ഞിരുന്നു. ഇതുസംബന്ധിച്ചു കഴിഞ്ഞ സെപ്റ്റംബര് 14 ന് അരവിന്ദാക്ഷന് നല്കിയ മൊഴി പകര്പ്പാണ് ഇപ്പോള് പുറത്തുവന്നത്. നേതാക്കള്ക്കെതിരായ ഈ മൊഴി എഴുതി നല്കിയശേഷമാണ് അന്ന് അരവിന്ദാക്ഷന് ഇ.ഡിക്കെതിരേ പരാതിയുമായി രംഗത്തെത്തിയിരുന്നതെന്നും ശ്രദ്ധേയം. ഇ.ഡി. തന്നെക്കൊണ്ട് നേതാക്കളുടെ പേരു പറയാന് നിര്ബന്ധിക്കുന്നെന്നും തന്നെ ദേഹോപദ്രവം ചെയ്തുവെന്നുമായിരുന്നു അരവിന്ദാക്ഷന്റെ പരാതി.
