നാഗ്പൂര്: പത്തുവര്ഷം മുമ്പ് ഒരു ജോഡി ബാറ്റിംഗ് ഗ്ളൗസ് പോലും വാങ്ങാന് മാര്ഗ്ഗമില്ലാത്തയാളായിരുന്നു ശുഭം ദുബേ. നഗരത്തിലെ കമല് സ്ക്വയറില് പാന് കട നടത്തി കിട്ടുന്ന വരുമാനം കൊണ്ട് പിതാവ് ബദ്രി പ്രസാദ് രണ്ടറ്റവും കൂട്ടിമുട്ടിക്കാന് നന്നേ പാടുപെട്ടു. എന്നാല് ചൊവ്വാഴ്ച ഇന്ത്യന് ക്രിക്കറ്റിലെ ഈ തകര്പ്പനടിക്കാരന്റെ കഴിവിനെ തേടി ഭാഗ്യം വന്നു. ഐപിഎല് താരലേലത്തില് 5.80 കോടിക്കാണ് രാജസ്ഥാന് റോയല്സ് താരത്തെ അടുത്ത സീസണിലേക്ക് സ്വന്തമാക്കിയത്.
താരത്തിന്റെ കുടുംബാംഗങ്ങള് ഒന്നടങ്കം ഞെട്ടിയിരിക്കുകയാണ്. കുടുംബത്തില് ആര്ക്കും ഇപ്പോഴും വാര്ത്ത വിശ്വസിക്കാന് കഴിഞ്ഞിട്ടില്ല. അതേസമയം സയ്യദ് മുസ്താഖ് അലി ട്രോഫിയില് കാഴ്ച വെച്ച പ്രകടനം മൂലം ലേലത്തില് തന്നെ ആരെങ്കിലും വാങ്ങുമെന്ന് പ്രതീക്ഷയുണ്ടായിരുന്നതായി താരം പറയുന്നു. എന്നാല് ഇത്രയും വലിയ തുകയ്ക്ക് താന് വിറ്റുപോകുമെന്ന് ഓര്ത്തില്ലെന്നും താരം പറയുന്നു. ചൊവ്വാഴ്ച താരം ലേലത്തില് പോയതിന് പിന്നാലെ കമാല് സ്ക്വയറിലെ വീട്ടിലേക്ക് അഭിനന്ദന പ്രവാഹമാണ്.
ഐപിഎല്ലില് താരത്തിന്റെ അടിസ്ഥാനവില 20 ലക്ഷം രൂപയായിരുന്നു. അതേസമയം താരത്തിന്റെ കഴിവിന് കിട്ടിയ അംഗീകാരമായിരുന്നു ഈ തുക. 27 കാരനായ താരം കഴിഞ്ഞ ഏഴു മത്സരങ്ങളില് നിന്നായി അടിച്ചു കൂട്ടിയത് 222 റണ്സായിരുന്നു. 187.28 ആയിരുന്നു സ്ട്രൈക്ക് റേറ്റ്. ഏഴൂ മത്സരങ്ങളില് 10 ബൗണ്ടറികളും 18 സിക്സറുകളും ദുബേ നേടി. ഈ ഇടം കയ്യന് വിദര്ഭയ്ക്ക് വേണ്ടി 18 പന്തുകളില് നിന്നും വേഗമേറിയ ടി20 അര്ദ്ധശതകവും നേടി. തൊട്ടടുത്ത മത്സരത്തില് 20 പന്തുകളില് നിന്നും പുറത്താകാതെ 58 റണ്സ് ബംഗാളിനെതിരേയും അടിച്ചുകൂട്ടി. മൂന്ന് ബൗണ്ടറികളും ആറു സിക്സറുകളുമായിരുന്നു പറന്നത്.
അങ്ങേയറ്റം ദുഷ്ക്കരമായ സാഹചര്യത്തില് നിന്നും സാമ്പത്തീക പ്രതിസന്ധിയില് നിന്നുമാണ് ദുബേ നേട്ടത്തിലേക്ക് കുതിച്ചുയര്ന്നത്. സാമ്പത്തീക പ്രതിസന്ധി മോശമായിരുന്ന സാഹചര്യത്തില് തന്നെ തുണച്ചത് സുദീപ് ആയിരുന്നെന്നുഗ അദ്ദേഹത്തിന്റെ പിന്തുണ ഇല്ലായിരുന്നെങ്കില് താന് എങ്ങുമെത്തില്ലായിരുന്നെന്നും താരം തന്റെ മെന്ററായ സുദീപ് ജെയ്സ്വാളിനെക്കുറിച്ച് പറയുന്നു. അഡ്വേക്കറ്റ് ഇലവന് എന്ന ക്ലബ്ബ് നടത്തുന്ന അഭിഭാഷകാനാണ് സുദീപ്. സാമ്പത്തീകമായി പിന്നോക്കം നില്ക്കുന്ന പ്രതിഭകളെ കണ്ടെത്തുകയും സഹായിക്കുകയും ചെയ്യുന്ന ക്ലബ്ബാണ് ഇത്.
ഒരുകാലത്ത് ഒരു ജോഡ് ഗ്ളൗസ് വാങ്ങാന് പോലും മാര്ഗ്ഗമുണ്ടായിരുന്നില്ല. അദ്ദേഹമാണ് തനിക്ക് ആദ്യമായി ഒരു ബാറ്റ് ഉള്പ്പെടുന്ന കിറ്റ് നല്കിയത്. അദ്ദേഹം തനിക്ക് അണ്ടര് 19, അണ്ടര് 23, എ ഡിവിഷന് ടീമുകളില് കളിക്കാന് അവസരം നല്കി. അദ്ദേഹത്തിന്റെ സഹായം ഇല്ലായിരുന്നെങ്കില് തനിക്ക് വിദര്ഭ ടീമിനൊപ്പം കളിക്കാന് കഴിയുമായിരുന്നില്ല. അതിനൊപ്പം ടെന്നീസ്ബോള് ക്രിക്കറ്റില് തനിക്ക് പരിശീലനം നല്കിയ ബാല്യകാല പരിശീലകന് രോഹിത് കേസര്വാറിനോടും താരം നന്ദി പറയുന്നു. ദുബേയ്ക്കൊപ്പം ആറു വിദര്ഭ താരങ്ങള്ക്കാണ് ഐപിഎല്ലല് അവസരം കിട്ടിയത്. ഉമേഷ് യാദവ്, ദര്ശന് നല്കാണ്ടേ എന്നിവര്ക്ക് ഗുജറാത്ത് ടൈറ്റന്സ് അവസരം നല്കി. ജിതേഷ് ശര്മ്മ, അഥര്വ ടൈഡേ എന്നിവര്ക്ക് കിംഗ് ഇലവന് പഞ്ചാബും യാശ് ഠാക്കൂറിനെ ലക്നൗ സൂപ്പര്ജയന്റും ടീമില് എടുത്തു.
