ഒഡീഷയിലെ പ്രശസ്തമായ പുരി ജഗന്നാഥ ക്ഷേത്രത്തില് യുട്യൂബര് കയറിയത് വന് വിവാദമായി മാറിയത് കഴിഞ്ഞ മാസമായിരുന്നു. ഇതിന് പിന്നാലെ ക്ഷേത്രത്തില് കയറാനുള്ള കൃത്യമായ ഡ്രസ്കോഡ് നിര്ണ്ണയിച്ച് അധികൃതര്. ഭക്തര്ക്ക് ക്ഷേത്രത്തില് പ്രവേശിക്കുന്നതിന് 'മാന്യമായ വസ്ത്രങ്ങള്' ധരിക്കണമെന്നാണ് പുതിയ നിര്ദേശം. ക്ഷേത്രത്തില് ഹാഫ് പാന്റ്സ്, ഷോര്ട്ട്സ്, കീറിപ്പോയ ജീന്സ്, പാവാട, സ്ലീവ്ലെസ് വസ്ത്രങ്ങള് എന്നിവ ധരിച്ച ആളുകള്ക്ക് പ്രവേശനം അനുവദിക്കില്ലെന്ന് പുതിയ നിയമം അനുശാസിക്കുന്നത്.
പുതിയ നിയമം പ്രാബല്യത്തില് വന്നതോടെ, 12-ാം നൂറ്റാണ്ടിലെ ആരാധനാലയത്തില് പുരുഷന്മാര് 'മുണ്ടോ' 'ഗംചകളോ' ഒക്കെ ധരിച്ചേ പ്രവേശിക്കാന് അനുവദിക്കു. സ്ത്രീകള്ക്ക് സാരിയോ സല്വാര് കമ്മീസോ ധരിക്കാം. ഭൂരിഭാഗം ഭക്തരും ക്ഷേത്രത്തിലേക്ക് വരുന്നതിന് മുമ്പായി വസ്ത്രധാരണത്തെക്കുറിച്ച് ജനങ്ങളെ ബോധവത്കരിക്കണമെന്ന് ക്ഷേത്രത്തിന് സമീപത്തെ ഹോട്ടലുകളോട് ആവശ്യപ്പെട്ടിട്ടുണ്ട്. അതുപോലെ തന്നെ ക്ഷേത്രത്തിനുള്ളില് ഗുഡ്ഖയും പാന് ചവയ്ക്കുന്നതും പ്ലാസ്റ്റിക് ബാഗുകളുടെ ഉപയോഗവും നിരോധിച്ചിട്ടുണ്ട്.
പുതുവത്സര ദിനത്തില് ഏകദേശം 3.5 ലക്ഷത്തോളം ആളുകളാണ് ക്ഷേത്രത്തിലെത്തിയത്. തിരക്ക് കൈകാര്യം ചെയ്യുന്നതിനായി പുലര്ച്ചെ 1.40 ന് തന്നെ ക്ഷേത്രം തുറന്നു. കഴിഞ്ഞ വര്ഷത്തെ അപേക്ഷിച്ച് ഇത്തവണ പുതുവത്സര ദിനത്തില് ക്ഷേത്ര ദര്ശനത്തിനെത്തിയ ഭക്തരുടെ എണ്ണം ഇരട്ടിയായതായി പോലീസ് പറഞ്ഞു.
