കരൂര്‍: ലോകം മുഴുവന്‍ ഏറെ ആരാധകരുടെ കെ. പോപ്പ് ടീം ബിടിഎസിന്റെ പരിപാടി കാണാന്‍ തമിഴ്‌നാട്ടില്‍ നിന്നും മൂന്ന് എട്ടാംക്ലാസ്സുകാരികള്‍ വീടുവിട്ടിറങ്ങി. ദക്ഷിണകൊറിയയില്‍ നടക്കുന്ന പരിപാടി കാണാന്‍ വേണ്ടിയായിരുന്നു ഇവര്‍ പോയത്. എന്നാല്‍ പോലീസ് പിന്നീട് കണ്ടെത്തി മൂന്ന് പേരെയും രക്ഷപ്പെടുത്തി. ജനുവരി 4 നായിരുന്നു ഇവര്‍ ബിടിഎസിന്റെ പരിപാടി കാണാന്‍ പോയത്.
വളരെ പ്രചാരമുള്ള കൊറിയന്‍ പോപ്പ് ബാന്‍ഡായ ബിടിഎസിന്റെ ആരാധകരായ മൂന്ന് പെണ്‍കുട്ടികള്‍ ജനുവരി 4 ന് താന്തോണിമലയിലെ സ്‌കൂളിലേക്ക് പോയിരുന്നു, പക്ഷേ മടങ്ങിവന്നില്ല. കരൂര്‍ ജില്ലയിലെ ഒരു സര്‍ക്കാര്‍ സ്‌കൂളിലാണ് ഇവര്‍ പഠിക്കുന്നത്. ഇവര്‍ സ്‌കൂളില്‍ ഇല്ലാത്ത വിവരം അധ്യാപകര്‍ അറിയിച്ചതോടെയാണ് സംഭവം പുറത്തറിഞ്ഞത്. മാതാപിതാക്കള്‍ ഉടന്‍ പോലീസില്‍ പരാതി നല്‍കി.
വീട്ടുകാരുടെ പരാതിയുടെ അടിസ്ഥാനത്തില്‍ പോലീസ് തെരച്ചില്‍ ആരംഭിക്കുകയും ബസ് സ്‌റ്റോപ്പുകളിലെയും ശറയില്‍വേ സ്‌റ്റേഷനിലെയും മറ്റും സിസിടിവി ദൃശ്യങ്ങള്‍ പരിശോധിക്കുകയും മറ്റും ചെയ്ത പോലീസ് രണ്ടു ടീമായി തിരിഞ്ഞ് അന്വേഷണവും ആരംഭിച്ചു. തെരച്ചിലിനിടയില്‍ ഇവരെ കാരുര്‍ റെയില്‍വേ സ്‌റ്റേഷനില്‍ നിന്നും ട്രെയിന്‍ കയറിയ നിലയില്‍ കാണപ്പെട്ടു.തുടര്‍ന്ന് പോലീസ് എല്ലാ റെയില്‍വേ സ്‌റ്റേഷനിലേക്കും സന്ദേശം അയയ്ക്കുകയും പെണ്‍കുട്ടികളെ ട്രാക്ക് ചെയ്യുകയുമായിരുന്നു. പിന്നീട് കറ്റ്പാടി റെയില്‍വേ സ്‌റ്റേഷനില്‍ നിന്നും പോലീസ് പിടികൂടുകയായിരുന്നു.
മാതാപിതാക്കളുടെ സ്മാര്‍ട്ട്ഫോണില്‍ ബിടിഎസ് സംഗീത പ്രകടനം കണ്ടിരുന്നുവെന്നും അതിനുശേഷം തങ്ങളുടെ ഇഷ്ടതാരങ്ങളുടെ കച്ചേരി കാണാന്‍ തീരുമാനിക്കുകയും വീട്ടില്‍ നിന്ന് കൊറിയയിലേക്ക് പോകാന്‍ തീരുമാനിക്കുകയുമായിരുന്നെന്ന് പെണ്‍കുട്ടികള്‍ പോലീസിനോട് പറഞ്ഞു. മൂവരും പണവുമായി വീട്ടില്‍ നിന്ന് ഓടിപ്പോയത്. പണം ചെലവഴിച്ചതായി റിപ്പോര്‍ട്ടുണ്ട്. എന്നാല്‍ കയ്യിലിരുന്ന പണംകൊണ്ട് കൊറിയയില്‍ എത്താന്‍ കഴിയില്ലെന്ന് അവര്‍ പിന്നീട് മനസ്സിലാക്കുകയും കരൂരിലേക്ക് മടങ്ങാന്‍ തീരുമാനിക്കുകയും ചെയ്തു.
കാട്പാടി ജംക്ഷനില്‍ ഭക്ഷണം കഴിക്കാന്‍ ഇറങ്ങിയ ഇവര്‍ ട്രെയിന്‍ തെറ്റി ഒറ്റപ്പെട്ടു. പെണ്‍കുട്ടികളെ നഷ്ടപ്പെട്ടതായി മനസ്സിലാക്കിയ യാത്രക്കാര്‍ പോലീസില്‍ വിവരമറിയിക്കുകയും അവരെ രക്ഷപ്പെടുത്തുകയും ചെയ്തു. തുടര്‍ന്ന് പെണ്‍കുട്ടികളെ ജില്ലാ ഉദ്യോഗസ്ഥര്‍ക്ക് മുന്നില്‍ ഹാജരാക്കി കൗണ്‍സിലിങ്ങിന് വിധേയമാക്കാന്‍ ചില്‍ഡ്രന്‍സ് ഹോമിലേക്ക് അയച്ച ശേഷം രക്ഷിതാക്കള്‍ക്ക് കൈമാറി.
Comments