തിരുവനന്തപുരം: മലിനീകരണം കുറയ്ക്കുക ലക്ഷ്യമിട്ട് നിരത്തലിറക്കിയ ഇലക്ട്രിക് ബസുകള് കൃത്യമായി സംരക്ഷിക്കാനും പരിപാലിക്കാനും കെഎസ്ആര്ടിസി സംവിധാനം ഒരുക്കണമെന്ന് വട്ടിയൂര്കാവ് എംഎല്എ വി.കെ. പ്രശാന്ത്.
മലിനീകരണം കുറയ്ക്കാനും തിരുവനന്തപരും സോളാര് നഗരമാക്കാനും നയപരമായി തീരുമാനിച്ച് നിരത്തിലിറക്കിയ ഇലക്ട്രിക് ബസുകള് നഗരവാസികള് ഇതിനോടകം സ്വീകരിച്ചിട്ടുണ്ടെന്നും ലാഭകരമാക്കാനുള്ള പദ്ധതികളാണ് വേണ്ടതെന്നും പറഞ്ഞു.
ഇലക്ട്രിക് ബസുകള് നഷ്ടത്തിലാണെന്നും ഇനി വാങ്ങില്ലെന്നുമുള്ള ഗതാഗത മന്ത്രി കെ.ബി. ഗണേഷ് കുമാറിന്റെ പ്രഖ്യാപനത്തെ പരോക്ഷമായി വിമര്ശിക്കുന്നതാണ് എംഎല്എ യുടെ ഫേസ്ബുക്ക് പോസ്റ്റ്. മൂന് മന്ത്രി ആന്റണി രാജു നഗരത്തെ പൂര്ണ്ണമായും ഇലക്ട്രിക് ബസുകള് ഓടുന്ന നഗരമാക്കി മാറ്റുമെന്ന്് പ്രഖ്യാപിച്ചിരുന്നു. അതിനിടയിലാണ് പുതിയ ഗതാഗതമന്ത്രിയുടെ നിലപാട് പ്രധാനമന്ത്രി ഇ സേവാ പദ്ധതി വരാനിരിക്കുന്ന ഇലക്ട്രിക് ബസ് പദ്ധതിയുടെ കാര്യത്തിലും അനിശ്ചിതത്വമാക്കി മാറ്റിയിട്ടുണ്ട്.
നിലവില് സ്മാര്ട്ട്സിറ്റി പദ്ധതി പ്രകാരം 100 കോടി നല്കി വാങ്ങിയ ഇലക്ട്രിക് ബസുകളാണ് ഇപ്പോള് തലസ്ഥാന നഗരത്തിലുള്ളത്. എന്നാല് കഴിഞ്ഞ ദിവസമാണ് ഇലക്ട്രിക് ബസുകള് ഇനി വാങ്ങുന്നില്ലെന്ന പ്രഖ്യാപനം ആന്റണി രാജുവിന് പിന്നാലെ ഗതാഗത മന്ത്രിയായി പുതിയതായി ചുമതലയേറ്റ ഗണേഷ്കുമാര് പറഞ്ഞത്. കിഫ്ബി വായ്പയായി നേരത്തേ 814 കോടി രൂപയാണ് ബസ് വാങ്ങുന്നതിനായി അനുവദിച്ചത്.
നാലു വര്ഷം കൊണ്ട് 500 ബസുകള് വാങ്ങാനാണ് സര്ക്കാര് ലക്ഷ്യമിട്ടിരിക്കുന്നത്. എന്നാല് ആദ്യം വാങ്ങിയ 50 ബസുകളാണ് ഇതുവരെ എത്തിയിട്ടുള്ളത്. ബാക്കി ബസുകള് വാങ്ങുന്നതിന് വായ്പ സംബന്ധിച്ച മന്ത്രിതല ചര്ച്ചകളും നടന്നുവരികയാണ്.
