ന്യൂഡല്ഹി: രണ്ബീര്കപൂറും ആലിയാഭട്ടും വിക്കി കൗശലും കത്രീന കൈഫും ഉള്പ്പെടെ ബോളിവുഡിലെ വന് താരനിര എത്തിയ അയോദ്ധ്യയിലെ രാമക്ഷേത്ര പ്രതിഷ്ഠാ ചടങ്ങില് പങ്കെടുക്കാന് കഴിയാതെ സാക്ഷാല് രാമായണത്തിലെ ശ്രീരാമന്. ദൂരദര്ശനില് വര്ഷങ്ങള്ക്ക് മുമ്പ് പ്രക്ഷേപണം ചെയ്ത രാമായണം സീരിയലില് ശ്രീരാമന്റെ വേഷം ചെയ്തയാളാണ് അരുണ്ഗോവില്.
ദൂരദര്ശനില് സംപ്രേഷണം ചെയ്ത രാമായണം അരുണ്ഗോവിലിന് വലിയൊരു താര പരിവേഷം നല്കുകയും സീരിയലിന്റെ ആരാധകരായി മാറിയ ഇന്ത്യന് കുടുംബങ്ങളിലെ ഒരു സെലിബ്രിട്ടിയാക്കിയും മാറ്റിയിരുന്നു. പ്രാണപ്രതിഷ്ഠാ ചടങ്ങില് പങ്കെടുക്കാന് കഴിയാത്തത് താരത്തിന് വലിയ നിരാശയാണ് സമ്മാനിച്ചത്. '' സ്വപ്നം സാക്ഷാത്കരിച്ചു, പക്ഷേ എനിക്ക് 'ദര്ശനം' ചെയ്യാന് കഴിഞ്ഞില്ല, നടന് ഉദ്ധരിച്ചു. എനിക്ക് ഇപ്പോള് ഒന്നും പറയാന് കഴിയില്ല. '' അദ്ദേഹം പറഞ്ഞു. അതേസമയം സീരിയലില് ലക്ഷ്മണനായി അഭിനയിച്ച സുനില് ലാഹിരിയും സീതയായി അഭിനയിച്ച ദീപിക ചിഖ്ലിയയും ചടങ്ങിന് അയോദ്ധ്യയില് എത്തിയിരുന്നു.
കേബിള് ടിവി രംഗപ്രവേശനം ചെയ്യുന്നതിന് വളരെ മുമ്പ് 1987 ജനുവരി 25 നായിരുന്നു രാമാനന്ദ്സാഗറിന്റെ രാമായണം ആദ്യമായി ടെലിവിഷനില് സംപ്രേഷണം ചെയ്തത്. ഞായറാഴ്ചകളില് രാവിലെയായിരുന്നു സീരിയല് സംപ്രേഷണം ചെയ്തിരുന്നത്. അയോദ്ധ്യയില് നടന്ന പ്രാണ പ്രതിഷ്ഠയിലേക്ക് സീരിയലിലെ പ്രമുഖര്ക്കും ക്ഷണം ലഭിച്ചിരുന്നു.
അമിതാഭ് ബച്ചന്, അഭിഷേക് ബച്ചന്, രജനീകാന്ത്, സോനുനിഗം, സച്ചിന് തെന്ഡുല്ക്കര്, ആയുഷ്മാന് ഖുറാന, രോഹിത് ഷെട്ടി, മാധുരി ദീക്ഷിത്, കങ്കണാറാണത്ത് തുടങ്ങി വന് താരനിരയാണ് ബോളിവുഡും കായികരംഗവും സംഗീതമേഖലയുമൊക്കെയായി പ്രാണ് പ്രതിഷ്ഠയ്ക്ക് അയോദ്ധ്യയില് എത്തിയത്. തിങ്കളാഴ്ച ഇവിടെ നടക്കുന്ന രാമക്ഷേത്ര പ്രതിഷ്ഠാ ചടങ്ങിലേക്ക് ക്ഷണിക്കപ്പെട്ടത് തന്റെ ഭാഗ്യമാണെന്ന് നടി കങ്കണ റണാവത്ത് പ്രതികരിച്ചത്. 36 കാരിയായ താരം ഞായറാഴ്ച തന്റെ ആത്മീയ ഗുരു റാംഭദ്രാചാര്യയെ കാണുകയും ഇവിടെയുള്ള ഒരു ക്ഷേത്രത്തില് നടന്ന യാഗത്തില് പങ്കെടുക്കുകയും ചെയ്തിരുന്നു. ജനുവരി 22 നായിരുന്നു പ്രാണപ്രതിഷ്ഠാ ചടങ്ങ് നടന്നത്.
