തിരുവനന്തപുരം: മുഖ്യമന്ത്രി പോയാല് ഇങ്ങനെയാണോ സുരക്ഷ ഒരുക്കുന്നതെന്ന് ചോദിച്ച് വഴിയരികില് പ്രതിഷേധവുമായി കേരളാഗവര്ണര് ആരിഫ് മുഹമ്മദ് ഖാന്. തനിക്കെതിരേ പ്രതിഷേധിച്ചവര്ക്കെതിരേ ജാമ്യമില്ലാ കുറ്റം ചുമത്തി എഫ്ഐആറിന്റെ പകര്പ്പ് തന്റെ കയ്യില് കിട്ടാതെ താന് ഇരിക്കുന്നിടത്ത് നിന്നും അനങ്ങില്ലെന്നും നിലപാട് എടുത്തു. ഒരു മണിക്കൂറായി കൊല്ലം നിലമേലില് വഴിയരികില് ഇരിക്കുകയാണ് ഗവര്ണര്. ഡിജിപിയും പോലീസും ഉള്പ്പെടെയുള്ളവര് നടത്തുന്ന അനുനയിപ്പിക്കാനുള്ള ശ്രമങ്ങളൊന്നും വിലപ്പോയില്ല.
എസ്എഫ്ഐ പ്രവര്ത്തകരുടെ കരിങ്കൊടി പ്രതിഷേധത്തെ തുടര്ന്ന് അരങ്ങേറുന്നത് നാടകീയ രംഗങ്ങളാണ് നിലമേല് നടന്നത്. പ്രതിഷേധക്കാര് കരിങ്കൊടി കാണിച്ചതിനെ തുടര്ന്ന് കാറില് നിന്നിറങ്ങിയ ഗവര്ണര് റോഡരികില് തന്നെ ഇരിക്കുകയായരിന്നു. അതിനിടെ കേന്ദ്ര ആഭ്യന്തര മന്ത്രിയുടെ സെക്രട്ടറിയെ വിളിച്ച് പരാതിപ്പെട്ട ഗവര്ണര് പ്രധാനമന്ത്രിയെ വിളിക്കാനും ആവശ്യപ്പെട്ടു.
പൊലീസിനോടും ഗവര്ണര് ക്ഷുഭിതനായി. പൊലീസ് സ്വയം നിയമം ലംഘിക്കുന്നുവെന്നും തനിക്കെതിരേ പ്രതിഷേധവുമായി അന്പതോളം പ്രവര്ത്തകരുണ്ടായിരുന്നെന്ന് ഗവര്ണര് പറഞ്ഞു. വരൂ എന്ന് പറഞ്ഞാണ് ഗവര്ണര് പ്രതിഷേധക്കാരുടെ ഇടയിലേക്ക് ഇറങ്ങിച്ചെന്നത്. 12 ലധികം പേരെ അറസ്റ്റ് ചെയ്ത് നീക്കിയെന്ന് പൊലീസ് വ്യക്തമാക്കി. എന്നാല് എഫ്ഐആര് പകര്പ്പ് കിട്ടണമെന്നും ആവശ്യപ്പെട്ടു.
സംസ്ഥാന ഡിജിപിയെ വിളിച്ച് പ്രതിഷേധം അറിയിച്ച ഗവര്ണര് പോലീസ് സ്വയം നിയമം ലംഘിക്കുകയാണെന്നും പറഞ്ഞു. പ്രധാനമന്ത്രിയെയും അമിത്ഷായെയും വിളിക്കണമെന്നും ഗവര്ണര് ആവശ്യപ്പെട്ടു. 12 പേരെ കസ്റ്റഡിയില് എടുത്തിട്ടുണ്ടെന്നും പോലീസ് പറഞ്ഞെങ്കിലൂം എഫ്ഐആര് തന്നെ കാണിക്കണമെന്ന് ഗവര്ണര് പറഞ്ഞു. അനുനയിപ്പിക്കാന് ശ്രമം നടത്തിയെങ്കിലും പ്രതിഷേധത്തില് നിന്നും പിന്മാറാന് ഒരുക്കമായിരുന്നില്ല. ഗവര്ണര് എത്തുന്നതിന് മുമ്പ് എന്തുകൊണ്ട് പ്രതിഷേധക്കാരെ കരുതല് കസ്റ്റഡിയില് എടുത്തില്ലെന്നും ഗവര്ണര് ചോദിച്ചു.
