ന്യൂഡല്ഹി: കഴിഞ്ഞ രണ്ടു ലോക്സഭാ തെരഞ്ഞെടുപ്പിലും വന്പരാജയം നേരിട്ട സാഹചര്യത്തില് കോണ്ഗ്രസ് നേതൃത്വത്തിനായി നെഹ്രുകുടുംബത്തിന് അപ്പുറത്തേക്ക് നോക്കണമെന്ന് മുന് രാഷ്ട്രപതിയും കോണ്ഗ്രസ് നേതാവുമായ പ്രണബ് മുഖര്ജിയുടെ മകള് ശര്മ്മിഷ്ഠാ മുഖര്ജി. കോണ്ഗ്രസിനെക്കുറിച്ചും രാഹുല് ഗാന്ധിയുടെ നേതൃഗുണത്തെക്കുറിച്ചും മുന് രാഷ്ട്രപതിയുടെ നിരീക്ഷണങ്ങള് പാര്ട്ടി നേതൃത്വത്തെ വിമര്ശിക്കുന്നതാണെന്നും പറഞ്ഞു. 'പ്രണബ് മൈ ഫാദര്: എ ഡോട്ടര് റിമംബേഴ്സ്' എന്ന പുസ്തകത്തിലാണ് എഴുതിയിട്ടുള്ളത്്.
ഉത്തരവാദിത്വപ്പെട്ട പൗര, ഒരു കോണ്ഗ്രസ് പ്രവര്ത്തക എന്ന നിലയില് തനിക്ക് പാര്ട്ടിയെക്കുറിച്ച് ഓര്ത്ത് തനിക്ക് ഭീതിയുണ്ടെന്നും നല്ല നേതൃത്വത്തിനായി നെഹ്രു-ഗാന്ധി കുടുബത്തിന് അപ്പുറത്തേക്ക് നോക്കേണ്ട സ്ഥിതിയാണെന്നും പറഞ്ഞു. 2014 ലും 2019 ലും പാര്ട്ടിയുടെ മുഖമായിട്ടും കോണ്ഗ്രസ് രാഹുലിന് കീഴില് മോശം പ്രകടനമാണ് നടത്തിയത്. ഒരു പ്രത്യേക നേതാവിന് കീഴില് പാര്ട്ടി തുടര്ച്ചയായി പരാജയപ്പെടുന്നുണ്ടെങ്കില് പാര്ട്ടി അതിനേക്കുറിച്ച് ആഴത്തില് ചിന്തിക്കണമെന്നത് പ്രധാനമാണെന്നും പറഞ്ഞു. പാര്ട്ടിയുടെ മുഖം ആരാകണമെന്ന് കോണ്ഗ്രസ് ചിന്തിക്കേണ്ട സമയമായെന്നും പറഞ്ഞു.
2019 തെരഞ്ഞെടുപ്പില് കോണ്ഗ്രസിന് 52 സീറ്റുകളാണ് കിട്ടിയത്. 19.67 ശതമാനം വോട്ടുഷെയറുകളേ ഉണ്ടായിരുന്നുള്ളൂ. അതേസമയം ബിജെപിയ്ക്ക് കിട്ടിയത് 282 സീറ്റുകളുമായിരുന്നു. 2019 ല് അത് 303 സീറ്റുകളായി വര്ദ്ധിച്ചു. പാര്ട്ടിയിലെ അഭിപ്രായ സ്വാതന്ത്ര്യത്തെക്കുറിച്ച് നേതൃത്വം വ്യക്തമാക്കണമെന്നും പറഞ്ഞു. അതേസമയം ഇതാദ്യമായിട്ടല്ല രാഹുലിന്റെ നേതൃത്വം പാര്ട്ടിക്കുള്ളില് ചോദ്യം ചെയ്യപ്പെടുന്നത്. 2019 ലെ തോല്വിക്ക് പിന്നാലെ രാഹുല് പാര്ട്ടിയുടെ നേതൃസ്ഥാനത്ത് നിന്ന് മാറിയിരുന്നു. എന്നാല് ഇപ്പോഴും പാര്ട്ടിയുടെ പ്രധാന പ്രചാരകന് അദ്ദേഹം തന്നെയാണ്. 2024 തെരഞ്ഞെടുപ്പ് നടക്കാനിരിക്കെ രാഹുലുംകൂട്ടരും സമ്മര്ദ്ദത്തിലാണ്.
ബിജെപിയ്ക്കെതിരേ പ്രതിപക്ഷ പാര്ട്ടികളെ ഒന്നിപ്പിക്കാനുള്ള കോണ്ഗ്രസിന്റെ നീക്കം തെരഞ്ഞെടുപ്പിനോട് അടുക്കുമ്പോള് പൊളിയുകയാണ്. പല പാര്ട്ടികളും അഭിപ്രായ ഭിന്നതയില് നില്ക്കുന്ന സാഹചര്യത്തില് നരേന്ദ്രമോദിക്ക് കീഴില് ഒത്തൊരുമയോടെയുള്ള പ്രവര്ത്തനങ്ങളിലാണ് എന്ഡിഎ. ഇത്തവണ ബിജെപി ലക്ഷ്യമിടുന്നത് 375 സീറ്റുകളാണ്. മറ്റുള്ള സഖ്യകക്ഷികളും കൂടി ചേര്ന്ന് സീറ്റിന്റെ എണ്ണം 400 ആക്കി വര്ദ്ധിപ്പിക്കുകയാണ് ബിജെപി ലക്ഷ്യമിടുന്നത്.
