ന്യൂഡല്ഹി: നികുതിവിഹിതം കേന്ദ്രത്തിന്റെ സൗജന്യമല്ലെന്നും സംസ്ഥാനത്തിന്റെ അവകാശമാണെന്നും നികുതിവിഹിതം കുറഞ്ഞെന്ന ആക്ഷേപം കേരളം ഒരിടത്തും നടത്തിയിട്ടില്ലെന്നും സംസ്ഥാന സര്ക്കാര്. നികുതിവിഹിതത്തിലെ ശതമാനം കണക്കാക്കുന്ന കാര്യത്തില് കേന്ദ്രം കേരളത്തോട് നീതി കാട്ടിയില്ലെന്നു കേരളം കുറ്റപ്പെടുത്തി.
ഇക്കാര്യത്തില് നിര്മ്മലാസീതാരാമന് പാര്ലമെന്റില് അവതരിപ്പിച്ച കേന്ദ്രഗ്രാന്റ് കണക്ക് തെറ്റാണെന്നും പെരുപ്പിച്ച് കാട്ടിയതാണെന്നും ജിഎസ്ടി നഷ്ടപരിഹാര തുകയും കേന്ദ്ര ധനമന്ത്രി ഗ്രാന്റില് ഉള്പ്പെടുത്തിയാണ് കാണിച്ചതെന്നും പറഞ്ഞു. യുപിഎയുടെ പത്ത് കൊല്ലത്തില് കേരളത്തിന് 46,303 കോടി ലഭിച്ചപ്പോള് എന്ഡിഎ ഭരിച്ച 2014-2023 കാലത്ത് കേരളത്തിന് 1,50,140 കോടി വിഹിതം നല്കിയെന്ന് നിര്മ്മല സീതാരാമന് പറഞ്ഞു.
മോദി സര്ക്കാര് യുപിഎ കാലത്തെക്കാള് 224 ശതമാനം അധികം നികുതി വിഹിതം കേരളത്തിന് നല്കി എന്നാണ് ധനമന്ത്രി പറഞ്ഞത്. കേന്ദ്ര ധനസഹായം യുപിഎ കാലത്ത് 25,629 കോടിയായിരുന്നുവെങ്കില് എന്ഡിഎ കാലത്ത് ഇത് 1,43,117 കോടിയായി വര്ധിച്ചെന്നും പറഞ്ഞു. എന്നാല് കണക്കുകളില് കൃത്യമമുണ്ടെന്നാണ് കേരളം കുറ്റപ്പെടുത്തുന്നത്.
നികുതി വിഹിത ശതമാനം കണക്കാക്കിയതില് കേന്ദ്രം കേരളത്തോട് നീതികേട് കാണിച്ചുവെന്ന് കേരള സര്ക്കാര് കുറ്റപ്പെടുത്തി. ധനകാര്യ കമ്മീഷന്റെ മാനദണ്ഡങ്ങള് പുനപരിശോധിക്കണമെന്ന ആവശ്യവും കേരളം മുന്നോട്ട് വെച്ചു. ഇതിന് പുറമേ കടമെടുപ്പ് പരിധി കാര്യത്തില് കേന്ദ്രത്തിന്റെ വാദം തെറ്റാണെന്ന് സുപ്രീംകോടതിയില് സംസ്ഥാന സര്ക്കാര് സത്യവാങ്മൂലം നല്കുകയും ചെയ്തു. കേരളത്തിന്റെ കടം 1.75 ശതമാനം മാത്രമാണെന്നും ഇതില് പറയുന്നു. 271 പേജുകള് വരുന്ന സത്യവാങ്മൂലമാണ് സമര്പ്പിച്ചത്.
