ആലത്തൂര് ലോക്സഭാ മണ്ഡലം തിരിച്ചുപിടിക്കാന് സി.പി.എമ്മിന്റെ പൂഴികടകന്. പാര്ട്ടി കേന്ദ്ര കമ്മിറ്റിയംഗവും മന്ത്രിയുമായ കെ. രാധാകൃഷ്ണനാണ് ആലത്തൂരില് സി.പി.എം. സ്ഥാനാര്ഥി. മാസങ്ങള്ക്കുമുമ്പേ തന്നെ രാധാകൃഷ്ണന്റെ പേര് മണ്ഡലത്തില് പറഞ്ഞു കേട്ടിരുന്നു. ആരോഗ്യപ്രശ്നങ്ങള് പറഞ്ഞ് മത്സര രംഗത്ത് നിന്ന് പിന്മാറാന് രാധാകൃഷ്ണന് ശ്രമിച്ചെങ്കിലും അവസാനം പാര്ട്ടി തീരുമാനത്തിന് വഴങ്ങി.
ആലത്തൂരില് രാധാകൃഷ്ണനേക്കാള് മികച്ച സ്ഥാനാര്ഥിയില്ല എന്ന കണക്കുകൂട്ടലിലാണ് പാര്ട്ടി. പാര്ട്ടിയിലെ ചുരുക്കം ചില ജനകീയ മുഖങ്ങളില് ഒരാളാണ് രാധാകൃഷ്ണന്. പാര്ട്ടിക്കകത്തും പുറത്തുമുള്ള ക്ലീന് ഇമേജും രാധാകൃഷ്ണന് തുണയായി. കഴിഞ്ഞതവണ അപ്രതീക്ഷിതമായി തോറ്റ മണ്ഡലം എന്ത് വില കൊടുത്തും തിരിച്ചു പിടിക്കുക എന്നതാണ് രാധാകൃഷ്ണന്റെ സ്ഥാനാര്ഥിത്വത്തിലൂടെ പാര്ട്ടി മുന്നോട്ട് വയ്ക്കുന്നത്.
മണ്ഡലത്തില് ഒരു സാധാരണക്കാരിയുടെ പരിവേഷമുള്ള നിലവിലെ എം.പി. രമ്യ ഹരിദാസിനെതിരേ ജനകീയനായ രാധാകൃഷ്ണന് തന്നെ വേണമെന്ന് തൃശൂര് ജില്ലാ സെക്രട്ടറിയേറ്റ് കടുംപിടുത്തം പിടിച്ചിരുന്നു. എ.കെ. ബാലന്, ഭാര്യ പി.കെ. ജമീല, മുന് എം.പി. എസ്. അജയകുമാര് എന്നിവരുടെ പേരുകളും തുടക്കത്തില് ഉയര്ന്നു വന്നെങ്കിലും മണ്ഡലം തിരിച്ചുപിടിക്കാന് രാധാകൃഷ്ണന് തന്നെയാണ് ഏറ്റവും അനുയോജ്യനായത് എന്ന് പാര്ട്ടി ജില്ലാ സെക്രട്ടറിയേറ്റ് തീരുമാനിക്കുകയായിരുന്നു.
പാലക്കാട് ജില്ലയിലെ നാലും തൃശൂര് ജില്ലയിലെ മൂന്നും നിയമസഭാ മണ്ഡലങ്ങളടങ്ങിയ ആലത്തൂര് ലോക്സഭാ മണ്ഡലത്തില് കഴിഞ്ഞതവണ ഒന്നര ലക്ഷത്തോളം വോട്ടിന്റെ ഭൂരിപക്ഷത്തിനാണ് കോണ്ഗ്രസിലെ രമ്യ ഹരിദാസ് 'പാട്ടും പാടി' വിജയിച്ചത്. ശബരിമല വിവാദം കത്തിനിന്ന അവസരത്തിലാണ് 2019ലെ തെരഞ്ഞെടുപ്പ് നടക്കുന്നത്. എന്നാലും ആലത്തൂര് 'കൈ'-വിടില്ലെന്ന ഉറച്ച വിശ്വാസത്തിലായിരുന്നു സി.പി.എം. കോണ്ഗ്രസിനും മണ്ഡലത്തില് ജയപ്രതീക്ഷ ഇല്ലായിരുന്നു.
പഴയ ഒറ്റപ്പാലം മണ്ഡലത്തില് കെ.ആര്. നാരായണന് ജയിച്ച ഓര്മകള് മാത്രമാണ് കോണ്ഗ്രസിനുണ്ടായിരുന്നത്. മണ്ഡലം ആലത്തൂരായപ്പോള് ഒന്നുകൂടി ചുവന്നു. 2019ലെ ലോക്സഭാ തെരഞ്ഞെടുപ്പില് ആലത്തൂരില് യു.ഡി.എഫിന് വേണ്ടി കളത്തിലിറങ്ങിയ കോണ്ഗ്രസ് സ്ഥാനാര്ഥി രമ്യ ഹരിദാസ് 1,58,968 വോട്ടിന്റെ ഭൂരിപക്ഷത്തിനാണ് ജയിച്ചത്. ഹാട്രിക് ലക്ഷ്യമിട്ട് വന്ന പി.കെ. ബിജുവിനെയാണ് രമ്യ പരാജയപ്പെടുത്തിയത്. കഴിഞ്ഞ തവണ 'കൈ' പിടിച്ച മണ്ഡലം രാധാകൃഷ്ണനെ ഇറക്കി ഏതുവിധേനെയും തിരിച്ചുപിടിക്കാം എന്ന കണക്കുകൂട്ടലിലാണ് സി.പി.എം.
അടിത്തട്ടിലെ പ്രവര്ത്തകരുമായി ബന്ധം പുലര്ത്തുന്നതില് അന്നത്തെ സ്ഥാനാര്ഥിയും സിറ്റിങ് എം.പിയുമായിരുന്ന പി.കെ. ബിജുവിന് വന്ന വീഴ്ചയാണ് കനത്ത തോല്വിക്ക് കാരണങ്ങളിലൊന്ന് എന്നായിരുന്നു പിന്നീടുള്ള വിലയിരുത്തല്. മണ്ഡലത്തില്നിന്നുള്ള നേതാവായ മന്ത്രി കെ. രാധാകൃഷ്ണനെ സ്ഥാനാര്ഥിയാക്കുന്നതോടെ മണ്ഡലം വീണ്ടും ചുവക്കുമെന്ന കണക്കുകൂട്ടലിലാണ് പാര്ട്ടി.
പി.കെ. ബിജുവിന് ഒരു തവണകൂടി അവസരം ലഭിക്കുമായിരുന്നു. എന്നാല് കരുവന്നൂര് ബാങ്ക് തട്ടിപ്പില് ബിജുവിന്റെ പേര് കൂടി വന്നതോടെ ഒരു പരീക്ഷണത്തിന് സി.പി.എം. മുതിര്ന്നില്ല എന്ന് വേണം കരുതാന്. കരുവന്നൂര് ബാങ്ക് തട്ടിപ്പില് പാര്ട്ടിയുടെ അന്വേഷണ കമ്മിഷണില് പി.കെ. ബിജു ഉണ്ടായിരുന്നു. തട്ടിപ്പ് സംബന്ധിച്ച് ബിജുവിന് അറിയാമായിരുന്നു എന്നാണ് ആരോപണം. കോട്ടയം സ്വദേശിയായ ബിജു നിലവില് തൃശൂര് കേന്ദ്രീകരിച്ചാണ് പ്രവര്ത്തിക്കുന്നത്.
ഠ പാട്ടും പാടി രമ്യ
2019ലെ തെരഞ്ഞെടുപ്പില് സി.പി.എം. ഏറ്റവും അധികം പ്രതീക്ഷ പുലര്ത്തിയ മണ്ഡലമായിരുന്നു ആലത്തൂര്. കോണ്ഗ്രസാകട്ടെ തോല്വി സമ്മതിച്ച മട്ടിലും. ഹാട്രിക് വിജയത്തിനായി പി.കെ. ബിജു തന്നെ കളത്തിലറങ്ങി. ഏറെ വൈകിയാണ് രമ്യ ഹരിദാസ് സ്ഥനാര്ഥിയാകുന്നത്. പല പേരുകളും ഉയര്ന്ന് കേട്ടെങ്കെിലും അവസാന നിമിഷമാണ് കോഴിക്കോട് ജില്ലയിലെ കുന്നമംഗലം ബ്ലോക്ക് പഞ്ചായത്ത് പ്രസിഡന്റായ രമ്യ ഹരിദാസ് സ്ഥാനാര്ഥിയായി വരുന്നത്. കോഴിക്കോട് ജില്ലക്കാരിയാണെങ്കിലും വളരെ പെട്ടെന്ന് രമ്യ മണ്ഡലത്തില് നിറസാന്നിധ്യമായി.
നല്ലൊരു കലാകാരി കൂടിയായ രമ്യ 'പെങ്ങളൂട്ടി'-യായാണ് മണ്ഡലമാകെ അറിയപ്പെട്ടത്. ഒരു പുതുമുഖമെന്ന നിലയില് മികച്ച തുടക്കവും പ്രചാരണവുമാണ് രമ്യയ്ക്ക് മണ്ഡലത്തില് ലഭിച്ചത്. സി.പി.എം. നേതാക്കളുടെ നാക്കുപിഴകളും രമ്യയ്ക്ക് സഹായകമായി. തെരഞ്ഞെടുപ്പ് വേളയില് കുഞ്ഞാലിക്കുട്ടിയെ കണ്ട് അനുഗ്രഹം തേടിയിരുന്നു രമ്യ. വളരെ മോശമായ രീതിയിലാണ് സി.പി.എം. നേതാവും ഇത്തവണത്തെ പാലക്കാട് മണ്ഡലം സ്ഥാനാര്ഥിയുമായ എ. വിജയരാഘവന്, ആ കൂടിക്കാഴ്ചയെ കുറിച്ച് പറഞ്ഞത്.
ആ പ്രസ്താവന വന് വിവാദമായി. സ്ത്രീ വോട്ടര്മാരില് രമ്യയ്ക്ക് സഹാനൂഭൂതിയുണ്ടായി. പി.കെ. ബിജുവിന്റെ രണ്ടാം ടേം മോശമായിരുന്നു. ജനങ്ങളുമായുള്ള അടുപ്പം കുറഞ്ഞു. കാറില്നിന്ന് ഇറങ്ങാത്ത എം.പി. എന്ന പ്രചാരണം മണ്ഡലത്തില് വ്യാപകമായിരുന്നു. മൊത്തം പോള് ചെയ്ത വോട്ടിന്റെ 52.4 ശതമാനം വോട്ടുകള് നേടിയാണ് രമ്യ വിജയിക്കുന്നത്. എതിര് സ്ഥാനാര്ഥി പി.കെ. ബിജു 36.8 ശതമാനം വോട്ടുകള് നേടി. 16 ശതമാനത്തിന്റെ വ്യത്യാസം രമ്യ ഹരിദാസിന്റെ അന്നത്തെ വിജയത്തിന് കളമൊരുക്കിയിരുന്നു.
ഠ ജയിക്കാനുള്ള സാഹചര്യം
രമ്യ ഹരിദാസ് 2019ല് ജയിച്ചുവരാനുള്ള കാരണങ്ങള് നാലാണ്. ആദ്യത്തേത് രാഹുലിന്റെ സ്വാധീനം. രാഹുല് ഗാന്ധി വയനാട്ടില് സ്ഥാനാര്ഥിയായത് വോട്ടര്മാരെ സ്വാധീനിച്ചിരുന്നു. ജയിച്ചാല് പ്രധാനമന്ത്രി എന്ന രീതിയിലായിരുന്നു പ്രചാരണം. രാഹുല് ഗാന്ധി കേന്ദ്രത്തില് ബി.ജെ.പിക്കെതിരെയുള്ള വലിയ നേതാവായി മാറും എന്ന കേരളത്തിലെ ജനങ്ങളുടെ പ്രതീക്ഷയായിരുന്നു രമ്യയുടെ ജയത്തിനുള്ള ഒരു കാരണം. മറ്റൊന്ന് ശബരിമല വിഷയം ഉണ്ടാക്കിയ വലിയ തോതിലുള്ള സര്ക്കാരിനെതിരായ പ്രതികരണം.
ആലത്തൂര് മണ്ഡലത്തില്നിന്ന് വളരെയധികം ആളുകള് വര്ഷാവര്ഷം ശബരിമലയ്ക്ക് വ്രതം നോറ്റ് പോകുന്നവരാണ്. അവരില് ബഹുഭൂരിപക്ഷവും പാര്ട്ടിക്കാരാണ്. മറ്റൊന്ന് സിറ്റിങ് എം.പിക്കെതിരേ ഉണ്ടായ ജനവികാരം. നാലാമത്തേത് സി.പി.എം. നേതാക്കളുടെ രമ്യയ്ക്കെതിരായ പ്രസ്താവനകള്. തെരഞ്ഞെടുപ്പിനെ സൈലന്റായി ബാധിച്ചത് തെരഞ്ഞെടുപ്പിനിടെ എ. വിജയരാഘവന് നടത്തിയ പ്രസ്താവനയാണ്. അത് രമ്യ ഹരിദാസിന് അനുകൂലമായ തരംഗം സൃഷ്ടിച്ചു.
ഠ രാധാകൃഷ്ണന് വരുമ്പോള്
സി.പി.എം. സ്ഥനാര്ഥിയാക്കിയ ഒരേ ഒരു മന്ത്രിയാണ് കെ. രാധാകൃഷ്ണന്. തെരഞ്ഞെടുപ്പുകളില് തോറ്റ ചരിത്രമില്ലാത്ത രാധാകൃഷ്ണനെ കളത്തിലിറക്കിയാല് മണ്ഡലം തിരിച്ചുപിടിക്കാമെന്നാണ് സി.പി.എം. കണക്കുകൂട്ടല്. പാലക്കാട് , തൃശൂര് ജില്ലകളിലായുള്ള ആലത്തൂരിന്റെ ഭാഗമായ ചേലക്കര നിയമസഭാ മണ്ഡലമാണ് രാധാകൃഷ്ണന്റെ തട്ടകം. ആലത്തൂരില് ആരോഗ്യപരമായ കാരണങ്ങളാല് മത്സരിക്കാനില്ലെന്ന കെ. രാധാകൃഷ്ണന്റെ തീരുമാനത്തെ തള്ളിയാണ് പാര്ട്ടി അദ്ദേഹത്തെ സ്ഥാനാര്ഥിയാക്കിയത്.
കടുത്ത പ്രമേഹമടക്കമുള്ള ആരോഗ്യ പ്രശ്നങ്ങള് നേരിടുന്നതിനാല് മത്സരരംഗത്തുനിന്നും ഒഴിവാക്കണമെന്ന്' രാധാകൃഷ്ണന് മുഖ്യമന്ത്രി പിണറായി വിജയനെ നേരിട്ട് അറിയിച്ചിരുന്നു. പിണറായി അദ്ദേഹത്തിന്റെ ആവശ്യം അംഗീകരിച്ചെന്നും പകരക്കാരനായി മുന് മന്ത്രി എ.കെ. ബാലന് എത്തുമെന്ന അഭ്യൂഹങ്ങള് ശക്തമായിരിക്കെയാണ് രാധാകൃഷ്ണനെത്തന്നെ കളത്തില് ഇറക്കി മണ്ഡലം പിടിക്കാന് സി.പി.എം. തീരുമാനിച്ചിരിക്കുന്നത്.
പാലക്കാട് ജില്ലയിലെ തരൂര്, ചിറ്റൂര്, നെന്മാറ, ആലത്തൂര്, തൃശൂര് ജില്ലയിലെ ചേലക്കര, കുന്നംകുളം, വടക്കാഞ്ചേരി എന്നിവ ചേര്ന്നതാണ് ആലത്തൂര് ലോകസഭാ മണ്ഡലം. 2021ലെ നിയമസഭാ തെരഞ്ഞെടുപ്പില് ഈ ഏഴ് നിയോജമണ്ഡലത്തിലും എല്.ഡി.എഫാണ് ജയിച്ചത്.
