പത്തനംതിട്ട : സംസ്ഥാനപദ്ധതികള്ക്കു കേന്ദ്രസര്ക്കാര് എതിരല്ലെന്നും സില്വര്ലൈന് പദ്ധതി ഉപേക്ഷിച്ചിട്ടില്ലെന്നും റെയില്വേ ബോര്ഡ്. പദ്ധതിയുടെ കാര്യത്തില് അടിയന്തരപ്രാധാന്യത്തോടെ കെ-റെയിലുമായി ചര്ച്ച നടത്താന് ദക്ഷിണ റെയില്വേയോട് നിര്ദേശിച്ചിരുന്നു. എന്നാല് നിലവിലെ വിശദപദ്ധതി റിപ്പോര്ട്ടുമായി (ഡി.പി.ആര്) മുന്നോട്ടുപോകാനാവില്ല. പുതിയ ഡി.പി.ആര്. തയാറാക്കുന്ന കാര്യം ചര്ച്ചചെയ്യാനാണു നിര്ദേശിച്ചത്.
കഴിഞ്ഞമാസം 16-നു ദക്ഷിണ റെയില്വേയ്ക്ക് അയച്ച കത്തുമായി ബന്ധപ്പെട്ട് ചര്ച്ച നടന്നിട്ടില്ലെന്നും ബോര്ഡ് വ്യക്തമാക്കി. കെ-റെയില് സമര്പ്പിച്ച ഡി.പി.ആര്. യാഥാര്ഥ്യബോധമുള്ളതല്ല. കിലോമീറ്ററിനു 120 കോടി രൂപയേ ചെലവാകൂവെന്ന് ഡി.പി.ആറില് പറയുന്നതു ശരിയല്ല. കിലോമീറ്ററിന് 200-250 കോടി രൂപ ചെലവാകുമെന്നിരിക്കേ പദ്ധതിച്ചെലവ് കുറച്ചുകാട്ടി. കേന്ദ്രസര്ക്കാരിലുള്ള അവിശ്വാസമാണോ ഇതിനു കെ-റെയിലിനെ പ്രേരിപ്പിച്ചതെന്നു സംശയിക്കുന്നു.
വിഷയം രാഷ്ട്രീയവത്കരിക്കാനുള്ള സംസ്ഥാനസര്ക്കാര് നീക്കം നിര്ഭാഗ്യകരമാണ്. പുതിയ ഡി.പി.ആര്. സമര്പ്പിച്ചാല് പദ്ധതി പരിഗണിക്കാവുന്നതാണ്. സില്വര് െലെന് അര്ധാതിവേഗപാതയാണ്. സ്റ്റാന്ഡേഡ് ഗേജിലാണ് ഉദ്ദേശിക്കുന്നത്. രാജ്യത്ത് നിലവിലുള്ള 7000 കി.മീ. പാത ബ്രോഡ്ഗേജാണ്. അതിനാല്, സില്വര് െലെനിന്റെ സ്റ്റാന്ഡേഡ് ഗേജ് പാത 530 കിലോമീറ്ററില് ഒതുങ്ങും. മറ്റ് പാതകളുമായി ബന്ധിപ്പിക്കാനാവില്ല.
രാജ്യത്തെ എല്ലാ ബ്രോഡ്ഗേജ് പാതകളും അര്ധാതിവേഗപാതകളാക്കി മാറ്റികൊണ്ടിരിക്കുകയാണ്. കേരളത്തിലും ഈ മാറ്റം വരും. ബുള്ളറ്റ് ട്രെയിന് പദ്ധതിയാണു സ്റ്റാന്ഡേഡ് ഗേജിലെങ്കില് ഭാവിയില് മറ്റ് ബുള്ളറ്റ് ട്രെയിന് പാതകളുമായി ബന്ധിപ്പിക്കാന് കഴിയും. ഇക്കാര്യമാണു സംസ്ഥാനസര്ക്കാര് പരിഗണിക്കേണ്ടതെന്നും റെയില്വേ ബോര്ഡ് ചൂണ്ടിക്കാട്ടി.
