കൊച്ചി: കാലാവസ്ഥാമാറ്റത്തിന്റെ തുടര്ച്ചയായി അന്തരീക്ഷതാപനിലയില് അഭൂതപൂര്വമായ വര്ധന. അള്ട്രാ വയലറ്റ് വികിരണങ്ങളുടെ അതിതീവ്രതയും മാര്ച്ചില് പ്രതീക്ഷിക്കാമെന്നു കാലാവസ്ഥാഗവേഷകരുടെ മുന്നറിയിപ്പ്. അടുത്തമാസം പകുതിയോടെ സംസ്ഥാന അള്ട്രാ വയലറ്റ് ഇന്ഡക്സ് ഉയരും; ഏപ്രില് വരെ തുടരും.
കേരളത്തിലെ വേനല്ക്കാലത്ത് അള്ട്രാ വയലറ്റ് രശ്മികള് കുത്തനെ ഭൂമിയില് പതിക്കുന്ന പ്രത്യേകതയുണ്ടെന്നു കുസാറ്റ് റഡാര് ഗവേഷണകേന്ദ്രം ഡയറക്ടര് ഡോ.എസ്. അഭിലാഷ് ചൂണ്ടിക്കാട്ടി. ഈ പ്രതിഭാസം വര്ധിക്കുന്നതു കണ്ണിനും ശരീരത്തിനും ദോഷകരമാണ്. കടുത്ത സൂര്യാഘാതത്താല് ദേഹത്തു പൊള്ളലേല്ക്കാം.
നിലവിലെ കാലാവസ്ഥാസാധ്യതപ്രകാരം മാര്ച്ച് ആദ്യവാരം മഴപെയ്യുന്നതോടെ അന്തരീക്ഷ ഈര്പ്പം വര്ധിക്കും. കിഴക്കന് മലയോരമേഖലകളില് ഇപ്പോള്ത്തന്നെ ഒറ്റപ്പെട്ട തോതില് നേരിയ വേനല്മഴ ലഭിക്കുന്നുണ്ട്. ഇത് താത്കാലികാശ്വാസം മാത്രമാണ്.
അന്തരീക്ഷ ഇര്പ്പം (ഹ്യുമിഡിറ്റി) വര്ധിക്കാനും ഇത് കാരണമാകും. ഇതുമൂലം ശരീരത്തിന് അനുഭവവേദ്യമായ ചൂട് കൂടും. ശാരീരിക അസ്വസ്ഥതകള് വര്ധിക്കും. മഴ മാര്ച്ച് ആദ്യം ഒന്നോ ഒന്നരയോ ആഴ്ചയേ പ്രതീക്ഷിക്കുന്നുള്ളൂ. അളവ് പ്രവചിക്കുക സാധ്യമല്ല. കടല്ത്തീരജില്ലകളില് വേനല്മഴ സാധ്യത ഉരുത്തിരിയുന്നതേയുള്ളൂ.
