ലണ്ടന്: ഇംഗ്ളീഷ് പ്രീമിയര് ലീഗ് ഫുട്ബോളില് അയല്ക്കാരുടെ പോരാട്ടത്തില് മാഞ്ചസ്റ്റര് യൂണൈറ്റഡിനെ തോല്പ്പിച്ച് മാഞ്ചസ്റ്റര് സിറ്റി. ഒന്നിനെതിരേ മൂന്ന് ഗോളുകള്ക്കായിരുന്നു സിറ്റി യുണൈറ്റഡിന് മേല് വിജയം നേടിയത്. മാഞ്ചസ്റ്റര് ഡര്ബിയില് സിറ്റി താരം ഫില്ഫോഡന്റെ ഇരട്ടഗോളുകളായിരുന്നു കളി നിര്ണ്ണയിച്ചത്. മൂന്നാംഗോള് സൂപ്പര്താരം ഹാളണ്ട് നേടി.
എറ്റിഹാദ് സ്റ്റേഡിയത്തില് നടന്ന മത്സരത്തില് എട്ടാം മിനിറ്റില് സിറ്റിയെ ഞെട്ടിച്ച് മാഞ്ചസ്റ്റര് യൂണൈറ്റഡ് ആദ്യഗോള് നേടിയിരുന്നു. മാര്ക്കസ് റാഷ്ഫോഡിന്റെ ഗോളില് മുന്നിലെത്തിയ ടീമിനെ രണ്ടാംപകുതിയില് പിടിച്ച സിറ്റി തിരിച്ചടിച്ചു. 56 ാം മിനിറ്റില് റോഡ്രി നല്കിയ പന്തില് ഗോള് നേടിയ ഫോഡന് പിന്നാലെ അല്വാരസ് നല്കിയ പന്ത് വലയില് എത്തിച്ച് ടീമിന്റെ രണ്ടാം ഗോളും ലീഡും കണ്ടെത്തി.
ഇഞ്ചുറിസമയത്തായിരുന്നു ഹാളണ്ടിന്റെ ഗോള് വന്നത്. റോഡ്രി നല്കിയ പന്ത് ഫോഡന് വലയിലാക്കി. സിറ്റിയുടെ മേല്ക്കോയ്മയായിരുന്നു ഇന്നലെയും കണ്ടത്. കളിയിലെ ഭൂരിപക്ഷം സമയത്തും പന്ത് കൈവശം വെച്ച സിറ്റി മാഞ്ചസ്റ്റര് താരങ്ങളെ ഗ്രൗണ്ടിലൂടെ ഓടിക്കുകയായിരുന്നു. പ്രീമിയര് ലീഗിലെ ഈ സീസണില് പതിനൊന്നാം തോല്വി ഏറ്റുവാങ്ങിയ യുണൈറ്റഡിന് മേല് ഗ്വാര്ഡിയോളയ്ക്ക് കീഴില് സിറ്റി ആറാം വിജയമാണ് നേടിയത്.
ഇരു ടീമുകളും ഏഴു തവണ ഏറ്റുമുട്ടിയപ്പോള് ആറു തവണയും വിജയം നേടിയത് പെപ്പ് ഗ്വാര്ഡിയോളയുടെ ടീമായിരുന്നു. സിറ്റി 62 പോയിന്റുമായി രണ്ടാമതും യുണൈറ്റഡ് 44 പോയിന്റുമായി ആറാമതുമാണ്. 63 പോയിന്റുള്ള ലിവര്പൂളാണ് പോയിന്റ് ടേബിളില് ഒന്നാമത് നില്ക്കുന്നത്.
