ഏനാത്ത്(അടൂര്): കാട്ടുപന്നിയുടെ ആക്രമണത്തില്നിന്ന് രക്ഷപ്പെടാനുള്ള ശ്രമത്തിനിടെ കിണറ്റില് വീണ വീട്ടമ്മയെ 20 മണിക്കൂറിന് ശേഷം കണ്ടെത്തി രക്ഷിച്ചു. പരുത്തിപ്പാറ പ്ലാവിയില്വീട്ടില് ബാബുവിന്റെ ഭാര്യ എലിസബത്താ(58)ണ് 50 അടിയോളം താഴ്ചയുള്ള കിണറ്റില് വീണത്. കിണറ്റില് അഞ്ചടിയോളം വെള്ളമുണ്ടായിരുന്നു.
കഴിഞ്ഞ നാലിനു െവെകിട്ട് നാലോടെയാണ് സംഭവം. കാട്ടുപന്നി ആക്രമിക്കാന് വരുന്നത് കണ്ട് അടുത്ത പുരയിടത്തിലെ കിണറിന് മുകളില് ചാടിക്കയറുകയായിരുന്നു. കിണറിന് മുകളില് നിരത്തിയിട്ടിരുന്ന പലക തകര്ന്നാണ് കിണറ്റില് വീണത്. എലിസബത്തിനെ കാണാതിരുന്നതിനെത്തുടര്ന്ന് വീട്ടുകാര് നടത്തിയ അന്വേഷണത്തിനിടെ അടുത്ത പറമ്പിലെ കിണറില് നിന്ന് കരച്ചില് കേട്ടു. നോക്കിയപ്പോള് എലിസബത്ത് കിണറിലുണ്ടെന്ന് മനസിലായി.
വിവരമറിഞ്ഞ് സ്റ്റേഷന് ഓഫീസര് വിനോദ് കുമാറിന്റെ നേതൃത്വത്തില് ഫയര്ഫോഴ്സ് സ്ഥലത്തെത്തി. ഗ്രേഡ് അസിസ്റ്റന്റ് സ്റ്റേഷന് ഓഫീസര് അജികുമാര്, ഫയര് ആന്ഡ് റെസ്ക്യൂ ഓഫീസര് അഭിലാഷ് എന്നിവര് കിണറ്റിലിറങ്ങി എലിസബത്തിനെ നെറ്റിന്റെയും റോപ്പിന്റെയും സഹായത്തോടെ രക്ഷപ്പെടുത്തി. ആഴമുള്ള കിണറ്റില് നിന്നും ഇവരെ രക്ഷപെടുത്താന് നാട്ടുകാര് നടത്തിയ ശ്രമം വിഫലമായതിനെത്തുടര്ന്നാണ് ഫയര്ഫോഴ്സിന്റെ സഹായം തേടിയത്. ഒരു ദിവസത്തോളം കിണറ്റില് വെള്ളത്തില് കിടന്നു അവശയായ എലിസബത്തിനെ പരുക്കുകള് ഗുരുതരമാകാത്ത വിധം നെറ്റിനുള്ളില് ആക്കി സുരക്ഷിതമായി കരയ്ക്കെത്തിക്കുകയായിരുന്നു.
ഫയര്ഫോഴ്സിന്റെ തന്നെ ആംബുലന്സില് താലൂക്ക് ആശുപത്രിയിലേക്ക് എത്തിച്ചു. അസിസ്റ്റന്റ് സ്റ്റേഷന് ഓഫീസര് എം. വേണു, സീനിയര് ഫയര് ആന്ഡ് റെസ്ക്യൂ ഓഫീസര് അനൂപ്, ഫയര് ആന്ഡ് റെസ്ക്യൂ ഓഫീസര്മാരായ ലിജി കുമാര്, ദിനൂപ്, കൃഷ്ണകുമാര്, ദീപേഷ്, പ്രദീപ്, രഞ്ജിത്ത്, റെജികുമാര്, രാജേഷ് എന്നിവരും രക്ഷാപ്രവര്ത്തനത്തില് പങ്കാളികളായി.
