ന്യൂഡല്ഹി: അന്താരാഷ്ട്ര ക്രിക്കറ്റ് കളിച്ചിരുന്ന കാലത്ത് എതിര്ടീമിലെ കളിക്കാരുമായി അധികം സംസാരിക്കുന്ന ആളായിരുന്നില്ല താനെന്നും എന്നാല് ഐപിഎല്ലില് കളിച്ചതോടെ അത്തരം പ്രതിബന്ധങ്ങളെയെല്ലാം താന് തകര്ത്തെന്നും ഇന്ത്യയുടെ എക്കാലത്തെയും മികച്ച നായകന് മഹേന്ദ്രസിംഗ് ധോണി. ഐപിഎല് നായകനെന്ന നിലയില് ലോകത്തുടനീളമുള്ള കളിക്കാരെയും അവരുടെ ക്രിക്കറ്റ് ചിന്തയെക്കുറിച്ചും അവരുടെ സംസ്ക്കാരത്തെയും പരിചയപ്പെടാനും അവരൊക്കെയുമായി മികച്ച ബന്ധം ഉണ്ടാക്കാനും അവസരമുണ്ടായതായി താരം പറഞ്ഞു.
2008 ലെ ആദ്യ ഐപിഎല്ലിലെ ഏറ്റവും മികച്ച ടീമായിരുന്നു ചെന്നൈ സൂപ്പര്കിംഗ്സ്. ആ ടീമിനെക്കുറിച്ച് ധോണി പറഞ്ഞു. ഓസ്ട്രേലിയയിലെ ഇതിഹാസതാരങ്ങളായ ഹെയ്ഡന്, മൈക്ക് ഹസി, ശ്രീലങ്കയുടെ ഇതിഹാസ സ്പിന്നര് മുത്തയ്യ മുരളീധരന് തുടങ്ങിയ വമ്പന്മാരായിരുന്നു അന്ന് സിഎസ്കെയ്ക്കായി കളിച്ച താരങ്ങള്. ''അക്കാലത്തെ ഏറ്റവും ബാലന്സിംഗായ ടീമായിരുന്നു സിഎസ്കെ. മികച്ച അനേകം ഓള്റൗണ്ടര്മാര് ടീമിലുണ്ടായിരുന്നു. പരിചയസമ്പന്നരുടെ ഒരു കോട്ടയായിരുന്നു. മാത്യൂ ഹെയ്ഡന്, മൈക്ക് ഹസി, മുത്തയ്യാ മുരളീധരന്, മഖായ എന്റിനി, ജേക്കബ് ഓറം തുടങ്ങിയവരെല്ലാം ടീമിലുണ്ടായിരുന്നു. ഇവരെയെല്ലാം പരസ്പരം കൊണ്ടുവരിക എന്നത് വലിയ വെല്ലുവിളിയായിരുന്നു.'' ധോണി പറഞ്ഞു.
ഐപിഎല് വിദേശകളിക്കാരെ ഒരുപാട് മനസ്സിലാക്കാന് അവസരം നല്കി. എതിര്ടീമിലെ കളിക്കാരുമായി ഞാന് അധികം സംസാരിക്കാറില്ല. എന്നാല് ഐപിഎല് മറ്റു രാജ്യങ്ങളിലെയും ടീമുകളിലെയും കളിക്കാരെ കൂടി മനസ്സിലാക്കാന് അവസരം നല്കി. അവര് എന്താണ് ക്രിക്കറ്റിനെക്കുറിച്ച് ചിന്തിക്കുന്നതെന്നും അവരുടെ സംസ്ക്കാരം എങ്ങിനെയാണെന്നും മനസ്സിലാക്കാന് അവസരം നല്കി. ഇതെല്ലാമാണ് ഐപിഎല്ലിനെ രസകരമാക്കുന്ന ഘടകങ്ങളെന്നും ധോണി പറഞ്ഞു.
ഒരു ടീമിനെ നയിക്കുമ്പോള് കളിക്കാര് പരസ്പരം മനസ്സിലാക്കുന്നു എന്നത് വളരെ പ്രധാനമാണ്. ഒരിക്കല് ഓരോ വ്യക്തികളെ തിരിച്ചറിഞ്ഞാല് അവരുടെ ശക്തിയും ദൗര്ബല്യവും മനസ്സിലാക്കാന് എളുപ്പമാണ്. ടീമിനെ യഥാര്ത്ഥ ദിശയിലേക്ക് ചലിപ്പിക്കാന് ഇത് വളരെ എളുപ്പമാണെന്ന് അദ്ദേഹം പറഞ്ഞു. 2010 മുതല് 2023 വരെ അഞ്ച് ഐപിഎല് കിരീടങ്ങളാണ് ധോണി ചെന്നൈ സൂപ്പര്കിംഗ്സ് ഷോക്കേസില് എത്തിച്ചത്. ഇൗ അഞ്ചു കിരീടത്തിന് പുറമേ 2010 ലൂം 2014 ലും ചാംപ്യന്സ് ലീഗ് ടി20 കിരീടവും ധോണിക്ക് കീഴില് ചെന്നൈ നേടിയിരുന്നു.
