തിരുവനന്തപുരം: സംസ്ഥാനത്ത് ഇന്ന് മുതല് ഡ്രൈവിങ് ടെസ്റ്റുകള്ക്ക് നിയന്ത്രണം. ഒരുകേന്ദ്രത്തില് 50 പേരുടെ ടെസ്റ്റ് നടത്തിയാല് മതിയെന്ന് കെബി ഗണേഷ് കുമാര് നിര്ദേശിച്ചു. ദിവസവും 180 എണ്ണം വരെയുണ്ടായിരുന്ന ടെസ്റ്റുകളാണ് വെട്ടിക്കുറച്ചത്. ഇന്നലെ ചേര്ന്ന ആര്ടിഒമാരുടെ യോഗത്തിലാണ് മന്ത്രിയുടെ നിര്ദേശം.
മെയ് ഒന്ന് മുതലുള്ള ഡ്രൈവിംഗ് ടെസ്റ്റിലെ മന്ത്രിയുടെ നിർദ്ദേശങ്ങളോട് ഡ്രൈവിംഗ് സ്കൂള് ഉടമകള് സഹകരിക്കുന്നില്ല. ഡ്രൈവിംഗ് ടെസ്റ്റ് ബഹിഷ്ക്കരിക്കാനുള്ള തീരുമാനം ഡ്രൈവിംഗ് സ്കൂള് സംഘടനകളെടുക്കാൻ സാധ്യതയുണ്ട്. അവസാന ട്രിപ്പ് മുടക്കുന്ന സ്വകാര്യ ബസ്സുകളുടെയും റോഡ് വികസന കരാർ ഏറ്റെടുത്ത കമ്പനികളുടെ വാഹനങ്ങള് നിയമലംഘനം നടത്തുന്നുണ്ടെങ്കിൽ പെർമിറ്റ് റദ്ദാക്കാനും നിദ്ദേശം നൽകി.
സംസ്ഥാനത്തെ ഡ്രൈവിങ് ടെസ്റ്റ് പരിഷ്കരിക്കുമെന്നു കെബി ഗണേഷ് കുമാര് ഗതാഗത മന്ത്രിയായി ചുമതലയേറ്റയുടന് പ്രഖ്യാപിച്ചിരുന്നു. ഇതിനായി 10 അംഗ കമ്മിറ്റിയെയും രൂപീകരിച്ചിരുന്നു. കമ്മിറ്റിയുടെ റിപ്പോര്ട്ട് വിശദമായി പഠിച്ചാണ് പരിഷ്കാരങ്ങള് വരുത്തിയത്.
ഇരുചക്ര വാഹനങ്ങളുടെ ടെസ്റ്റിന് കൈ കൊണ്ട് ഗിയറ് പ്രവര്ത്തിപ്പിക്കുന്ന വാഹനത്തിന് പകരം കാലില് ഗിയറുള്ള വാഹനം നിര്ബന്ധമാക്കി. കാര് ലൈസന്സ് എടുക്കാന് ഓട്ടോമാറ്റിക് ഗിയറുള്ള വാഹനം, ഇലക്ട്രിക് വാഹനം ഉപയോഗിക്കാന് പാടില്ല.
