സംസ്ഥാനത്ത് ബയോമൈനിംഗ് സാങ്കേതികവിദ്യ ഉപയോഗപ്പെടുത്തി 20 നഗരസഭകളിലെ ലെഗസി ഡമ്പ് സൈറ്റുകള് നീക്കം ചെയ്യുന്നതിനായി നാഗ്പൂരിലെ കമ്പനിയുമായി 95.24 കോടി രൂപയുടെ കരാറില് കേരള സര്ക്കാര് ഒപ്പുവച്ചു. ലോക ബാങ്ക് സഹായത്തോടെ പ്രവര്ത്തിക്കുന്ന കേരള ഖരമാലിന്യ പരിപാലന പദ്ധതിയുടെ ഭാഗമാണിത്. കെഎസ് ഡബ്ല്യുഎംപി ഓഫീസില് നടന്ന ചടങ്ങില് തദ്ദേശ സ്വയംഭരണ വകുപ്പ് മന്ത്രി എം ബി രാജേഷിന്റെ സാന്നിധ്യത്തില് കെഎസ് ഡബ്ല്യുഎംപി പ്രോജക്ട് ഡയറക്ടര് ഡോ.ദിവ്യ എസ് അയ്യര് എസ്എംഎസ് ലിമിറ്റഡുമായി കരാര് ഒപ്പുവച്ചു.
മാലിന്യമുക്തം നവകേരളം എന്ന ലക്ഷ്യത്തിലേക്കുള്ള നിര്ണായക ചുവടുവയ്പാണിത്. മാലിന്യക്കൂനകള് പദ്ധതി യാഥാര്ഥ്യമാകുന്നതോടെ ഇല്ലാതാകുമെന്നു മാത്രമല്ല കേരളത്തിലെ നഗരങ്ങളിലെ 60 ഏക്കറില്പരം ഭൂമി വീണ്ടെടുത്ത് ശുചിത്വ പ്രവര്ത്തനങ്ങള്ക്കായി വിനിയോഗിക്കാനുമാകുമെന്നും മന്ത്രി പറഞ്ഞു. മാലിന്യം ശാസ്ത്രീയവും സുസ്ഥിരവുമായ രീതിയില് നീക്കം ചെയ്യാനാകുന്നുവെന്നതാണ് ബയോമൈനിംഗ് സാങ്കേതികവിദ്യ പ്രയോജനപ്പെടുത്തുന്നത് കൊണ്ടുളള പ്രയോജനമെന്നും കെഎസ് ഡബ്ല്യുഎംപിയുടെ മാലിന്യ നിര്മ്മാര്ജ്ജന പ്രവര്ത്തനത്തില് നാഴികക്കല്ലാണിതെന്നും ഡോ.ദിവ്യ എസ് അയ്യര് പറഞ്ഞു.
കായംകുളം, കൊട്ടാരക്കര, കൂത്താട്ടുകുളം, കോതമംഗലം, മൂവാറ്റുപുഴ, വടക്കന് പറവൂര്, കളമശ്ശേരി, വടകര, കല്പ്പറ്റ, ഇരിട്ടി, കൂത്തുപറമ്പ്, കാസര്ഗോഡ്, മാവേലിക്കര, കോട്ടയം, ചാലക്കുടി, കുന്നംകുളം, വടക്കാഞ്ചേരി, പാലക്കാട്, മലപ്പുറം, മഞ്ചേരി എന്നീ നഗരസഭകളില് പദ്ധതി നടപ്പാക്കും. ഒരു വര്ഷത്തിനുള്ളില് പദ്ധതി പൂര്ത്തീകരിക്കും. 95.24 കോടി രൂപയാണ് പദ്ധതിച്ചെലവ്.
