ന്യൂഡല്ഹി: ലോക്സഭാ തെരഞ്ഞെടുപ്പ് തീയതികളും സമയക്രമവും കേന്ദ്ര തെരഞ്ഞെടുപ്പ് കമ്മിഷന് ഇന്ന് ഉച്ചകഴിഞ്ഞ് മൂന്നിനു പ്രഖ്യാപിക്കും.
കാലാവധി അവസാനിക്കുന്ന നാല് നിയമസഭകളിലേക്കുള്ള തെരഞ്ഞെടുപ്പും ഇതോടൊപ്പം നടത്തുമെന്നു കമ്മിഷന് വ്യക്തമാക്കി. തെരഞ്ഞെടുപ്പ് തീയതികള് പ്രഖ്യാപിക്കുന്നതോടെ മാതൃകാ പെരുമാറ്റച്ചട്ടവും നിലവില്വരും.അരുണാചല്പ്രദേശ്, ആന്ധ്രാപ്രദേശ്, ഒഡീഷ, സിക്കിം എന്നീ സംസ്ഥാനങ്ങളാണു പൊതുതെരഞ്ഞെടുപ്പിനൊപ്പം പോളിങ് ബൂത്തിലേക്കു നീങ്ങുക. മഹാരാഷ്ട്ര, ഹരിയാന, ഝാര്ഖണ്ഡ് നിയമസഭകളിലേക്ക് ഈവര്ഷം ഒടുവില് തെരഞ്ഞെടുപ്പ് നടക്കും.
ജമ്മു കശ്മീരിനും ലഡാക്കിനും സംസ്ഥാനപദവി പുനഃസ്ഥാപിച്ച് സെപ്റ്റംബര് 30-നകം തെരഞ്ഞെടുപ്പ് നടത്തണമെന്ന സുപ്രീം കോടതി ഉത്തരവ് നിലവിലുണ്ട്. എന്നാല്, ഇത് പൊതുതെരഞ്ഞെടുപ്പിനൊപ്പം നടപ്പാക്കുമോയെന്നു വ്യക്തമല്ല.പശ്ചിമബംഗാളിലെ 42 ലോക്സഭാമണ്ഡലങ്ങളിലേക്ക് ഒറ്റഘട്ടമായി വോട്ടെടുപ്പ് നടത്തണമെന്നു മമതാ ബാനര്ജി സര്ക്കാര് ആവശ്യപ്പെട്ടിട്ടുണ്ട്.
കേന്ദ്രസേനകളെ വിന്യസിച്ച് വോട്ടര്മാരെ ഭീഷണിപ്പെടുത്താന് അനുവദിക്കില്ലെന്നാണു ഭരണകക്ഷിയായ തൃണമൂല് കോണ്ഗ്രസിന്റെ നിലപാട്.
