ഭോപ്പാല്: മധ്യപ്രദേശിലെ ഉജ്ജൈനില് ഹോളി പൂജയ്ക്കിടെ ക്ഷേത്രത്തിലുണ്ടായ തീപിടുത്തത്തില് 14 പൂജാരിമാര്ക്ക് പൊള്ളലേറ്റു. മഹാകാലേശ്വര് ക്ഷേത്രത്തിലാണ് തിങ്കളാഴ്ച പുലര്ച്ചെ തീപിടുത്തമുണ്ടായത്. ശ്രീകോവിലില് ഭസ്മ ആരതിക്കിടെയാണ് തീപിടുത്തം.
ഹോളി ആഘോഷത്തിനിടെ വാരിയെറിഞ്ഞ വര്ണ്ണപ്പൊടികള് കര്പ്പൂരം എരിഞ്ഞുകൊണ്ടിരുന്ന താലത്തില് വീഴുകയും കര്പ്പൂരം നിലത്ത് വീണ് തീ പടരുകയുമായിരുന്നു. ക്ഷേത്രത്തിലെ സിസിടിവിയില് തീപിടുത്തത്തിന്റെ ദൃശ്യങ്ങള് ലഭ്യമാണ്.
പൊള്ളലേറ്റവരില് ചിലരെ ഇന്ഡോറിലെ ആശുപത്രിയിലേക്ക് മാറ്റി. ചിലര് ജില്ലാ ആശുപത്രിയിലും ചിിത്സയിലുണ്ട്. സംഭവത്തില് കലക്ടര്തല അന്വേഷണത്തിന് ഉത്തരവിട്ടു. മൂന്ന് ദിവസത്തിനകം റിപ്പോര്ട്ട് സമര്പ്പിക്കണം.
