അടിമാലി: സൗന്ദര്യം ഒളിപ്പിക്കുന്ന സ്വപ്നഭൂമിയായ മൂന്നാറിന്റെ തേയില മലനിരകളില് നീലവസന്തം വിരിച്ച് ജക്രാന്ത പൂക്കള് കണ്ണിനും മനസിനും കുളിര്മ സമ്മാനിക്കുന്നു. കൊച്ചി-ധനുഷ്ക്കോടി 85 ദേശീയപാതയില് പള്ളിവാസല് മുതല് ഹെഡ് വര്ക്സ് അണക്കെട്ടുവരെയുള്ള ഭാഗത്തും മൂന്നാര് -മറയൂര് റോഡില് വാഗുവെരെ ഭാഗത്തുമാണ് ഏറ്റവും അധികം മരങ്ങള് പൂവിട്ടിട്ടുള്ളത്.
കൊളോണിയല് ഭരണകാലത്ത് ബ്രിട്ടീഷുകാര് നട്ടുപിടിപ്പിച്ച മരങ്ങളാണ് ഇന്ന് മൂന്നാറില് കാണുന്നതിലധികവും. ബയഗ്നോനീസ്യ പൂമര കുടുംബത്തിലെ ഒരു ഇനമാണ് നീലവാക എന്നറിയപ്പെടുന്ന ജക്രാന്ത. കേരളത്തില് ഏറ്റവും അധികം ജക്രാന്ത മരങ്ങള് ഉള്ളത് മൂന്നാര്, മറയൂര്, ദേവികുളം മേഖലകളിലാണ്. ജക്രാന്തയുടെ വിദൂരദൃശ്യം സന്ദര്ശകര്ക്ക് ഏറെ ഹൃദ്യമായ അനുഭവമാണ് പകര്ന്നു നല്കുന്നത്.
പച്ച ഇലകളില്ലാത്ത ഒരു വലിയ മരത്തിന്റെ പൂര്ണമായ നീലനിറം നല്കുന്ന നിലയിലാണ് നീലവാഗമരങ്ങള്. ശാസ്ത്രീയനാമം ജക്രാന്ത മിമോസിഫോളിയ എന്നാണ്. പ്രദേശമാകെ പൂത്തുനില്ക്കുന്ന വന്മരങ്ങളുടെ കാഴ്ച കാണാന് സഞ്ചാരികളുടെ വലിയ തിരക്കാണ് ഇപ്പോള് അനുഭവപ്പെടുന്നത്. മൂന്നാറില് ഏറ്റവും അധികം ചൂടു ലഭിക്കുന്ന സമയമായ ഫെബ്രുവരി മുതല് ഏപ്രില് മാസം വരെയുള്ള മൂന്നു മാസത്തേക്കെങ്കിലും പൂക്കള് ഉണ്ടാകുമെന്നാണ് പ്രതീക്ഷിക്കുന്നത്. ഏപ്രില് മാസമാണ് പൂക്കള് ഏറെയും ഉണ്ടാവുക.
പ്രദേശവാസികള് പറയുന്നതനുസരിച്ച്, ജക്രാന്ത മരങ്ങള് ബ്രിട്ടീഷുകാര് ഒരു അലങ്കാരവൃക്ഷമായി നട്ടുപിടിപ്പിച്ചതാണ്. ദക്ഷിണാഫ്രിക്കയില് പ്രിട്ടോറിയ സര്വകലാശാലയില് ഒരു വിശ്വാസമുണ്ടത്രെ. വര്ഷാന്ത്യ പരീക്ഷയ്ക്ക് എത്തുന്ന വിദ്യാര്ഥികളുടെ മേല് തെരുവിന്റെ ഇരുവശങ്ങളിലും പൂത്തുലഞ്ഞു നില്ക്കുന്ന ജക്രാന്ത പൂക്കള് കൊഴിഞ്ഞ് ദേഹത്തുവീണാല് ഉന്നത മാര്ക്ക് ലഭിക്കുമത്രെ. പ്രിട്ടോറിയ നഗരത്തില് നിറയെ നീലവാഗമരങ്ങള് പൂത്തുലഞ്ഞുനില്ക്കുന്ന കാഴ്ച ലോകപ്രസിദ്ധമാണ് അമേരിക്കന് സ്വദേശിയായ ഈ വൃക്ഷം മെക്സിക്കോ, അമേരിക്ക, അര്ജന്റീന തുടങ്ങിയ രാജ്യങ്ങളിലും കൂടുതലായി കാണപ്പെടുന്നുണ്ട്. മൂന്നാറിലും ഏപ്രില് മാസത്തില് സമാനമായ സഹചര്യമാണുള്ളത്.
മൂന്നാറിന്റെ നനുത്ത മഞ്ഞിന്റെ കുളിരില് പച്ചവിരിച്ച തേയിലത്തോട്ടങ്ങള്ക്കിടക്ക് വയലറ്റ് കലര്ന്ന നീലമരങ്ങള് വ്യാപകമായി നില്ക്കുന്നത് ഏതൊരു സഞ്ചാരിയുടെയും മനസ് കീഴടക്കുന്നതാണ്. മുന്പ് ഔഷധ കൂട്ടായും ജക്രാന്തപ്പൂക്കള് ഉപയോഗിച്ചിരുന്നതായി ചരിത്രമുണ്ട്. മൂന്നാര് മേഖലയില് ഏറ്റവും അധികം പൂക്കള് ഉള്ളത് വാഗുവെരെ മേഖലയിലാണ്. തമിഴില് വെരെ എന്നു പറഞ്ഞാല് പാറക്കൂട്ടം എന്നാണ്. പാറക്കൂട്ടങ്ങള്ക്കിടയിലാണ് നീല വാഗമരവസന്തം ഏറെയുള്ളത്. മൂന്നാറിന്റെ പ്രണയാര്ദ്രമായ ഈ ചേര്ത്തുപിടിക്കല് ആവോളം ആസ്വദിക്കാന് ഇനി സഞ്ചാരികളുടെ ഒഴുക്കാണ് മൂന്നാറിലേക്ക്.
