അടിമാലി: മീന് പിടിക്കുന്നതിനിടെ പുഴയില് യുവാവ് മുങ്ങിമരിച്ച സംഭവത്തില് ദുരൂഹതയെന്ന് പിതാവിന്റെ പരാതി. ഇരുമ്പുപാലം പടിക്കപ്പ് ഞണ്ടാല സ്വദേശി താഴത്തുപുരക്കല് ജോസ് - അച്ചാമ്മ ദമ്പതികളുടെ മകന് ജോസ്ബിന്(25) ആണ് ഈ മാസം 24 ന് മരിച്ചത്.
ഇരുമ്പുപാലം മെഴുകുംചാല് പാലത്തിനു സമീപം സുഹൃത്തുക്കളായ മറ്റ് രണ്ടു പേരും ചേര്ന്നു വലകെട്ടി മീന് പിടിക്കുന്നതിനിടെ വലയില് കുരുങ്ങുകയായിരുന്നുവെന്ന് ഒപ്പമുണ്ടായിരുന്നവര് പറഞ്ഞിരുന്നു. ഞായറാഴ്ച രാത്രിയിലായിരുന്നു സംഭവം നടന്നത്.
സുഹൃത്തുക്കളും നാട്ടുകാരും ചേര്ന്ന് താലൂക്കാശുപത്രിയില് എത്തിച്ചെങ്കിലും രക്ഷിക്കാനായിരുന്നില്ല. യുവാവിന്റെ മരണത്തില് ദുരൂഹതകള് ഉണ്ടെന്ന് പരാതി ലഭിച്ചതിനെ തുടര്ന്ന് ഡിവൈ.എസ്.പി: ജില്സന് മാത്യു അടക്കമുള്ള ഉന്നത ഉദ്യോഗസ്ഥര് സ്ഥലത്തെത്തി തെളിവെടുത്തു. ഇവരുടെ സുഹൃത്തുക്കളില് ഒരാളുടെ മുന്കാല ഇടപെടലുകള് ആണ് സംശയത്തിന് ആക്കം കൂട്ടിയിട്ടുള്ളതത്രെ.
ഇയാളുടെ കൂടെ മുമ്പ് മീന്പിടിക്കാന് കൂട്ടുപോയ യുവാവ് മരണപ്പെട്ടിരുന്നു. ജോസ്ബിന് മരിച്ചതിന് സാമാനമായ സാഹചര്യത്തിലാണ് അന്ന് യുവാവിന് ജീവന് നഷ്ടപ്പെട്ടതെന്നാണ് വിവരം. ഇതിനു പുറമേ ജോസ്ബിന്റെ കുടുംബവുമായി ശത്രുതയില് കഴിയുന്ന കുടുംബവും സംശയ നിഴലിലാണ്. ഉന്നത പോലീസ് സംഘം പുഴയില് ജോസ്ബിന് അപകടത്തില്പ്പെട്ട ഭാഗത്ത് വിശദമായ പരിശോധന നടത്തി.
വെള്ളത്തിന്റെ ആഴം, താഴ്ഭാഗത്തെ പ്രതലഘടന എന്നിവയടക്കം പരിശോധിച്ചു. നല്ല ആഴമുള്ള ഭാഗത്താണ് യുവാവ് മുങ്ങിപ്പോയത് എന്ന് പരിശോധനകളില് വ്യക്തമായി. ഈ ഭാഗത്ത് പുഴയില് കല്ലുകള് ഉണ്ടെന്നും കണ്ടെത്തി. മരണ കാരണം വെള്ളം ഉള്ളില്ച്ചെന്നതാണെന്നും തലയില് പരുക്കേറ്റിരുന്നെന്നും പോസ്റ്റുമോര്ട്ടത്തിനു ശേഷം വ്യക്തമായിട്ടുണ്ട്.
വിശദമായി റിപ്പോര്ട്ട് ലഭിച്ച ശേഷം കൂടുതല് വിശദമായ അന്വേഷണം നടക്കും. പുഴയില് മുങ്ങിത്താണപ്പോള് തല കല്ലില് ഇടിച്ചിരിക്കാമെന്നാണു പോലീസിന്റെ നിഗമനം. അപകടസമയത്ത് കൂടെയുണ്ടായിരുന്നവരെ ഉദ്യോഗസ്ഥ സംഘം തുടര്ച്ചയായി ചോദ്യം ചെയ്തെങ്കിലും കൂടുതല് വിവരം ലഭ്യമായിട്ടില്ല. സംഭവത്തില് പ്രത്യേക അന്വേഷണ സംഘത്തെ നിയോഗിക്കേണ്ട ആവശ്യകത അടക്കം പരിശോധിക്കുന്നുണ്ട്.
