രാജ്യത്തിന്റെ പലയിടത്തും വന്യജീവി ആക്രമണം രൂക്ഷമായി വരുകയാണ്. ദിവസവും ഭയം ജനിപ്പിക്കുന്ന നൂറു കണക്കിന് വാര്ത്തകളാണ് ഇവയുടെ ആക്രമണവുമായി ബന്ധപ്പെട്ട് പുറത്തുവന്നുകൊണ്ടിരിക്കുന്നത്. ഇപ്പോഴിതാ സമാനമായ ഒരു വാര്ത്തയാണ് സമൂഹ മാധ്യമങ്ങളില് ഞെട്ടല് സൃഷ്ടിച്ചിരിക്കുന്നത്. രാജസ്ഥാനിലെ ദുംഗര്പൂരിലെ ഒരു ഗ്രാമത്തില് റിപ്പോര്ട്ടിംഗിന് പോയ ഒരു മാധ്യമപ്രവര്ത്തകന് വന്യജീവി ആക്രമണം നേരിട്ട വാര്ത്തയാണിത്. ഒരു പുള്ളിപ്പുലിയുടെ അക്രമണത്തില് നിന്നും ഈ മാധ്യമപ്രവര്ത്തകന് തലനാരിഴയ്ക്കാണ് രക്ഷപ്പെട്ടത്.
ഭദര് വനമേഖലയ്ക്ക് സമീപമുള്ള ഗാഡിയ ഭദര് മെത്വാല ഗ്രാമത്തില് മാര്ച്ച് 31 -ന് ഒരു വാര്ത്ത റിപ്പോര്ട്ട് ചെയ്യാന് പോയതായിരുന്നു ഇയാള്. അപ്പോഴാണ് അപ്രതീക്ഷിതമായി പുള്ളിപ്പുലിയുടെ ആക്രമണം ഉണ്ടായത്. ആത്മവിശ്വാസം കൈവിടാത്തതും അസാമാന്യമായ ധൈര്യവുമാണ് പുള്ളിപ്പുലിയുടെ കയ്യില് നിന്നും ജീവനോടെ രക്ഷപ്പെടാന് മാധ്യമപ്രവര്ത്തകന് തുണയായത്. ഗ്രാമത്തിലെ ഒരു വീടിന് പിന്നിലെ കുളത്തിന് സമീപം വച്ച് ഒരു നീലക്കാളയെ വേട്ടയാടുകയായിരുന്നു പുള്ളിപ്പുലി. സംഭവം ശ്രദ്ധയില്പ്പെട്ടതോടെ നാട്ടുകാര് സ്ഥലത്ത് തടിച്ചുകൂടി. പിന്നാലെ, ഇവര് തന്നെ വനംവകുപ്പിനെ വിവരമറിയിച്ചു.
സംഭവം അറിഞ്ഞ് റിപ്പോര്ട്ട് ചെയ്യാന് എത്തിയതായിരുന്നു പ്രാദേശിക മാധ്യമപ്രവര്ത്തകനായ ഗുണ്വന്ത് കലാല്. ഗ്രാമവാസികള് കല്ലെറിഞ്ഞ് പുലിയെ വിരട്ടിയോടിക്കാന് ശ്രമിക്കുകയായിരുന്നു. എന്നാല്, പ്രകോപിതനായ പുലി നാട്ടുകാര്ക്ക് നേരെ തിരിഞ്ഞു. അവിടെ നില്ക്കുകയായിരുന്ന കലാലിന്റെ കാലില് അത് കടിച്ചു. എന്നാല്, അപ്രതീക്ഷിതമായ നീക്കത്തില് പതറാതെ കലാല് തന്റെ മറ്റേകാല് ഉപയോഗിച്ച് പുള്ളിപ്പുലിയെ നേരിട്ടു. ഒപ്പം അതിന്റെ കഴുത്തിലും താടിയെല്ലിലും പിടിത്തമിട്ടു. അതോടെ നാട്ടുകാരും ഇയാളുടെ രക്ഷക്കെത്തി. പുലിയെ കയര് ഉപയോഗിച്ച് കെട്ടിയിട്ടു. പിന്നീട്, വനം വകുപ്പില് നിന്നുമുള്ള ഉദ്യോഗസ്ഥരെത്തും വരെ പുലിയെ നാട്ടുകാര് വിടാതെ പിടിച്ചുവച്ചു.
അപകടകരമായ സംഭവത്തിന്റെ ദൃശ്യങ്ങളും ഇതിനോടകം സമൂഹ മാധ്യമങ്ങളില് ശ്രദ്ധ നേടിക്കഴിഞ്ഞു.നിരവധി ആളുകളാണ് മാധ്യമപ്രവര്ത്തകന്റെ ധൈര്യത്തെ അഭിനന്ദിച്ച് രംഗത്തെത്തിയത്.
जिंदा पैथर #बघेरे का गला दबा उस पर बैठ गया!!
शायद पहला मामला#डूंगरपुर #राजस्थान से@dsrajpurohit291 pic.twitter.com/BTmzu9ccIx— Doonger Singh (@dsrajpurohit291) March 31, 2024
