തൃശൂര്: ഇടുക്കി, താമരശ്ശേരി രൂപതകളുടെ കേരള സ്റ്റോറി പ്രദര്ശിപ്പിക്കാനുള്ള തീരുമാനം ക്രിസ്ത്യന് സമുദായത്തില് പലരും ബിജെപിയോട് അടുക്കുന്നതിന്റെ ഉദാഹരണമായി കണക്കാക്കാമെന്ന് കോണ്ഗ്രസില് നിന്നും ബിജെപിയിലേക്ക് ചേക്കേറിയ പത്മജ വേണുഗോപാല്. ന്യൂനപക്ഷത്തിന് ബിജെപിയെക്കുറിച്ചുള്ള തെറ്റിദ്ധാരണ മാറ്റാന് പാര്ട്ടിക്ക് കഴിഞ്ഞിട്ടുണ്ടെന്നും പത്മജ പറഞ്ഞു.
ന്യൂനപക്ഷങ്ങള് ബിജെപിയോട് അടുത്തുകൊണ്ടിരിക്കുകയാണ്. വടക്കേ ഇന്ത്യയിലൊക്കെ ഏറ്റവും കൂടുതല് മുസ്ലിം സ്ത്രീകളാണ് മോദിയെ സ്നേഹിക്കുന്നത്. കേരളത്തിന് എന്തുപറ്റിയെന്നാണ് അവര് ചോദിക്കുന്നത്. നിങ്ങളോട് മോദി എന്ത് തെറ്റ് ചെയ്തുവെന്നാണ് ചോദിച്ചത്. ആരാണ് ഉപകാരം ചെയ്യുന്നത് അവര്ക്കൊപ്പം ജനങ്ങള് നില്ക്കുമെന്നും പത്മജ വേണുഗോപാല് പ്രതികരിച്ചു.
ബിജെപിയിലേക്ക് ഇനിയും കോണ്ഗ്രസില് നിന്നും ആളുകള് വരും. ഒറ്റ രാത്രി മതി കാര്യങ്ങള് മാറിമറിയാന്നെനും പറഞ്ഞു. താന് ബിജെപിയിലേക്ക് പോകാന് തീരുമാനിച്ചത് ഒരു രാത്രിയാണ്. തലേ ദിവസം വരെ കോണ്ഗ്രസിന് വേണ്ടി പ്രവര്ത്തിച്ചിരുന്നു. ഒരു രാത്രി മതി കാര്യങ്ങള് മാറി മറിയാന്. ഇനിയും ബിജെപിയിലേക്ക് ആളുകള് വരും എന്നുറപ്പുണ്ട്.
വിവാദചിത്രം 'ദി കേരളാസ്റ്റോറി' സിനിമ ഏറെ പ്രസക്തമാണ് തെറ്റും ശരിയും ഏതാണെന്ന് മനസ്സിലാക്കാന് ഈ സന്ദേശം കുട്ടികള്ക്ക് നലകുന്നത് നല്ലതാണെന്നും ഇന്നത്തെ തലമുറ പലതും പഠിക്കേണ്ടതുണ്ടെന്നും പത്മജ വേണുഗോപാല് കൂട്ടിച്ചേര്ത്തു. കേരളത്തില് ലൗജിഹാദ് ഉണ്ടെന്നും പത്മജ പറഞ്ഞു. എന്നാല് പറയുന്നത്ര ഭീകരമല്ലെന്ന് മാത്രം. തന്റെ ചില സുഹൃത്തുക്കളുടെ മക്കള്ക്ക് ഇത് സംഭവിച്ചിട്ടുണ്ടെന്നും പല അച്ഛനമ്മമാരും തന്നോട് സങ്കടം പറഞ്ഞിട്ടുണ്ടെന്നും ഇത് സംബന്ധിച്ച അന്വേഷണം നടത്തേണ്ടതുണ്ടെന്നും പറഞ്ഞു.
