ആലപ്പുഴ: ലോക്സഭാ തെരഞ്ഞെടുപ്പ് പ്രവര്ത്തനങ്ങള്ക്കിടെ സി.പി.എമ്മിനെ വെട്ടിലാക്കി ആലപ്പുഴ ജില്ലാ പഞ്ചായത്ത് മുന് വൈസ് പ്രസിഡന്റിന്റെ കത്ത്. ആര്.എസ്.എസ് പ്രവര്ത്തകനായിരുന്ന കായംകുളം സ്വദേശി സത്യന്റെ കൊലപാതകം പാര്ട്ടി ആലോചിച്ചു നടത്തിയതാണെന്ന ആലപ്പുഴ ജില്ലാ പഞ്ചായത്തംഗം കൂടിയായ ബിപിന്.സി.ബാബുവിന്റെ വെളിപ്പെടുത്തലാണ് വിവാദമാകുന്നത്. പാര്ട്ടി സംസ്ഥാന സെക്രട്ടറി എം.വി ഗോവിന്ദന് ബിപിന് അയച്ച കത്തിലാണ് ഇതുസംബന്ധിച്ച പരാമര്ശമുള്ളത്.
സി.പി.എം കായംകുളം ഏരിയാ കമ്മിറ്റിയിലെ മുന് അംഗവും ജില്ലാ പഞ്ചായത്തംഗവുമായ ബിപിന്.സി. ബാബു മാര്ച്ച് 26നാണ് സംസ്ഥാന സെക്രട്ടറിക്ക് കത്ത് അയച്ചത്. ജില്ലാ പഞ്ചായത്ത് ലെറ്റര് പാഡില് ബിപിന് ഒപ്പിട്ട് അയച്ച കത്തിലാണ് പാര്ട്ടി ആലോചിച്ചു നടത്തിയ ആര്.എസ്.എസ് പ്രവര്ത്തകനായിരുന്ന സത്യന്റെ കൊലക്കേസില് നിരപരാധിയായിരുന്ന തന്നെ പ്രതിയാക്കിയതിനെ തുടര്ന്ന് 19-ാം വയസില് 65 ദിവസം ജയില്വാസം അനുഭവിച്ചിട്ടുണ്ടെന്ന് പരാമര്ശിക്കുന്നത്. സി.പി.എം ജില്ലാ സെക്രട്ടേറിയേറ്റംഗം കെ.എച്ച് ബാബുജാന് വ്യക്തിപരമായി ഒതുക്കാന് ശ്രമിക്കുന്നെന്നും കുടുംബപ്രശ്നം ആളിക്കത്തിക്കാന് ശ്രമിക്കുന്നെന്നും പരാതിപ്പെടുന്ന കത്തിലാണ് സത്യന്റെ കൊലപാതകം പാര്ട്ടി ആലോചിച്ച് നടത്തിയതാണെന്ന വെളിപ്പെടുത്തലുള്ളത്.
ഭാര്യയുടെ ഗാര്ഹിക പീഡന പരാതിയില് സസ്പെന്ഡ് ചെയ്യപ്പെട്ട ബിപിനെ അടുത്തിടെ പാര്ട്ടി ബ്രാഞ്ചിലേക്ക് തിരകെ എടുത്തിരുന്നു. ഏരിയ സെന്ററില് പ്രവര്ത്തിച്ച തന്നെ ബ്രാഞ്ചിലേക്ക് തരംതാഴ്ത്തിയത് ബാബുജാന്റെ ഇടപെടലാണെന്നാണ് കത്തിലെ പരാതി. ബിപിന് ബി.ജെ.പിയുമായി ചര്ച്ച നടത്തിയതിന്റെ ഭാഗമാണ് കത്തിലെ ആരോപണമെന്നാണ് മറുവിഭാഗത്തിന്റെ ആക്ഷേപം.
സി.പി.എമ്മില് വീണ്ടും പൊട്ടിത്തെറി. ഏരിയാ കമ്മിറ്റിയംഗങ്ങളായ അമ്മയും മകനും രാജിവച്ചു. ജില്ലാ പഞ്ചായത്തംഗം ബിപിന് സി. ബാബു, ഏരിയാ കമ്മിറ്റിയംഗവും മുന് പത്തിയൂര് ഗ്രാമപഞ്ചായത്ത് പ്രസിഡന്റും മുന് ജില്ലാ പഞ്ചായത്തംഗവുമായിരുന്ന കെ.എല്. പ്രസന്നകുമാരി എന്നിവരാണ് രാജിവച്ചത്. പാര്ട്ടി വിഭാഗീയതയെത്തുടര്ന്നാണ് രാജി എന്നാണു സൂചന. 25 വര്ഷമായി പാര്ട്ടി ഏരിയാ കമ്മിറ്റിയംഗമാണു പ്രസന്നകുമാരി. ജില്ലാ പഞ്ചായത്ത് വൈസ് പ്രസിഡന്റായിരുന്ന ബിപിന് സി. ബാബു അടുത്ത കാലത്ത് ഗാര്ഹിക പീഡനവുമായി ബന്ധപ്പെട്ട് പാര്ട്ടിയില്നിന്നും നടപടി നേരിട്ടിരുന്നു. സസ്പെന്ഷനിലായിരുന്നു അദ്ദേഹത്തിനെതിരായ നടപടി ഈയിടെയാണ് പിന്വലിച്ചത്.
പ്രസന്നകുമാരി കഴിഞ്ഞ ദിവസമാണ് പാര്ട്ടിയില്നിന്നും രാജിവച്ചത്. നേതൃത്വത്തിനെതിരേ രൂക്ഷ വിമര്ശനമാണ് അവര് ഉന്നയിച്ചിട്ടുള്ളത്. സി.പി.എം ജില്ലാ സെക്രട്ടേറിയറ്റംഗം ഉള്പ്പെടെയുള്ളവര് വിഭാഗീയത വളര്ത്തുന്നുവെന്നും രാജിക്കത്തില് പറയുന്നു.
വിഭാഗീയത മൂലം ദളിത്-പിന്നോക്ക വിഭാഗങ്ങളിലെ നൂറു കണക്കിനു പ്രവര്ത്തകര് പാര്ട്ടിയില്നിന്നും അകന്നുനില്ക്കുകയാണെന്നും നിരവധി പേര് പാര്ട്ടി വിടുമെന്നുമാണ് ഇവര് നല്കുന്ന മുന്നറിയിപ്പ്. അതേ സമയം താന് പാര്ട്ടിയില്നിന്നും രാജി വച്ചിട്ടില്ലെന്നും പാര്ട്ടിയിലെ വിവിധ വിഷയങ്ങള് ചൂണ്ടിക്കാട്ടി പാര്ട്ടിക്കു കത്തു നല്കുകയാണ് ചെയ്തതെന്നും ബിപിന്.സി.ബാബു പറഞ്ഞു.
