കാസര്ഗോഡ്: രഹസ്യം പറയാന് രമേശ് ചെന്നിത്തല ഓടിക്കയറിയത് ദേശാഭിമാനി ഓഫീസിലേക്ക്. അറിയാതെയുള്ള ഈ ഓടിക്കയറ്റം സാമൂഹിക മാധ്യമങ്ങളില് ട്രോളുകളായി. ദേശാഭിമാനി ആയാലും പ്രശ്നമില്ല, കേരളത്തില് രണ്ടു തട്ടിലാണെങ്കിലും ദേശീയതലത്തില് കോണ്ഗ്രസും സി.പി.എമ്മും ചങ്കോട് ചങ്കാണല്ലോ എന്ന രീതിയിലുള്ള കമന്റുകള് ആണ് ട്രോളര്മാര് തട്ടിവിട്ടത്.
കാസര്ഗോഡ് പ്രസ് ക്ലബിന്റെ മീറ്റ് ദ് പ്രസിലേക്ക് ക്ഷണിച്ചതനുസരിച്ച് പത്തിലധികം കോണ്ഗ്രസ് നേതാക്കള്ക്കൊപ്പം എത്തിയതായിരുന്നു രമേശ് ചെന്നിത്തല. ഇതിനിടയില് രഹസ്യഫോണ് വന്നപ്പോള് ആള്ക്കൂട്ടത്തില് നിന്നും വിട്ടുമാറി സംസാരിക്കാന് കോണ്ഗ്രസ് നേതാവ് രമേശ് ചെന്നിത്തല കയറിയത് ദേശാഭിമാനി പത്രത്തിന്റെ ബ്യൂറോയില്. ചെന്നിത്തലയ്ക്കൊപ്പം എം.എല്.എമാരായ എന്.എ. നെല്ലിക്കുന്ന്, എ.കെ.എം അഷ്റഫ്, യു.ഡി.എഫ് നേതാക്കളായ കല്ലട്ര മാഹിന് ഹാജി, കെ. നീലകണ്ഠന്, പി.കെ. ഫൈസല് തുടങ്ങിയവരുണ്ടായിരുന്നു.
12 മണിക്കായിരുന്നു പ്രസ് മീറ്റ് നിശ്ചയിച്ചത്. എന്നാല്, കേന്ദ്ര പ്രതിരോധ മന്ത്രി രാജ്നാഥ് സിങ്ങിന്റെ താളിപടുപ്പ് മൈതാനിയിലെ പരിപാടി നിശ്ചയിച്ചതിലും ഏറെ വൈകി. ഈ സമയം പ്രസ്ക്ലബിന്റെ താഴെ ആള്ക്കൂട്ടത്തിനിടയില് സംസാരിക്കുകയായിരുന്ന ചെന്നിത്തലക്ക് നിരവധി ഫോണ് കോളുകള് വന്നുകൊണ്ടിരുന്നു. ഹിന്ദി, ഇംഗ്ലീഷ്, മലയാളം എന്നിങ്ങനെ ഭാഷകള് മാറിമാറിയായിരുന്നു സംസാരം. ഫോണ് കോളുകളുടെയും ചുറ്റുമുള്ളവരുടെയും എണ്ണം വര്ധിച്ചതോടെ സ്വകാര്യത അന്വേഷിച്ച ചെന്നിത്തല കണ്ടത് മുന്നിലെ ദേശാഭിമാനി ഓഫീസ്.
അതിനകത്ത് ഫോട്ടോഗ്രാഫര് രാജശേഖരന് മാത്രമാണുണ്ടായത്.അകത്ത് കയറിയ ചെന്നിത്തല രാജശേഖരനോട് വാതിലടയ്ക്കാന് ആവശ്യപ്പെട്ടു. ഏറെനേരം സംസാരിച്ചശേഷം പുറത്തിറങ്ങിയ ചെന്നിത്തലയോട് ഇരുന്ന സ്ഥലത്തെക്കുറിച്ച് ആരാഞ്ഞപ്പോള്, അതിനെന്താ എന്ന ചിരിയായിരുന്നു മറുപടി. പിന്നീട്, മുകളിലെ പ്രസ് ക്ലബ് ഹാളിലേക്ക് കയറി. തുടര്ന്ന് ഇടതുപക്ഷത്തിനെതിരേ ആഞ്ഞടിക്കുന്ന മറുപടികളുമായി മീറ്റ് ദ് പ്രസ്.
