ന്യൂഡല്ഹി: അന്താരാഷ്ട്ര ഭക്ഷ്യ കമ്പനിയായ നെസ്ലേ ദരിദ്രരാജ്യങ്ങളിലെ കുട്ടികള്ക്കായി വില്പ്പന നടത്തിയിരുന്ന പാല് ഉല്പ്പന്നങ്ങളില് ഉയര്ന്ന അളവില് പഞ്ചസാര ഉപയോഗിച്ചിരുന്നതായി റിപ്പോര്ട്ട്. കുട്ടികള്ക്കുള്ള ഉല്പ്പന്നങ്ങളില് ആരോഗ്യപ്രശ്നത്തിന് കാരണമായി മാറിയേക്കാവുന്ന മധുരമോ പഞ്ചസാരയോ ഉപയോഗിക്കരുതെന്ന ലോകാരോഗ്യസംഘടനയുടെ നിര്ദേശങ്ങളെ മറികടക്കുന്നതാണ് കണ്ടെത്തല്.
അതേസമയം യൂറോപ്യന്രാജ്യങ്ങള് പോലെയുള്ള വലിയ വിപണിയില് പഞ്ചസാര ചേര്ക്കാത്ത ഉല്പ്പന്നവും നല്കി. യൂറോപ്പും യൂകെ യും പോലെയുള്ള പ്രധാന വിപണികളില് പഞ്ചാസാര ചേര്ക്കാത്ത ഉല്പ്പന്നവും ഇന്ത്യ ഉള്പ്പെടെയുള്ള രാജ്യങ്ങളിലേക്ക് അയയ്ക്കുന്ന ഉല്പ്പന്നങ്ങളില് മൂന്ന് ഗ്രാം പഞ്ചസാരയും ചേര്ത്തിരുന്നതായിട്ടാണ് കണ്ടെത്തല് ഏഷ്യ, ആഫ്രിക്ക, ലാറ്റിനമേരിക്ക തുടങ്ങിയ രാജ്യങ്ങളിലേക്ക് അയച്ചിരുന്ന കമ്പനിയുടെ ബേബിഫുഡ് ബെല്ജിയത്തിലെ ലബോറട്ടറിയില് നടത്തിയ പരിശോധനയുടെ ഫലം പുറത്തുവന്നതോടെയാണ് ഈ വിവരം വെളിച്ചത്തായത്.
ഒരു പൊതുതാല്പ്പര്യ സംഘടനയും സ്വിസ് ഇന്വെസ്റ്റിഗേറ്റീവ് ഓര്ഗനൈസേഷനും ഇന്റര്നാഷണല് ബേബിഫുഡ് ആക്ഷന് നെറ്റ്വര്ക്കും (ഇബ്ഫാന്) ചേര്ന്നായിരുന്നു പരിശോധന നടത്തിയത്. 2022 ല് 250 ദശലക്ഷം ഡോളറിന്റെ വില്പ്പനയാണ് കമ്പനി ഇന്ത്യയില് നടത്തിയത്. ഇന്ത്യയില് നടത്തിയ എല്ലാ ഉല്പ്പന്നങ്ങളിലും ശരാശരി മൂന്ന് ഗ്രാം എന്ന കണക്കിലായിരുന്നു പഞ്ചസാര ചേര്ത്തിരുന്നത്.
ആറു മാസം പ്രായമുള്ള കുഞ്ഞുങ്ങള്ക്കായി നെസ്ലേ ജര്മ്മനി, ഫ്രാന്സ്, യുകെ തുടങ്ങിയ രാജ്യങ്ങളില് വില്പ്പന നടത്തിയ സെറിലാക്കില് പഞ്ചസാര തീരെ ചേര്ക്കാത്ത ഗോതമ്പ് ഉള്പ്പെടെയുള്ള ഭക്ഷ്യധാന്യങ്ങള് മാത്രമാണ് ഉപയോഗിച്ചിരുന്നത്. അതേസമയം ആഫ്രിക്കന് രാജ്യമായ എത്യോപ്യയില് കമ്പനി വില്പ്പന നടത്തിയ ഉല്പ്പന്നത്തില അഞ്ച് ഗ്രാം വരെ പഞ്ചസാര ചേര്ത്തപ്പോള് തായ്ലന്റിലേക്ക് അയച്ചതില് ആറ് ഗ്രാമായിരുന്നു പഞ്ചസാരയുടെ അളവ്. സ്വിറ്റ്സര്ലന്റ് പോലെയുള്ള രാജ്യങ്ങളിലേക്ക് അയയ്ക്കുന്നവയില് അല്പ്പം പോലും ചേര്ത്തിരുന്നില്ല.
വളരെ ചെറുപ്രായത്തില് തന്നെ പഞ്ചസാരയുടെ ഉപയോഗം ജീവിതകാലം ഉടനീളമുള്ള ഫലത്തിന് കാരണമാകുമെന്ന് ലോകാരോഗ്യ സംഘടന പറയുന്നു. പൊണ്ണത്തടി ഉള്പ്പെടെയുള്ള പ്രശ്നങ്ങള്ക്ക് ഇത് കാരണമാകുമെന്നും റിപ്പോര്ട്ടില് പറയുന്നു. 2022ല്, ശിശുക്കള്ക്കുള്ള ഭക്ഷ്യ ഉല്പന്നങ്ങളില് ചേര്ത്ത പഞ്ചസാരയും മധുരവും നിരോധിക്കണമെന്ന് ലോകാരോഗ്യ സംഘടന ആവശ്യപ്പെട്ടിരുന്നു. വ്യവസായം അതിന്റെ ഉല്പ്പന്നങ്ങള് പരിഷ്കരിച്ചുകൊണ്ട് 'സജീവമായിരിക്കാനും' 'പൊതുജനാരോഗ്യ ലക്ഷ്യങ്ങളെ പിന്തുണയ്ക്കാനും' അഭ്യര്ത്ഥിച്ചു.
