തിരുവനന്തപുരം: തമിഴ്നാടിന്റെ എതിര്പ്പ് നിലനില്ക്കുമ്പോഴും മുല്ലപ്പെരിയാറില് പുതിയ അണക്കെട്ടിനുള്ള സാധ്യത തേടി കേരളം. ഇതിന്റെ ഭാഗമായി പുതിയ ഡാമിന് വേണ്ടി കേരളത്തിന്റെ ഭാഗത്തുനിന്നുള്ള നടപടികള് പൂര്ത്തിയാക്കാനാണ് ആലോചന.
മുല്ലപ്പെരിയാര് അണക്കെട്ടുമായി ബന്ധപ്പെട്ട പ്രധാന ഹര്ജിയില് സുപ്രീംകോടതി വിധി പറഞ്ഞിട്ടുണ്ടെങ്കിലും ഐക്യരാഷ്ട്രസംഘടനയുടെ റിപ്പോര്ട്ട് ഉള്പ്പെടെ ചൂണ്ടിക്കാട്ടികൊണ്ടുള്ള പുതിയ ഹര്ജികളും നിലവിലുണ്ട്. ഇതിനിടയിലാണ് പുതിയ ഡാമിനുള്ള ശ്രമം കേരളം ആരംഭിച്ചത്.
വിശദമായ പദ്ധതിരേഖ(ഡി.പി.ആര്) തയാറാക്കാന് കേരളം നടപടി ആരംഭിച്ചിട്ടുണ്ട്. ഉടന് തന്നെ ഡി.പി.ആര്. പൂര്ത്തിയാകുമെന്നാണ് അന്തര്സംസ്ഥാന നദീജല വകുപ്പ് പറയുന്നത്. ഡി.പി.ആര്. പൂര്ത്തിയായാലും തമിഴ്നാടിന്റെ കൂടി സമ്മതമുണ്ടെങ്കില് മാത്രമേ മുല്ലപ്പെരിയാറില് പുതിയ അണക്കെട്ട് നിര്മിക്കാനാകൂ. 1300 കോടി രൂപയാണു ഡാമിന് ചെലവു കണക്കാക്കുന്നത്.
തമിഴ്നാടിന്റെ സമ്മതം കൂടി ലഭിച്ചാല് അഞ്ചുവര്ഷത്തിനുള്ളില് പുതിയ ഡാം നിര്മാണം പൂര്ത്തിയാക്കാനാണു ശ്രമം. അന്തര്സംസ്ഥാന നദീജല വകുപ്പ് ചീഫ് എന്ജിനീയറുടെ നേതൃത്വത്തില് തയാറാക്കുന്ന ഡി.പി.ആറില് ഭൂചലനത്തേയും പ്രളയഭീഷണിയേയും നേരിടാന് കഴിയുന്ന ഡാമാണ് വിഭാവനം ചെയ്യുന്നത്. ഡി.പി.ആര്. തയാറാക്കാന് 2021-ലാണ് സര്ക്കാര് ഉത്തരവിറക്കിയത്. അത് നീണ്ടുപോകുകയായിരുന്നു.
126 വര്ഷം പഴക്കമുള്ള നിലവിലെ ഡാമിന് 366 മീറ്റര് താഴെയായാണ് പുതിയ ഡാം നിശ്ചയിച്ചിരിക്കുന്നത്. ഇതിന്റെ രൂപകല്പ്പന ഐ.ഡി.ആര്.ബി. തയാറാക്കിയിട്ടുണ്ട്. പുതിയ ഡി.പി.ആര്. കേന്ദ്ര ജലകമ്മിഷന്റെ മാര്ഗനിര്ദ്ദേശങ്ങള്ക്ക് അനുസരിച്ചായിരിക്കും തയാറാക്കുക.
ഇപ്പോള് തമിഴ്നാട് മുഖ്യമന്ത്രി എം.കെ. സ്റ്റാലിന് കേരള അനുകൂല നിലപാട് സ്വീകരിക്കുന്ന സാഹചര്യത്തില് മുല്ലപ്പെരിയാറിലും പ്രതീക്ഷയുണ്ടെന്നാണ് കേരള സര്ക്കാരിന്റെ അഭിപ്രായം. അതുകൊണ്ടുതന്നെ പുതിയ ഡി.പി.ആര് തയാറാക്കി എത്രയും വേഗം കേന്ദ്ര ജലകമ്മിഷന്റെയും കേന്ദ്ര വനം-പരിസ്ഥിതി മന്ത്രാലയത്തിന്റെയും അനുമതിക്കായി സമര്പ്പിക്കാനാണ് കേരളത്തിന്റെ ശ്രമം.
