കൊച്ചി: ചിലപ്പോള് വെള്ള, ചിലപ്പോള് കറുപ്പ്, പിന്നീട് ചാരനിറം, മറ്റ് ചിലപ്പോള് പച്ച, വേറൊരു സമയത്ത് തവിട്ടു നിറം. കടുത്ത മലിനീകരണം മൂലം രണ്ടു മണിക്കൂര് കൂടുമ്പോള് വീതം പെരിയാറിനുണ്ടാകുന്ന നിറംമാറ്റത്തില് നാട്ടുകാര്ക്ക് ആശങ്ക.
കടുത്ത മലിനീകരണത്തെ തുടര്ന്ന് പെരിയാറിന്റെ ചില ഭാഗങ്ങളില് വെള്ളത്തിന് നിറം മാറ്റം സംഭവിക്കുന്നെന്നാണ് നാട്ടുകാരുടെ പരാതി. ഇതേ തുടറന്ന് മലിനീകരണ നിയന്ത്രണ ബോര്ഡിലെയും ഏലൂര് മുനിസിപ്പാലിറ്റിയിലെയും പരിസ്ഥിതി വിഭാഗത്തിലെയും വിദഗ്ദ്ധര് സ്ഥലത്തെത്തി പരിശോധനയ്ക്കായി ജല സാമ്പിളുകള് ശേഖരിച്ചു. ഏലൂരിന് സമീപ പ്രദേശങ്ങളിലാണ് നിറംമാറ്റം പ്രദര്ശിപ്പിക്കുന്നത്. വന് തോതിലുള്ള മലിനീകരണം കൊണ്ടാണ് ഈ നിറമാറ്റമെന്നും കുടിവെള്ളത്തെ പോലും ഈ പ്രതിസന്ധി ബാധിക്കുന്നതായും നാട്ടുകാര് ആവലാതിപ്പെടുന്നു.
സംഭവം വന് ചര്ച്ചയ്ക്ക് വഴിവെച്ചതോടെയാണ് മുനിസിപ്പാലിറ്റി അധികൃതര് മലിനീകരണ നിയന്ത്രണ ബോര്ഡിലെയും പരിസ്ഥിതി വിഭാഗത്തിലെയും ഉദ്യോഗസ്ഥര്ക്കൊപ്പം സ്ഥലത്തെത്തി പരിശോധന നടത്തിയത്. ജലത്തിന്റെ സാമ്പിളുകള് ശേഖരിച്ച് എറണാകുളത്തെ സെന്ട്രല് ലബോറട്ടറിയിലേക്ക് അയച്ചിട്ടുണ്ട്. റിസള്ട്ടിനായി ഏഴ് ദിവസം കാത്തിരിക്കേണ്ടി വരും. ഏലൂരിനൊപ്പം വാരാപ്പുഴയിലും വെള്ളത്തിന് കറുത്ത നിറമായതായും ദിവസങ്ങള്ക്ക് മുമ്പ് പെരിയാറ്റിലെ വെള്ളത്തിന് തവിട്ടു നിറമായിരുന്നെന്നും നാട്ടുകാരില് ചിലര് പറയുന്നു.
സംഭവം തങ്ങളുടെ വെള്ളംകുടി മുട്ടിക്കുമോ എന്നാണ് നാട്ടുകാര് ആശങ്ക. ഏലൂരിലെ ചില കമ്പനികളാണ് പ്രശ്നം ഉണ്ടാക്കുന്നതെന്നും കമ്പനിയില് നിന്നും കൈക്കൂലി വാങ്ങി ഉദ്യോഗസ്ഥര് കൂട്ടു നില്ക്കുകയാണെന്നും ഇവര് ആരോപിക്കുന്നു. മാലിന്യം നീക്കം ചെയ്യാനായി കഴിഞ്ഞ ദിവസം ജലവകുപ്പ് ജീവനക്കാരും ബ്രിഡ്ജ് കരാറുകാരനും ഷട്ടര് തുറക്കാന് ശ്രമിച്ചെങ്കിലും നാട്ടുകാര് പ്രതിഷേധിച്ചതിനെ തുടര്ന്ന് നീക്കം ഉപേക്ഷിച്ചു.
