കോഴിക്കോട് മെഡിക്കല് കോളേജില് വയറുവേദനയുമായെത്തിയ യുവതിയുടെ വയറ്റില് നിന്നും 10 കിലോഗ്രാമിലേറെ ഭാരമുള്ള മുഴ നീക്കം ചെയ്തു. മെഡിക്കല് കോളേജ് ഗൈനക്കോളജി വിഭാഗത്തിന്റെ നേതൃത്വത്തില് മലപ്പുറം മൂന്നിയൂര് സ്വദേശിയായ 43 വയസുകാരിയില് നിന്നാണ് സങ്കീര്ണ ശസ്ത്രക്രിയയിലൂടെ ഗര്ഭാശയ മുഴ നീക്കം ചെയ്തത്.
3 മണിക്കൂര് നീണ്ട ശസ്ത്രക്രിയയിലൂടെയാണ് 36 സെന്റീമീറ്റര് നീളവും 33 സെന്റീമീറ്റര് വീതിയുമുള്ള ഗര്ഭാശയമുഴ നീക്കം ചെയ്തത്. ശസ്ത്രക്രിയ കഴിഞ്ഞ് തീവ്രപരിചരണത്തില് കഴിയുന്ന യുവതിയുടെ ആരോഗ്യ നില തൃപ്തികരമാണ്. ആരോഗ്യ വകുപ്പ് മന്ത്രി വീണാ ജോര്ജ് ശസ്ത്രക്രിയയ്ക്ക് നേതൃത്വം നല്കിയ മുഴുവന് ടീമിനേയും അഭിനന്ദിച്ചു.
ഒരാഴ്ച മുമ്പ് വയറുവേദനയായിട്ടാണ് യുവതി കോഴിക്കോട് മെഡിക്കല് കോളേജ് ഗൈനക്കോളജി വിഭാഗത്തില് ചികിത്സയ്ക്കായെത്തിയത്. അള്ട്രാസൗണ്ട്, എം.ആര്.ഐ. സ്കാനിംഗ് തുടങ്ങിയ പരിശോധനകളില് ഗര്ഭാശയ മുഴയാണെന്ന് സ്ഥിരീകരിച്ചു. രക്തയോട്ടം കൂടുതലുള്ള മുഴയായതിനാല് ശസ്ത്രക്രിയ അതീവ സങ്കീര്ണമായിരുന്നു .
ഗൈനക്കോളജി വിഭാഗം കാന്സര് സ്പെഷ്യലിസ്റ്റ് ഡോ. സന്തോഷ് കുര്യാക്കോസ്, ഡോ. അമ്മു മോഹന്, ഡോ. ഐശ്വര്യ ഗൗതം, ഡോ. അഞ്ജന, അനസ്ത്യേഷ്യാ വിഭാഗം ഡോ. ബിനു സാജിദ്, ഡോ. സോനു എസ്.എ., സ്റ്റാഫ് നഴ്സ് സരിത സി.എസ്., സിജിമോള് ജോര്ജ്. നഴ്സിംഗ് അസിസ്റ്റന്റ് അശോകന് വി.കെ. എന്നിവരടങ്ങിയ സംഘമാണ് ശസ്ത്രക്രിയ നടത്തിയത്. ഗൈനേക്കോളജി വിഭാഗം മേധാവി ഡോ. ജ്യോതി രമേശ് ചന്ദ്രന് ശസ്ത്രക്രിയയ്ക്ക് നേത്യത്വം നല്കിയത്.
