അടുത്ത പത്തുവര്ഷത്തേക്ക് കൊല്ക്കത്ത നൈറ്റ് റൈഡേഴ്സിന്റെ മെന്ററായി ഫ്രാഞ്ചൈസിയില് തുടരാന് ടീമിന്റെ മുന്നായകനും ഇന്ത്യന് ടീമിന്റെ മുന് ഓപ്പണറുമായ ഗൗതം ഗംഭീറിന് ടീം ഉടമയും സൂപ്പര്താരവുമായ ഷാരൂഖ് ഖാന് ബ്ളാങ്ക് ചെക്ക് വാഗ്ദാനം ചെയ്തതായി റിപ്പോര്ട്ട്. രാഹുല്ദ്രാവിഡിന് പിന്നാലെ ഇന്ത്യന് ക്രിക്കറ്റ് ടീമിന്റെ പരിശീലകനായി ഗംഭീറിനെ ബിസിസിഐ നോക്കുന്നുണ്ട്.
ഗംഭീറിനും ഇക്കാര്യത്തില് താല്പ്പര്യമുണ്ട്. പക്ഷേ 100 ശതമാനം ഗ്യാരന്റി ഉണ്ടെങ്കില് മാത്രമേ താല്പ്പര്യമുള്ളൂ എന്നാണ് ഗംഭീറിന്റെ നിലപാട്. റോളിനായുള്ള അപേക്ഷ പൂരിപ്പിച്ചാല് പിന്നെ അതില് മാറ്റമില്ലെന്നും പരിശീലക സ്ഥാനാര്ത്ഥികളില് ഒരാളായി മാത്രമാണ് കാണുന്നതെങ്കില് അപേക്ഷിക്കില്ലെന്ന് താരം വ്യക്തമാക്കിയതായിട്ടാണ് വിവരം. ദ്രാവിഡിന്റെ പിന്ഗാമിയാകാന് ചില വിദേശ പരിശീലകരെയും ബിസിസിഐ നോക്കിയെന്നും എന്നാല് അവര് പിന്വാങ്ങിയതോടെ ബിസിസിഐ ഗംഭീറിലേക്ക് ഉറ്റു നോക്കുകയാണെന്നുമാണ് വിവരം.
രാഹുല് ദ്രാവിഡിന്റെ പിന്ഗാമിയായി ഇന്ത്യയുടെ മുഖ്യപരിശീലകനാകാന് റിക്കി പോണ്ടിംഗ്, ജസ്റ്റിന് ലാംഗര്, സ്റ്റീഫന് ഫ്ളെമിംഗ് എന്നിവരെ സമീപിച്ചെങ്കിലും അവരെല്ലാം അവസരം നിരസിച്ചിട്ടുണ്ട്. എന്നാല് ജയ് ഷാ ഇക്കാര്യം നിഷേധിച്ചു. ഇന്ത്യയുടെ ആഭ്യന്തര ക്രിക്കറ്റ് ഘടന മനസ്സിലാക്കുന്ന തരത്തിലുള്ള ആളെയാണ് ബോര്ഡ് നയിക്കേണ്ടതെന്ന് ഷാ നിര്ദ്ദേശിച്ചു.
''ഞാനോ ബിസിസിഐയോ ഒരു മുന് ഓസ്ട്രേലിയന് ക്രിക്കറ്റ് കളിക്കാരനെയും കോച്ചിംഗ് ഓഫറുമായി സമീപിച്ചിട്ടില്ല,'' ഷാ പ്രസ്താവനയില് പറഞ്ഞു. 'ചില മാധ്യമ വിഭാഗങ്ങളില് പ്രചരിക്കുന്ന റിപ്പോര്ട്ടുകള് പൂര്ണ്ണമായും തെറ്റാണ്.'
'നമ്മുടെ ദേശീയ ടീമിന് അനുയോജ്യമായ പരിശീലകനെ കണ്ടെത്തുന്നത് സൂക്ഷ്മവും സമഗ്രവുമായ പ്രക്രിയയാണ്. ഇന്ത്യന് ക്രിക്കറ്റ് ഘടനയെക്കുറിച്ച് ആഴത്തിലുള്ള ധാരണയുള്ളവരും റാങ്കുകളിലൂടെ ഉയര്ന്നവരുമായ വ്യക്തികളെ തിരിച്ചറിയുന്നതിലാണ് ഞങ്ങള് ശ്രദ്ധ കേന്ദ്രീകരിക്കുന്നത്,' ഷാ പറഞ്ഞു. ഇന്ത്യയുടെ അടുത്ത മുഖ്യ പരിശീലകനാകാന് ഗംഭീറിന് താല്പ്പര്യമുണ്ടാകാം, എന്നാല് കെകെആര് വിടുന്നതിനെച്ചൊല്ലി ഷാരൂഖുമായി അദ്ദേഹം നടത്തിയ സംഭാഷണം ഒരു വലിയ നിര്ണ്ണായക ഘടകമായേക്കാം.
