ഇന്ത്യയുടെ തെക്കേയറ്റമായ കേരളം അതിശക്തമായ മഴയില് നനഞ്ഞു കുളിരുകയും വെള്ളപ്പൊക്ക സാഹചര്യത്തിലേക്ക് നീങ്ങിക്കൊണ്ടിരിക്കുകയും ചെയ്യുമ്പോള് ഇന്ത്യയുടെ വടക്കന് ഭാഗങ്ങള് ചൂടുകൊണ്ട് തിളച്ചുമറിയുന്നു. രാജസ്ഥാന്, ഡല്ഹി, പഞ്ചാബ്, ഹരിയാന, ചണ്ഡീഗഡ്, മധ്യപ്രദേശ് എന്നിവിടങ്ങളില് ബുധനാഴ്ച ഇന്ത്യന് കാലാവസ്ഥാ വകുപ്പ് (ഐഎംഡി) 'റെഡ്' അലര്ട്ട് പുറപ്പെടുവിച്ചതോടെ രാജ്യത്തിന്റെ പല ഭാഗങ്ങളിലും ചുട്ടുപൊള്ളുന്ന ഉഷ്ണതരംഗത്തില് ദുരിതമനുഭവിക്കുകയാണ്.
ഡല്ഹിയില് 46 ഡിഗ്രി വരെ ഉയര്ന്ന താപനിലയാണ് ഐഎംഡി പ്രവചിച്ചിരിക്കുന്നത്. ഉത്തര്പ്രദേശില് ഉഷ്ണ തരംഗത്തിന്റെ പശ്ചാത്തലത്തില് ഓറഞ്ച് അലര്ട്ടും പ്രഖ്യാപിച്ചിട്ടുണ്ട്. 'രാജസ്ഥാന്റെ പല ഭാഗങ്ങളിലും അല്ലെങ്കില് മിക്ക ഭാഗങ്ങളിലും ചൂട് തരംഗം മുതല് കഠിനമായ ചൂട് തരംഗങ്ങള് വരെ ഉണ്ടാകാന് സാധ്യതയുണ്ട്; പഞ്ചാബ്, ഹരിയാന, ചണ്ഡീഗഡ്, ഡല്ഹി എന്നിവയുടെ ചില അല്ലെങ്കില് പല ഭാഗങ്ങളിലും; പടിഞ്ഞാറന് ഉത്തര്പ്രദേശ്, പശ്ചിമ മധ്യപ്രദേശ് എന്നിവയുടെ ഒറ്റപ്പെട്ട ഭാഗങ്ങളില് മെയ് 27-29 കാലയളവിലും അതിനുശേഷം ക്രമേണ കുറയും, ''ഐഎംഡി അതിന്റെ ബുള്ളറ്റിനില് പറഞ്ഞു.
കിഴക്കന് മധ്യപ്രദേശ്, വിദര്ഭ, ജമ്മു ഡിവിഷന് എന്നിവിടങ്ങളിലെ ഒറ്റപ്പെട്ട പോക്കറ്റുകളില് മെയ് 29 വരെയും ഹിമാചല് പ്രദേശ്, കിഴക്കന് ഉത്തര്പ്രദേശ്, ഛത്തീസ്ഗഢ് എന്നിവിടങ്ങളിലെ ഒറ്റപ്പെട്ട പോക്കറ്റുകളില് മെയ് 30 വരെയും ഉഷ്ണതരംഗത്തിന് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ചൊവ്വാഴ്ച നേരത്തെ, രാജസ്ഥാനിലെ ചുരുവില് രാജ്യത്തെ ഏറ്റവും ഉയര്ന്ന താപനില 50.5 ഡിഗ്രി സെല്ഷ്യസ് രേഖപ്പെടുത്തിയിരുന്നു.
സിര്സ, ഹരിയാന: 50.3 ഡിഗ്രി. മുംഗേഷ്പൂര്, ഡല്ഹി: 49.9 ഡിഗ്രി, ഝാന്സി, ഉത്തര്പ്രദേശ്: 49.0 ഡിഗ്രി, പൃഥ്വിപൂര് (നിവാരി), മധ്യപ്രദേശ്: 48.5 ഡിഗ്രി. ദല്തോംഗഞ്ച്, ജാര്ഖണ്ഡ്: 47.5 ഡിഗ്രി, ഭട്ടിന്ഡ, പഞ്ചാബ്: 47.2 ഡിഗ്രി, ഡെഹ്രി, ബീഹാര്: 47.0 ഡിഗ്രി, മുംഗേലി, ഛത്തീസ്ഗഡ്: 47.0 ഡിഗ്രി ബൗദ്, ഒഡീഷ: 45.9 ഡിഗ്രി. എന്നിവയാണ് ഇന്ത്യയില് രേഖപ്പെടുത്തിയ ഉയര്ന്ന താപനില. മെയ് 30 ന് ശേഷം ഉഷ്ണതരംഗത്തിന് അയവ് വരുമെന്നാണ് ദേശീയ കാലാവസ്ഥാ നിരീക്ഷണകേന്ദ്രത്തിന്റെ വിലയിരുത്തല്.
'റെമാല്' ചുഴലിക്കാറ്റ് കണക്കിലെടുത്ത് മെയ് 29 ബുധനാഴ്ച വടക്കുകിഴക്കന് സംസ്ഥാനങ്ങളില് കനത്തതോ അതിശക്തമായതോ ആയ മഴയ്ക്ക് ഐഎംഡി 'റെഡ്' അലര്ട്ടും നല്കിയിട്ടുണ്ട്. നാഗാലാന്ഡ്, മണിപ്പൂര്, മിസോറാം, ത്രിപുര എന്നിവിടങ്ങളില് മെയ് 29 ന് 115.5 മുതല് 204.4 മില്ലിമീറ്റര് വരെ കനത്തതോ അതിശക്തമായതോ ആയ മഴ ലഭിക്കാന് സാധ്യതയുണ്ട്. അസം, മേഘാലയ, അരുണാചല് പ്രദേശ് എന്നിവിടങ്ങളില് മെയ് മുതല് ശക്തമായതോ അതിശക്തമായതോ ആയ മഴയ്ക്ക് സാധ്യതയുണ്ട്.
