കന്യാകുമാരി: വിവേകാന്ദപ്പാറയില് നീണ്ട 45 മണിക്കൂര് ധ്യാനം പൂര്ത്തിയാക്കിയ പ്രധാനമന്ത്രി നരേന്ദ്ര മോദി കന്യാകുമാരിയില് നിന്നും മടങ്ങി. തിരുവള്ളുര് പ്രതിമയില് പുഷ്പാര്ച്ചന നടത്തിയതിന് ശേഷമായിരുന്നു മടക്കം.
കന്യാകുമാരിയില് എത്തിയ പ്രധാനമന്ത്രി 30ന് വൈകിട്ട് 5.40 ന് കന്യാകുമാരി ദേവീക്ഷേത്രത്തില് ദര്ശനംനടത്തിയ ശേഷമാണ് വിവേകാനന്ദപ്പാറയില് ധ്യാനത്തിനെത്തിയത്.
കാവിമുണ്ടും ജുബ്ബയുമായിരുന്നു വേഷം. നെറ്റിയില് ഭസ്മക്കുറിയും കഴുത്തില് രുദ്രാക്ഷമാലയും അണിഞ്ഞിരുന്നു. സൂര്യനമസ്കാരത്തിനുശേഷം അദ്ദേഹം സഭാമണ്ഡപത്തിലെ വിവേകാനന്ദപ്രതിമയ്ക്കു മുന്നില് ധ്യാനനിരതനായി.
ഉണക്കമുന്തിരിയും കരിക്കും മോരുമായിരുന്നു ആഹാരം. വിവേകാനന്ദപ്പാറയിലെ മാനേജരുടെ മുറി പ്രധാനമന്ത്രിയുടെ ഉപയോഗത്തിനായി പ്രത്യേകം സജ്ജീകരിച്ചിരുന്നു. അവിടെയായിരുന്നു ധ്യാനത്തിനുശേഷമുള്ള സമയം ചെലവഴിച്ചത്.
