ന്യൂഡല്ഹി: ഹിന്ദി ഹൃദയഭൂമിയിലുള്പ്പെടെ ബി.ജെ.പിക്കേറ്റ തിരിച്ചടിയില് അടിപതറി വീണതു കേന്ദ്രമന്ത്രിമാരുള്പ്പെടെ നിരവധി പ്രമുഖര്. നെഹ്റു കുടുംബത്തിന്റെ കുത്തകയായിരുന്ന അമേഠി മണ്ഡലത്തില്നിന്നു സാക്ഷാല് രാഹുല് ഗാന്ധിയെ തുരത്തിയോടിച്ച സ്മൃതി ഇറാനിയുടെ പരാജയം ബി.ജെ.പിക്കു താങ്ങാവുന്നതിലപ്പുറമുള്ള ആഘാതമായി. അമേഠിയില് ഇക്കുറിയും മത്സരിക്കാന് രാഹുലിനെ സ്മൃതി വെല്ലുവിളിച്ചെങ്കിലും അദ്ദേഹം കൂടുതല് സുരക്ഷിതമായ റായ്ബറേലി തെരഞ്ഞെടുക്കുകയായിരുന്നു.
രാഹുല് തന്ത്രപൂര്വം ഒഴിഞ്ഞുമാറിയ അമേഠിയില് നെഹ്റു കുടുംബത്തിന്റെ എക്കാലത്തെയും വിശ്വസ്തന് കിഷോരിലാല് ശര്മയേയാണു കോണ്ഗ്രസ് പകരം നിയോഗിച്ചത്. ശര്മയുടെ സ്ഥാനാര്ഥിത്വത്തെ വിലകുറച്ചുകണ്ട ബി.ജെ.പിയാകട്ടെ നെഹ്റു കുടുംബത്തിന്റെ അടുക്കള ജോലിക്കാരനെന്നാണ് അദ്ദേഹത്തെ പരിഹസിച്ചത്. സ്മൃതിക്കു മുന്നില് ചാവേറാകാനാണു ശര്മയുടെ വിധിയെന്നു രാഷ്ട്രീയനിരീക്ഷകരും കരുതി.
എന്നാല്, നെഹ്റു കുടുംബത്തിന്റെ വിശ്വസ്തനെന്ന നിലയില് മണ്ഡലത്തിന്റെ മുക്കിലും മൂലയിലും സുപരിചിതനായ അദ്ദേഹത്തെ അമേഠിക്കാര് കൈവിട്ടില്ല. കഴിഞ്ഞ തെരഞ്ഞെടുപ്പില് രാഹുലിനു സ്മൃതിയേല്പ്പിച്ച ആഘാതം അതേ നാണയത്തില് ശര്മയിലൂടെ അവര്ക്കു തിരിച്ചുകിട്ടി. ബി.ജെ.പി. പരിഹസിച്ച ''അടുക്കളക്കാരന്'' അരങ്ങുവാഴുന്ന കാഴ്ചയ്ക്കാണു രാജ്യം സാക്ഷ്യം വഹിച്ചത്. വാരാണസിയില് സാക്ഷാല് നരേന്ദ്രമോദി നേടിയതിനേക്കാള് മികച്ച ഭൂരിപക്ഷത്തിനായിരുന്നു (1,67,196) അമേഠിയില് ശര്മയുടെ ജയം.
തോല്വിയിലും തിളങ്ങി രാജീവും മുരളീധരനും
പരാജയപ്പെട്ടെങ്കിലും തിളക്കമാര്ന്ന പ്രകടനമാണു ബി.ജെ.പി. ഇന്നുവരെ ജയിച്ചിട്ടില്ലാത്ത തിരുവനന്തപുരം മണ്ഡലത്തില് കേന്ദ്ര ഇലക്ട്രോണിക്സ്-ഐ.ടി. സഹമന്ത്രി രാജീവ് ചന്ദ്രശേഖര് കാഴ്ചവച്ചത്. ഹാട്രിക്കും കടന്ന് നാലാം ജയം തേടിയിറങ്ങിയ കോണ്ഗ്രസ് പ്രവര്ത്തകസമിതിയംഗം ശശി തരൂര് ഇക്കുറി രാജീവിനു മുന്നില് വിയര്ത്തു.
ജയിച്ചെങ്കിലും തരൂരിന്റെ ഭൂരിപക്ഷം 16,077 വോട്ടായി കുത്തനെ കുറയ്ക്കാന് രാജീവിനായി. ആറ്റിങ്ങല് മണ്ഡലത്തില് പോരിനിറങ്ങിയ കേന്ദ്ര വിദേശകാര്യസഹമന്ത്രി വി. മുരളീധരന് മൂന്നാംസ്ഥാനത്തായെങ്കിലും ശക്തമായ മത്സരം കാഴ്ചവച്ചതോടെ വിജയിയായ കോണ്ഗ്രസിലെ സിറ്റിങ് എം.പി. അടൂര് പ്രകാശിന്റെ ഭൂരിപക്ഷം മൂന്നക്കത്തിലൊതുങ്ങി.
ഖേരിയില് 'തെന്നി' വീണ് അജയ് മിശ്ര
ഉത്തര്പ്രദേശിലെ ഖേരി മണ്ഡലത്തില് ഹാട്രിക് വിജയം തേടിയിറങ്ങിയ കേന്ദ്ര ആഭ്യന്തരസഹമന്ത്രി അജയ് മിശ്ര തെനിയും ജനവിധിയുടെ ചൂടറിഞ്ഞു. 2021 ഒക്ടോബര് മൂന്നിനു കര്ഷകപ്രക്ഷോഭകര്ക്കിടയിലേക്കു വാഹനമോടിച്ചുകയറ്റി അഞ്ചുപേരും തുടര്ന്നുള്ള കലാപത്തില് മൂന്നുപേരും കൊല്ലപ്പെട്ട കേസില് മകന് ആശിഷ് മിശ്ര പ്രതിയായതിനേത്തുടര്ന്ന് അജയ് മിശ്രയ്ക്കെതിരേ വന്ജനരോഷമുയര്ന്നിരുന്നു. എന്നാല്, അദ്ദേഹത്തെ കൈവിടാന് ബി.ജെ.പി. തയാറായിരുന്നില്ല. സമാജ്വാദി പാര്ട്ടിയുടെ ഉത്കര്ഷ് വെര്മയോട് 34,329 വോട്ടിനാണു മിശ്ര പരാജയപ്പെട്ടത്.
മുണ്ടെയോടു തോറ്റ് മുണ്ടെ!
ഝാര്ഖണ്ഡിലെ ഖുന്തി മണ്ഡലത്തില് കോണ്ഗ്രസ് സ്ഥാനാര്ഥി കാളിചരണ് മുണ്ടയോട് 1,49,675 വോട്ടിന് അടിയറവ് പറഞ്ഞ അര്ജുന് മുണ്ടെയാണു പരാജയപ്പെട്ട കേന്ദ്രമന്ത്രിമാരില് മറ്റൊരാള്. മോദി മന്ത്രിസഭയില് ഗോത്രവര്ഗവകുപ്പാണു മുണ്ടെ കൈകാര്യം ചെയ്തിരുന്നത്. കേന്ദ്ര കൃഷി-കര്ഷകക്ഷേമ സഹമന്ത്രി കൈലാഷ് ചൗധരിയാകട്ടെ രാജസ്ഥാനിലെ ബാര്മര് മണ്ഡലത്തില് മൂന്നാംസ്ഥാനത്തേക്കു പിന്തള്ളപ്പെട്ടു. കോണ്ഗ്രസിലെ ഉമ്മെദാ റാം ബെനിവാള് 4.48 ലക്ഷം വോട്ടിനാണ് ഇവിടെ വിജയിച്ചത്.
ഉത്തര്പ്രദേശില് പരാജയപ്പെട്ട പ്രമുഖരില് ചന്ദൗലി മണ്ഡലത്തിലെ സിറ്റിങ് എം.പി. കൂടിയായ കേന്ദ്ര ഘനവ്യവസായമന്ത്രി മഹേന്ദ്രനാഥ് പാണ്ഡെ, നഗരകാര്യസഹമന്ത്രി കൗശല് കിഷോര് (മോഹന്ലാല്ഗഞ്ച്), ഭക്ഷ്യ-പൊതുവിതരണസഹമന്ത്രി സ്വാധി നിരഞ്ജന് ജ്യോതി (ഫത്തേപ്പുര്), കേന്ദ്രമന്ത്രി സഞ്ജീവ് ബല്യാന് (മുസാഫര്നഗര്) എന്നിവരും ഉള്പ്പെടുന്നു. എസ്.പി. സ്ഥാനാര്ഥി ആര്.കെ. ചൗധരിയോട് 70,292 വോട്ടിനാണു കൗശല് കിഷോര് പരാജയപ്പെട്ടത്. എസ്.പി. സ്ഥാനാര്ഥി ഹരേന്ദ്രസിങ് മാലിക്കിനോട് കാല്ലക്ഷത്തോളം വോട്ടിനായിരുന്നു സഞ്ജീവ് ബല്യാന്റെ തോല്വി.
മുരുകന്റെ തോല്വി 2.4 ലക്ഷം വോട്ടിന്
റെയില്വേ സഹമന്ത്രി റാവു സാഹെബ് ദാന്വെ മഹാരാഷ്ട്രയിലെ ജല്നയില് കോണ്ഗ്രസ് സ്ഥാനാര്ഥി വൈജ്ഞാത് റാവു കാലെയോടും ഊര്ജമന്ത്രി ആര്.കെ. സിങ് ബിഹാറിലെ ആരെയില് സി.പി.ഐ. (എം.എല്) സ്ഥാനാര്ഥി സുദാമാ പ്രസാദിനോടും ഫിഷറീസ്-മൃഗസംരക്ഷണസഹമന്ത്രി എല്. മുരുകന് തമിഴ്നാട്ടിലെ നീലഗിരിയില് ഡി.എം.കെ. സ്ഥാനാര്ഥി എ. രാജയോടും പരാജയപ്പെട്ടു. 2,40,585 വോട്ടിന്റെ കനത്തതോല്വിയാണു മുരുകന് ഏറ്റുവാങ്ങിയത്.
ബംഗാളില് ''സര്ക്കാരും'' തോറ്റു!
അജയ് മിശ്രയെക്കൂടാതെ മറ്റൊരു ആഭ്യന്തരസഹമന്ത്രി നിഷിത് പ്രമാണിക്കിനും ഇക്കുറി ജനം ലോക്സഭയിലേക്കു ടിക്കറ്റ് നല്കിയില്ല.
പശ്ചിമബംഗാളിലെ ചൂച് ബെഹാറില് തൃണമൂല് കോണ്ഗ്രസ് സ്ഥാനാര്ഥി ജഗദീഷ് ചന്ദ്ര ബാസുനിയയോട് 39,000 വോട്ടിനാണു നിഷിത് പരാജയപ്പെട്ടത്. കേന്ദ്ര വിദ്യാഭ്യാസ സഹമന്ത്രി സുഭാസ് സര്ക്കാറും ബംഗാളില് തോല്വിയുടെ രുചിയറിഞ്ഞു. ബാങ്കുര മണ്ഡലത്തില് തൃണമൂല് സ്ഥാനാര്ഥി അരൂപ് ചക്രബര്ത്തിയോട് 32,778 വോട്ടിനായിരുന്നു പരാജയം.
